Тесэ ды тосо (2013)/15
| ←Кемнилееце сёрмась | Тесэ ды тосо (2013) by , edited by Ломшина Л. А. Кеветееце сёрмась |
Кемготовоце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 94—103 |
[94]
| * * * |
| Кеветееце сёрмась |
Модамасторов, Учаень Валдайнень — эрий ошонь эрицянтень
Шумбрат-парт, Валдай ялгинем!
Цяк эзинь киштезеве! Истямо сёрма пельдеть эзь пачколе. Алкукс. Ансяк... вельть уш нурькинель. Те истя мезе мартот теевсь? Кие сёрмадомань толгат мадстизе? Мон? Инжекскак теть иляст сакшно истят мельтне.
Ютазь кучовкссон вал максокшнынь ёвтнемс куломадо икелень эрямодон седе тов. Тонгак текеде уш омбоцеде энялдат. Маряви, тусь мелезэть явовомадонок мейле иень перть эрямодон ёвтнемам, теке басом — кель-валомгак. Те монь кецневти. Сестэ эно поладса валкептерем чамдоманзо седе тов, ловнок.
...Теленть — кода эзь азаргале — полавтызе тундось. Мельганзо чатьмонезь, апак эрязкале панжинзе кенкшензэ кизэсь. Сонензэ, шкантень, ялатеке, мезе седейсэть: пултыця якшамо вармат, латонь кепсиця-салсиця даволт эли кизэнь опаня чить. Сон мезе лангскак а ваны, весемень ланга юты вейкетьстэ. Содасы тевензэ. Кадык кодаткак академият эзь прядо, кадык дипломтомо ды кияк кортамодо эзизе марсе, сон превейтнеде превей.
Весть — те ульнесь медьковсто, виде-паро тикшень ледема шкасто — сундерьгадозь сась тенек, Лемайнень, апак [95] учонь инже, Бульдяень Олдай, сэрей, коськана, цяр вайгель ава. Мельсэть Бульдяйтне? Алопень ушодкссо, Петровкав кинть маласо, эрясть. Мельсэть, кода эно! Олдаень ульнесть кавто цёранзо. Вейкесь минек шкань. Эйстэнек, Лемайде, эрясть Бульдяйть, содат, талаень ютко. Секскак аламнеде абунгадынь: кодамо ковол тенек кандызе те аванть, мезть яки-паки? Совась, тешкстызе-чекизе конянзо ды ютась эряза молевкссэнзэ икелев. Кудосоль од аванокак. Озасть карадо-каршо стувор экшс. Арсинь, Олдай сась мезень кисэяк сонензэ. Секскак, мезде ютксост мольсь кортамось, эзинь кунсоло. Шкамгак арасель — пурнынь-сэрнинь, капшинь ялганень. Мейле маряса: «Минек ули ревень ваныцянок, — марямга, вайгелень кепедезь, прок кунсолыцянзо сядольть, яволявтсь Олдай кудонок келес, — тынк — яркиненк. Эряволь...».
«Ужо, ужо, те мезде истя сынь?» — стявтынь пилень. Кунсолозевинь. Лоткинь сэрнямодояк. «Вай, ды те...» — тешкстыя эськан.
