Тесэ ды тосо (2013)/5
| ←Нилеце сёрмась | Тесэ ды тосо (2013) by , edited by Ломшина Л. А. Ветеце сёрмась |
Котоце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 31—34 |
[31]
| * * * |
| Ветеце сёрмась |
Тоначив, Лемаень Виянанень, од шкань ялганень
Паро мельть-арсемат теть, Вияна!
Васоло ошсто самодон мейле мартот вастовомазонок, дугинем, кадовкшность шкань сэльть. Кадык аламо, карминь аванень лездамо. Шканть а мезть ёмсевтемс! Теинь, зяро теевсть, зяро кенеринь, кудонь-кардазонь тевтнеде ды совинь кудос. Пурнынь-теинь. Шкась мольсь стамбаро-стамбаро. Паряк, лездамс, панжомс тензэ кенкшенть? Ужо-ужо! Иля кармавто. Вана аламнеде чопоти, вельмевтить кудотнесэ толт, ды вастовить вановтонок, вейсэндявить, Вияна, турванок.
...Неитинь клубс совамстот. Марявсь тень, кирвазсть ве шкасто сядот электричествань толт. Валдодост покшолгадсь залонть потмозо, ёмасть мизолдыця чама тейтертне, перькаст чарыця цёратне. Сельмень икеле аштить тон, Вияна, неинь, вечкевиксэм, ансяк тонь, тонь, тонь!
Пурнавиде, минек пень тейтертне, ве курынес. Ютынь ваксозонк. Тон явовить ялгадот, ды арынек карадо-каршо лия таркас. Варштынь сельмезэть: мазычидеть кундатотсь келем. Истямокс эзитинь некшне! Те ёжомарямонть сеске полавтызе лия: талакадома. Эзинь редя сельмстэть кенярксонь кандыця сяткинеть... Вановтот нолдык. «Те мезе истя? Мезень тамаша?» — ютась пряудемган ёжонь рипакавтыця мелесь. Чамакиськетькак, тешкстакшныя эсь пачкан, седе ловтаняль. «Аволь прят беряньстэ марят?» — кевстекшнитинь.
Кувать клубсо эзинек аште. Аволь киштеме сакшнынек. Аволь морамояк. Лисинек ушов ды сыргинек эсенек Пичепе ёнов. Тов, косо минь, од ломантне, ютавтнинек тундонь-кизэнь шкава чокшненек, косо гайгезь гайгсть моронок. Ней, ловт, телень кенкш икелькс. Кияк умок уш эзь сакшно киштема кужос.
[32] Пупоронь вальмалксост каштмольсь.
Чевте, начкола васень ловнесь сравтовсь парсте муськезь-ашолгавтозь коцтокс кудотнень икельга-юткова, копачинзе латотнень. Сон састыне, виздезь мотордсь пильгенек ало, пеняцясь лангозонок: «Мекс шешктядо эйсэнь? Мезень чумом?». Ды сеске кевкстсь лиядо: «Ков тынь, ков тынь?». Каня теть, кельме ёжо, а содави? Тов, косо тундонь элякалема шкасто вечкемадо тошксесь велькссэнек Лемаень пиресэ ламаресь.
Ютынек Кирдалейненть трокс сэденть. Пачкодинек Чакуронь видьс ды пурдынек витев. Эзь марявояк, прядовсь Пичепень кудотнень икельга велепев тердиця яннэсь, ды лисинек, састо-састо эскелязь, кедте кедьс кундазь, веленть томбалев.
Мекс эзь ванстово тенек се чокшнесь? Мекс сезевсь, эзь поладово ванькс, ашо од ловсо вельтязь кинек-янонок?
