Тесэ ды тосо (2013)/2
| ←Васенце сёрмась | Тесэ ды тосо (2013) by , edited by Ломшина Л. А. Омбоце сёрмась |
Колмоце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 13—20 |
[13]
| * * * |
| Омбоце сёрмась |
Тоначив, Лемаень Виянанень, куломазон вечкевиксэм туртов
Паро мельть-ёжот, Вияна!
Васняяк, Тоначинь тештинем, сёрмадот.
Аволь ансяк талакадынь. Те мезе... Саия кедезэнь якстере конвертэнть, эль эзинь невеле пачкан ютыця псиденть. Сонзэ сеске полавтызе кельме. Прок анксемасто таргазь ведь ведра ланган жойневтсть. Рипакадынь. Седеяк абунгадынь ды тандадынь, зярдо эйстэнзэ каятотсь кашторксось. Сонзэ кондямо марявкшны радиосо эрявикс кошткеверьксэнь вешнемстэ. Шш-р-р, шш-р-р... — сови пилезэть, кутсти эфирэнть лексемазо.
Сеске эзинь чарькоде, мезе потсонзо. Панжия — эль [14] керявсь васоньпеельсэ — конвертэнть, ды вановтом икелев понгсь ванькс, ашо, сурс педиця конёв лопа. Аравтыя, теке кияк кармавтымим, чинь каршо.
Таймазкадынь. Вай! Те мезе? Васня конёвось вельтявсь сэняжа сувнесэ, мейле лиссть кодат-бути лопинеть-сюрынеть, ды, окойники, сон пешкедсь тонь кедьсэ — сеске содыя! — тешкстнезь буквинеде. Зяро шкась эйсэнек эзь чевеля, зяро телеть-кизэть эзть юта, сёрмадома лувот, кедеть, эзь стувтово.
Талай эзинь оймаво.
Аламонь-аламонь сынь ёжос, карминь чарькодеме, кода-мезе, кона ёндо ды кинь пельде пачкодсь якстере, тюнихадо пешксе конвертэсь.
Кавтолдомат, мезень-бути кис янксемат, нуваргалемат, кеняркст-эрьведемат, ледстнемат... Зняро иень ютазь, кинь пельде ды... косто! — сёрма. Марявсь тень, се шкастонть, зярдо ойминь, чипаесь аволдынзе перьканзо нузялдозь чарыця чопода пельнетнень ды мизолдозь варштась лангозон. «Кецнек, эйдинем, кецнек, цёра, эряк!» — мерсь сон тень.
Вайгелеть, Вияна, куломантень эзь изняво. Сёрмат ловномсто дильнесь пилесэнь, прок сыть Тосто ды озадо аштят каршон, ёвтнят, ёвтнят калгодо менель ало Тосонь эрямодот. Вайгелеть алкине, эчке, мештестэ лисиця. Истямо «лем» макснинь тензэ од, вастневема шкастонок. Ней максан аламнеде лия, лия масторонь кельсэ — альт. Истя мерильть тонь кондямо вайгельденть латинтнэ. Кода илязо уле, сёрманть ловномань перть чольдердсь пилесэнь сиянь горнипов. Ванькс-ванькс! Эзинь кирдеве: сурс педиця лопиненть апак капша кандыя турван малас ды палыя, истя зярдо-бути палакшнытинь васенцеде: виздезь, пелезь, танстень апак сода. Истя палсить ансяк эйкакшт. Мельсэть?
Мезть ансяк а эрсить Моданть лангсо! Паряк, алонзояк, Тоначисэ. Теде а содан. Те тонь Масторось. Ужока! Кода истя «а содан»? Ва, иля мере, сёрмат эзия ловно. Тон сонзэ, Модаалксонть, невтик истяяк-истяяк, эрьва ёндо. Сёрмат ловномсто маринь ёжом истя, прок валгонинь тонеть, прок якинь икелепелень кудом, эрямо таркам варштамо. Тусь-эзь [15] мелезэнь — теде мезеяк а мерян.
Сюконян ёвтнемат кис. Сельмень панжить. Ней содан, кодамо Тосо тынк пертьпельксэсь, койтне-кирдатне, мелявкстнэ, кодат тынсь лангс ванозь. Васень сёрмастот уш неия ды ней содан кой-мезе Мастордонть, косо, сы шка, поладови седе тов ингельёндо велявтозь эрямом.
Мелезэнь эзь туе, ангордызе седеем ве кулясь: азгун, салыця-колыця, мик тетянь-авань маштниця ломантне эрить Тоначисэ, тонь пачтямга, лиятнень коряс седе парсте, максневить тенст седе лембе таркат. Те кода истя? Мекс? Сестэ, лисни, монень, видечисэ эрицянтень, кодамокс лован эсь прям, максыть сехте экше, чинев нупальне ды кевде калгодо мадема тарка? Те кода-бути...