Истя сестэ, медьковонь чокшне, чиявтымизь, ловт, мирденень. Цёрась, Паня, — рицяга рунго Олдаень сазоронзо цёра. Сон ансяк весть-кавксть сакшнось велезэнек. Покш ошсто. Се кизэстэнть, зярдо тон, Валдай, зярс эзить туекшне, зярдо вастневинек, сакшнось гармониянзо марто киштема кужозонок. Вельть мазыйстэ седясь! Кунсолат кунсоловлить. Велесэнть, паряк, буесэнтькак истя кияк эзь машто. Кияк! Мельсэть? Эзик стувто? Мельсэть, Валдай, перьканзо нарамот? Пек уш туекшнесь мелезэть налксемазо. Суронзо мекев-васов чийнезь чийнесть повтнень ланга. Кунсолат — гармониязо нирежди, кувси, мейле тень полавтсы гайтень элякалема, киштеме тердема. Кодат морот васолдонь инжесь ансяк эзь сода! Эрзянь, рузонь, омбо масторонь... Репертуарозо сюпавдо сюпаволь! Сакшнось-эзь юткозонок седе мейле — превсэнь эзь кирдеве. Те ломаненть некшния кавксть. Ансяк. Сестэяк чальть-чульть. Кодаткак кортамот мартонзо арасельть. Эрь вана, истя содазь, састь чиявтомон! Тукшнось-эзь мелезэнь? Вай, авакай, ды кие, кодамо чаула карми монь таркасо менчевеме, турванзо чиртнеме-нолдтнеме? Лиссь ломань — листь! Мезень [96] парось — кадовомс кадалькакс, сыре тейтерекс? Мезень мазысь эрьва чистэ марямс теке моронть: «Мирденень лисить?»? Иень коряс, содат, эзинь пужокшно, капшамс ульнесь а ков. Ансяк...
Од авань марто кадовомаськак «инечинь алт» эзь алтне. Содасак сонзэ. Весе од аватне ве ёнов молить, чачома паксяст вейке. Минектенть а мезть кортамс. Аноколь сазоронь марто ловажанокак порнемс. Ды мезть валт ёмсевтемс, содасак! Сёрмасонгак ёвтнинь. Содан, аволь весть вастневить мартонзо колхозсо важодеманзо кувалт. Содылик «дошузчинзэ».
Кода илязо уле, «яркань вешницянть» кирьгас эзинь каяво, меринь самс таргонь ютазь. Кода эно! Эрявсь куш ланга-верьга содамс ломаненть: кие, косто, кодамо... Иля арсе, лисинь юв-яв, сельмень конязь. Содавикс, вечкевикс цёранень молемаськак тейтерентень аволь медь. Тонсь арсек, ломань кудос соват, эрьва ёндо кор кирдема: аволь истя озыть, аволь истя ютыть, аволь истя мерить... А стяко ве юрсто лиссть «уре» ды «урьва» валтнэ. Монь вана эрямонь яннэм ливтимим допрок лия килангс: совамс, ловт, тунь а содавикс, аволь эсенек велесэ эриця цёрань кудос. Саема чизэнь ризнынь-кавтолдынь: «Кинень молян? Мезе учомЪ икелепеле? Ладятано-арась?». Неть кевкстематне эрясть эйсэнь чинек-венек, эрясть лисема чизэнь. Нежинекс кирдинь менггьсэнь-превсэнь меленть: икеле шкане тейтеренть а кевкстилизьгак, мирденень лисицясь ды урьвакстыцясь вестькак эзть некшнеяк. Секскак... Марсинь тедеяк: шкат ульнесть, урьва сайнесть лавсьсэ нурсевиця цёрынень экшс. Паряк, неть келят-мелят? А? Тон, Валдай, а содат?
Охо-хо-хо... Вейке кажось, марсинь, омбоцевтеме а сакшны. Якить сынь кедте кедьс кундазь. Эсь уцяскадон арсезь, неть валтнэнь аламнеде лиякс ёвтавлинь: кажось кажосто лиси. Видеяк, каня монь пайстомочим чаво таркасто лиссь? Ушодксокс, овсе а кавтолдан, ульнесь од аванок марто стакадояк стака эрямось. Тень эйстэ лиссть лия апаротне. Ютксост — шкадо икеле авакс теевемамгак. Тиринь авань куломадо мейле, ледстяса, тетям куроксто урьвакстсь.