Ёвтнинек вейкенек-вейкенек туртов эрямодонок, велень кулятнеде, кудонь-колхозонь тевтнеде. Ёвтнинь тонавтнемань ламодояк ламо мелявкстон, кода студент ялган пеедькшнесть лангсон ды лемдекшнимизь Виянокс, тонь лемсэ, Вечкемадо вана арасель ёвтазь валгак. Арасельть кортамот икелепелень читнедеяк: васодевемс, валовомс вейс, эли явовомс допрок? Эзинь венсте кедь, эзитинь терде никс. Содамс, мезе тень меревлить? Молевлить-арась экшезэнь, чаво зепе тонавтницянтень? Теде чатьмонеманок, ней тень маряви, кортась вейкеде: вечкемасонок теевкшнесь кодамо-бути лазовкс. Тон уш лия ульнить, эсь мелеть кирдить превсэть; монгак эсь потмован арсинь лиякс. Та-кодамо потмо вайгель кортась, кадык аволь чарькодевиксстэ, салава, валтомо, вечкеманок прядовомадо.
Явовинек истямо содавикс тень тынк, Лемаень, кузтемпесэ.
Кудов туемадонок икеле стинек эземнестэнть, кутмордытинь, муинь потьмежа чевте турват ды палытинь. Арась, килей ведень тансть эзинь марякшно. Те ульнесь, меревлинь истя, товтомо-расттомо меельце паламонок. Эйсэнзэ арасель а мель, а лембе, а валдо ёжо.
[33] Мекс полавтовкшныть, мекс кельмель вастовоманок, карминь содамо омбоце чистэнть, туема чинь валскестэнть, зярдо вастовинь, якинь тенст, Цянтаронь Вечкай марто. Мельсэть сон? Кода эно! Вейсэ мартонзо зярдо-бути школав чийнинь. Минек пень сон ульнесь. Вечкай цёрась аволь лавшо кельтнедель. Келятне-мелятне аволь сонзэ обуцясольть. Сон тень панжизеяк се чокшнестэнть кекшнезь прянь ветямонь, ютксонок кельмень тувталонть.
Зяро пинеть раздесть седеем пельдензэ марязь кулядонть, ледстнемс а мезть. Нейгак, сыречисэнь, сэредьксэсь мукшносамам. Эрьва кодат арсемат чачнить прясон: мезень смусть — аштемс ды сорномс кенгелемадо копком пешксе эрямонть кис? Мезень тансть, зэме, лув эрямонь кувака, кадык нурькинеяк, пингесэнть? Пикс пе — ды Тов, тынк юткс, пень а содыця каштмолемадо пешксе Масторозонк. Кавто иеть яксемс кедте кедьс кундазь, прок кавтаське эйкакшт, арсемс ве арсемасо, симнемс ве кечестэ, вейсэ кунсоломс ковонть моронзо ды... туемс лиянень.
«Чем больше узнаю людей, |
аволь чуросто содавтнесамизь рузонь вейке поэтэнть валонзо. Каня а истя? Каня лия питне максови ломантнень ютксо авидечинтень, ютксост теевиця, ве кескавсо а кандовиця нулгодькс тевтненень? Видестэ, пек видестэ тешкстызе сёрмадеесь!
Вечкаень пельде марязь кулясь парояк кандокшнось: каявкшнось лавтовон лангсто кавтолдомань аволь шождыне канстось. Те ды шкась-ормаменьксэсь лездасть тень муемс вийть ды изнямс эрямодонть раужо мельтнень, одс, од превсэ-ёжосо варштамс сонзэ мазычинзэ лангс.
Зяро ведь чудесь од шкастонок саезь веленек пева таргавозь Веждей лейганть, кияк а соды. Монгак а содан. Муевельгак содыця, меревель — ламо. Моньгак манчимизь аволь весть. Ламоксть. Сэредькстэнть седеезэнь эрьваксть кадновсь аржо. Ансяк сень кондямо авидечи, кенгелема [34] ялатеке арасель. Се ульнесь васенце вечкемань аржо. Секс эзь саеве, эзь нардаво седейстэнь шкантеньгак.
Кода тон, Вияна, печтик чопода се шканть?
Эрицянь Мастор, Валдай. 1999-це иень якшамковонь 30-це чи.