Талай кавтолдынь. Мик ацирьгалинь, содт нолдтнинь.
Эскельдинь шкань ютазь те «авидечинть» трокскак. Чарькодия: истя эрявияк. Лиякс улемс а кода. Ды те вана мекс. Теевлизеяк Кулава Пазось мекевланг, лисевель покштояк покш авидечи: веенстнэнень саволь сестэ тардемс стакачисэ кавксть — Течисэ ды Тоначисэ. Мекс, алкукскак, тонеть, сайсынек невтемакс, тейтерьксшкань ильведьксэть кис, иля покордаво, майсевемс, кандтнемс кевде пешксе зобунят кавтонь таркава? Саты, Модалангсо кандтнезтнеяк...
Мон, содак, аволь салыцятнеде-колыцятнеде. Пеель киньгак лангс эзинь кепсе. Палыця ведентеньгак зярдояк эзинь правто. Ве ёндо ванозь, эрян, койсэнь, паро ломанькс. Варштындерят седе потс, потмаксос, мелеть полавтови. Пиштемань масторось келей-кувака. Домкаяк. Майсематне эйсэнзэ эрьва кодамо понань. Вейкесь какарьгады, ванат, кренчведтенть, омбоцесь сявори ды ушоды резэме кодамояк ормадо, колмоцесь... Эрси истяяк, ды аволь чуросто: а симицясь, арсицясь-содыцясь пиштекшни кудовтомо эрицятнедеяк пек. Видечинь кис аштицясь эли тень кис тюрьмасо-каторгасо кирдевицясь каня эльнемань пизэсэ эрить? Ансяк а неяви: истятнэ ризксэст-мелявксост потсост кирдить, пирявкс прява сынст а понгавтнить. Лисни, весе пиить-палыть Течисэнть, ансяк эрьвась эсензэкс. Секскак [16] Тосо кельме таркат иляст уле. Эли улест вельть аламо.
Видестэ, видестэ тешкстыть тынк ёно лембе таркатнень явномань койденть. Те, алкукскак, тюнгольксэнь тев: васня нолдамс эйкакшонть, мейле тапамс сонзэ уцясканзо тюшумбар, теемс сонзэ куломазонзо ёколдозь якицякс. Те аламо, поладовост пиксеманзо Тоначисэяк. А виде, а виде! Эрьванень казевезэ лембе таркине, куш Тоначисэ. Паро, кецневти се — тынк ютксо видечи кирдеви. Тесэ, Вияна... Вай, седе вадря а ледстнемскак! А манятадызь вить ёндо, карсетядызь, тейсызь тень керш ёнсетне, а покордындерят ялгать, учок седееть пачк ютыця вал ялгать пельде. Ульнесь истя тонь пингстэ, ней — седеяк. Истя свал ули? А содан, Вияна, а содан!
Прявттнэ видестэ тейсть. Мон арсян, васняяк тень редизе-чулгизе Модаалксонь прявтось — Кулава. Секскак сон — Видечинь васень кирдий. Сонензэ весе вейкеть: инязор, тенсек, президент, сокиця-видиця, ава, цёра, мазый, а мазый... Кула, монь превсэ-мельсэ, аволь кода инязор. Сон свал тынк ды минек ютксо, свал седейсэнек. Кедте кедьс кундазь яки мартонок. Яки ды апак тално якавты-теи раужо, кода миненек маряви, тевензэ. Теи эвтемань апак сода, чатьмонезь, шкастонзо. Сон азор аволь ансяк Тоначисэ, Течисэяк. Кедькоморосонзо аволь ансяк калмос нолдазтне — нолдыцятнеяк.
Содан, тынк чиретнесэ арасть сырнекс ожолдыця товсюронь паксят, а цёкордыть, удомат а сезнить панжиковонь нурькине экше ветнестэ цёковт, а марсевить телень чокшне каштлангсо мадезь аштемстэ каштомонь почкосонть урныця вармань тандавтнемат. Зярдояк а марят пельденк марямга ёвтазь валт. Ушодкстомо-певтеме кашт. Кода илязо уле, кулятне, эстест содавикс киява, кадык чуросто — учат ков, омбоце, колмоце, — пельденк пачколить Модалангскак. Вана тонь, Вияна, сёрмаськак, тонь ледстнематнеяк...
Сёрмадот мейле мезе аволинь тее, ков аволинь моле, секе тев совсить седеезэнь-превзэнь Тоначинь таркатнеде ёвтнематне. Иля арсе, учан пельдеть лезэ — автордамс тосто нейке, куломадон икеле, чевте таркине. Иля, иля.