[97] Чиявтызе-ускизе те кежкептеренть омбо велестэ. Шкань ютазь чачтась тейтерне. Седе тов а карман сёрмадомо. Ёвксто парсте ялатеке а ёвтневи, кодат сынь, од аватне, мезе тейнить а эсь эйкакшост марто. Мондень парсте содат. Вирев, видеяк, тетянь эзизе кучне минек ёмавтомо, лисьмаскак эзимизь ёртовто. Сень кис лия «пародонзо» савсь коршамс прядо велькска: а паро валсо сёвномат-тазямот, чавомат, нулгодькс валт, вачодо кадномат... Мезень кис? Сонськак эзь сода. Рангсь, весе велесь марязо, тетянь лангскак. Седеяк азаргадокшнось сонзэ куломадо мейле. Вай, Чипаз-Верепаз, каня ёвтневи, кодамо альбачай ды цёлак ульнесь! Мезекс?
Маряви, сонзэ кежтнеде истя капшазь туиньгак кудостонть, нерьгстыя пиштяка прям а содавикс ашконтень. Ков туят уцяскадот, савсь кор кирдемс. Секскак истя куроксто, удалов апак варштне, ламонь апак арсе, перьгединь чачома пизэстэнь. Кода иля ноцковтне, пайстомо ломантне аволь чумот, эли аволь педе-пес чумот: кежеекс, нузяксокс, симицякс, салыцякс-колыцякс, прянь микшницякс, кенгелицякс, ураекс теить сынст перькаст ломантне, васняяк, малавиксэст — тетяст-аваст. Моньгак истя лиссь. Аволимизь кадояк пиже шкасто аванок, аволь муеяк тетям истямо од ава, истямо гуй... Содави, аволь ансяк «кить-бути», минськак чумот эрсетяно. Монгак... Кие каякшнымим Киринэнь ваксс? Мекс вий эзинь путо магнитэнзэ каршо?
...Таргонь ютазь, таго чокшне, сась цёрась сонсь. «Вана те вастовома», — ютась сестэ пряван, ансяк панжизе кудо кенкшенть ды эскельдясь поровтонть трокс. Сэрьс аволь сэрейне. Келескак аволь кенкшка а кельгицятнень эйстэ. Чова чачо. Содат, Валдай, теке тон! Черензэяк тонь кондят, валдот. Вановтоськак мик... Теке поладыцят сась-совась! Паряк, секс мелезэнь туекшнесь? Кортамонь лувозо вана, мейле чарькодинь, лияль: валт эзь ёмавтне, кортась чуросто, арсезь. Те тон вал мельга зепс эзить эцне. Лангсонзоль, ванстовсь превсэнь, нурька ожа ашо панар. Вана истямоль гармониясо седямосонзо чаравтыцянок: монь ды тонь. Пупоронь вальмало ютавтозь кизэнь се чокшнесь ульнесь та-кодамо лия: [98] седеень витиця, мельс кадовиця. Мазылгавтокшнызе, теекшнизе истямокс, ней монень маряви, Панянь самозо.
Тешкстамонзо кис куроксто ютавтынек чиявтомань кой. Пурнакшнынек стувор. Сакшность Бульдяень Олдай чиявтыцям ды кой-кить сынст буень. Эсенек пельде ульнесть Кастуш сазором, Паксютонь Марюш, явозь кудонь сазором Лемаень Нюта, Черькай Лиза...
Омбоце чистэ шкань апак таргсе пурнынек нуланок-валанок ды — килангов, тов, косо учось эйсэнь покш, веть эрьва кодамо тюсонь валдосо мазылгавтозь ош. Содат мезе, Валдай, мон сестэ васенцеде неинь ламодояк ламо ломанть, маринь, куш пилеть потомдыть, кортамонь шалт, неинь паровоз, поезд! Вай, кода абунгадокшнынь покшолмадонзо! Вагонтнэ неявсть тень пижестэ артозь кшнинь кудынекс. Чих-чих, чих-чих... — кадовсь ледстнемакс стакасто ускомадонть виевдеяк виев машинанть кешнямозо. «Козонь понгинь?! Козонь понгинь?!» — кокнось превсэнь мелесь.