[17] Кшувавтык прястот, сындеряй, те меленть! Кула невтьсы тень таркам. Те Тесэ ламо-мезе тееви «понав кедь» вельде. Мик калмазырьсэ таркань невтеманть кисэяк зярояк венстема. Визькс...
Мон кодаяк а ойман тынк ёнкстнэсэ Видечиденть кулядот. Валот кемекстамост кис — вана истят ёвтнеминеть минек велень эрямосто. Тон эзик стувто Ульмаень Тумаень? Кеман, эзик. Цёрась ульнесь минденек кавто-колмо иеде покш. Коськана, сэрей, ашназа черь. Эрясть Ульмайть Покш куринкасо. Содасыть, а мезть седе тов ёмавтнемс валт.
...Те ульнесь Тумаень покштянзо ды тетянзо марто. Кудолемест ульнесь сестэ Покшкарень. Прявтось, атясь, аволь эрязатнедель. Котьмаель. «Кенерян! — ульнесь сонзэ вечкевикс меревксэзэ. — Пурьгине а зэрни».
Се иестэнть тундось псиль ды коськель. Кода юртонь азорось эзь капша, видеманзо прядынзе весемеде мейле. «Кенерян...» Тесэ — кияк эзь учне — пиземень аразесь: кизэнь перть петнявкске эзь пра. Велень лисьматне весе коськекшнесть. Сась нуема шкась. Мелявкстнэде — ансяк кенерть. Шабранзо, Ордайть, умаст лангсто эзть тукшно. Псилгалесть чоподасто чоподас. Нусть, сюлмсесть пултт, путнесть сынст копонява — важодсть прянь апак кепсе. Кузи чипаесь тёкшкес, ярсыть-теить — ды таго тевезэст.
Покшкареньгак тетят-цёрат озадо эзть аште. Сыньгак котьмасть. Ялатеке пултост лиятнень коряс седе аламольть — видемань шкась менстезель. Сталмосткак аволь шабратнень кондятольть. А стяко кортави: тундонь чись ие анды. Менстьсак — телесь кувалгады.
Весть Покшкарень шабраст, Ордаень Василь атя, валске чоподава кильдизе лишмензэ ды сыргась Пичепаксяв пултонь усксеме. Ушосонть экшель. Крандазсо озадо аштицянть ёжозо пароль. Теке одонь... Умазонзо апак пачкоде, абунгадсь: копонянзо, ве ёндо редизе, чуролгадсть. Пачканзо ютась а паро ёжо. «Те мезень тюниха?» — яла тензэ превс эзь саеве. Потмургадсь. Кежтнеяк яксезевсть. Аволь васоло — кенерсть само — вачкасть, теке мезеяк [18] арасельгак, тедедень сюпавчист Покшкарень Сыресь атя ды цёразо. Сонсь кирдсь кедьсэнзэ сянго, венстнесь, цёразо улавонть прясо вачкась, аравтнесь, кода эряви, пулттнэнь.
Ордаень Василь пачкодсь лишмесэнзэ уманзо лангс. Эзь маняво — вейке копонязо «коськсь». Теке басом муемс пултонь «костицятнень» мезеяк эзь аште. Крандаз чаронь тешкстнэ невтизь, кона ёндо, кить пачколесть уманзо лангс «лездамо». «Мезе, шабрат, карматано тееме?» — мерсь атясь вачкицятненень ды ютась, лия вал эзь правто, эсь моданзо лангс.
Чокшнестэнть — серьгединзе Василь — пурнавсть велень атятне. Арсесть, мезе теемс салыцятнень марто. Талай арсесть. Веенстнэнь ульнесь мелест сюлмамс кедте сыре салыцянть ды цёранзо крандаз ажия пес: вейкень — вить ёндо, омбоцень — керш пельде. Истя сюлмазь ютавтомс сынст веленть кувалт ды молемань перть кайсемс тенст, кие лиси кудосто, локшосо. Шержейтнень эйстэ седе ламотнень мелест аламнеде лияль: локшосо а паравтомс, тень кис велеванть ютамсто чумонь теицятне кадык верьга вайгельть рангить: «Салыцят! Салыцят!». Пелькстасть-тейсть цитний штапо прятне ды састь ве мельс: теемс истя.
Аволь лембе венть тетят-цёрат ютавтызь панжома экшсэ. Валске марто, ансяк кенерсь ашолгадомо, зярс весе эрицятне кудосольть, кавто атят састь утомонть икелев, косольть полонсо кирдевицятне. Кильдезь лишмесь аноколь. Визькс тевень теицятнень нолдызь, сюлмизь кавто ёнга ажия петнес, кузсь ветицясь крандазс, ды улавось чикор-чикор сыргась куринкань кудотнень икельга. Ниле-вете кудот ютыть, Сыресь атя ды цёразо серьгедить: «Са-а-алыцят! Минь са-а-алыцят!». Ютыть зярояк, таго кавонест текеньрангстасызь: «Са-а-алыцят! Ванодо, са-а-алыцят!». Лиясто рангстыть башка-башка. Цёрань вайгельтне ва-а-асов марявить. Кой-кить — ават, цёрат — лиснесть кузтемпес, невтнесть сурсо, ламот, вайгельтнень марязь, вансть панжадо вальмава. Ульнесть ёност сельгеницяткак. «Кить? Кить?» — марявсть тестэ-тосто кевкстнемат.
Ютызь тетят-цёрат, прянь нолдазь ды седеень киртыця [19] валонть сеерезь, Покшпенть, мельганзо — Штанапенть, Пичепенть, Алопенть... Чикуншка малава окойники менсть визькстэнть — ютавсь весе, марявсь, покштояк покш велесь. Эстесткак эзь кемеве — прядовсь визьксэнь кирдема кувака кист.
Ютась ие, эскельдясь омбоце, ды та-кода апак редя чачсь велесэнть кудонь од лем: Покшкарень таркас — Ульмайть. Орданьбуень кортавкссо «ульмамс» — те аволь ансяк лужалемс лей чиресэ ды кундсемс калт, саламскак. Сыресь атянь нуцьканстэнь кармасть мереме аволь Покшкарень — Ульмаень. Ульмаень Тумай! Вана кода. Паряк, визькстэнть Сыресь атя туекшнеськак эрямостонть шкадо икеле. Сизьгеменьгак тензэ арасельть. Мельганзо та-кода а чарькодевиксстэ тусть тоначив эйкакшонзо, мейле... Тусть-ёмасть Покшкарть, теке арасельтькак велесэнть, нардавсть. .. Лемесь вана — Ульмаень — кадовсь, ды, паряк, якстерьгавтни Тумаень ды сонзэ эйкакшонзо неень шкас. Эли допрок стувтызь те берянь лементь чачоманзо?
Марсить-арась теде? Содылить, мекс Тумайнень мерить Ульмаень? Кода эно... Ужо-ужо! Паряк, теня, а содылитькак. Монень те уликсчинть ёвтнекшнизе Элина патям — тетянь сазорозо. Оно зярдо се саламонь апарось лиснесь! Элина патянь пельде апак маря, монгак аволинь сода.
Ёвтния те уликсэнть текень кувалма: ортнэ-маштницятне, верень валыцятне пиить-палыть Течисэнть, кадык куш тынк ёнкстнэсэ олясто лексить. Теяк — чумонть тейсы вейкесь, визьксчаманть сави кандтнемс лиянень. Кияк а кевкстни, кевкстнемскак мель арась: кие тонавтынзе салыцятнень, невтемга, Сыресень ды цёранзо, саламо, маштницятнень — маштнеме? Мекс вейкесь эри коень коряс, эрявикс лувсо, омбоцесь — колси сынст?
Тесэ коень ванстыцятнень превсэст вейке: седе курок куродомс-пекстамс чумонь теицянть. Тандавтомс сонзэ, ды весень, панжомасо. Ды те виде. Теке марто пекстницятнень превсэ а кирдеви: салыцянь эйкакшось — ули салыцякс, тетявтомо чачтозесь — чачты тетявтомо. Лиякс мерезь, прыця умаресь варманень а салави, пры умарьксэнть алов.
[20] Секс зяроцеде уш теть мерян: видестэ теи Кула Пазонк, превейстэ — Тесэнь пиштякатненень седе паро таркат максни.
Мелеть эзь моле, Вияна? Эзить налкставо? Иля пеняця. Сыре ломантне весе истят: почкоди валкедьгест — а потомдави, а лоткавтовить, анокт дарманост маштомс кулясо вейкест-вейкест каванямс. Чумондомс-арась монь — тонь тевесь. А вана мурнемс, сялдомс, маряви, аламнеде эряван. Вельть уш кучомам, кода тон меревлить, цёрань. Превть-арсемат ламо эйсэнзэ, ёжот — ноль. Каня аванень сёрмалить истят сёрмат? Лисни, Вияна, сёрмалить, бути лия тень эзь сёрмадово. Кармить, кеман, лияткак. Те ушодкс. Сон сеедьстэ эрси, кода кортыть, кургс а саевицякс.
Модамастор, каршо валонь учозь, Учаень Валдай.
1999-це иень якшамковонь 2-це чи.