Сынек ошов. Машинатнеде... Ломантне — теке коткудавт! Тей-тов, тей-тов... Кода а велякадыть те эвтемадонть?! Ды весе мекс-бути капшить. Ков? Мезест стувтызь? Кинь бажить сасамс? Сынь мезе — а важодить? Скалонть тенст потявтомс а эряви? Мекс турваст а мизолдыть, мекс кежень сулей чамасост?
А сэрест кудотнень, сэрест — онстонгак истят эзинь некшне! Вальмаст а лововитькак!
Эрьва кува толт цивтёрдыть. Ветькак валдо! Эрьва ужосо — лавка. Мезе ансяк эйсэст а микшневи! Рамак мезе мелезэть туи.
Эринек Паня мирдень марто аванзо кедьсэ. Содат, Валдай, прок аволь ававтонь — авань кедьсэ эринь. Од авадон мейле мартонзо вастовомась невтизе, кодамо тиринь авась. А верьга вайгель, а чирьстэ ёвтазь вал, а коня алга вановт. Валтомо чарькодилинек вейкенек-вейкенек. Истят мельтькак сакшность: прок сон чачтыцямгак ульнесь, мондень эль сэрей, човине, чевте вайгель те авась.
Тевенек мольсть валаня киява. Кодаткак ацирьгалемат, [99] ордалемат, пензамот ютксонок эзть верьгеле. Мирдем, Паня, меремс, а берянель. Содат, Валдай, обуцясонзояк мезе-бути тонь эйстэ ульнесь: чевте седей, важов, аволь каштан. «Ну, кода чись ютась, мезе одось?» — ушодыль чокшнень ярсамодо мейле залс ютамсто. Калякилинек-теилинек, ды мадеме. Удсилинек эсенек нупальсэ. Кодаткак аёнчить эзть лисне. Оймсема чистэ чоп вейсэлинек: кудоютконь тевть, теде башка, кинов-ков яксилинек, базарга-кува. Чись ютыль — а марявильгак. Истятнэнь марто, Валдай, шожда эрямс.
Ансяк истя ульнесь а кувать — иешка. Марявсь сон тень панжиков шкань нурькине, коввалдодо пешксе, цёковонь мородо гайгиця векс — лип, ды мадсь. Прядовсь. Весе. Тонсь содат, те ковонть вензэ нурькинеть. Секень вант, свал истя эрси: вельть парось куватень шкас а таргавкшны, гувк кирвази ды сеске мади.
Мейле... Вай, ледстнемстэяк а паро ёжо кундатанзат! Бульчом, беряньстэ ушодыцясь парос а пачколи. Чиемстэяк, кортыть, изни васень эскельксэнь седе ёнсто теицясь. Паряк, лиякскак эрси, а содан. Монь вана лиссь те меревксэнть коряс. Байгинень пес.
Зяро эзинек эря, эзинь пекия. Яла кеминь. Весе эрямось кемемасто ашти. Кода сонтемензэ? А кемтяно вейкентень — куломантень, превсэнекак сонзэ а кирдтяно. Секс яла учинь. Учинь, зярдо сюлмави, зярдо пургонды потсон од эрямо. «Ужо, ужо, шкадо икеле пря иля чаво, ламот мик зярыя иень ютазь начтнить», — оймавтнинь эсь прям. Ков, омбоце, ие малава... Стяко. Мезе учинь, тень эзь учово. Молинь, эскельдинь визьксэнть трокс, авань кевкстнемкудос. Тосо «кецневтимизь» истямо валсо: эйкакшот, келя, зярдояк а ули. Марязденть канжамон сорнозевсть, нолажтынь чопода, кельме отьмас. Те кода, кода истя — а марямс мештезэть лекшкадозь эйдинеть лексеманзо? Вай, Валдай, мезекс мон тень ёвтнян! Тон цёрат. Тонеть тень а чарькодемс. Маряви тень, маштомс аравтозтне истя а ризныть маштомадост яволявтомадонть, кода мон сестэ. Седеем палозь палсь. Якинь, кортнинь ломантнень марто прок онстон — валт маринь, [100] смустест эзинь чарькоде. Ёвтнян, ёвтнян теть, Валдай... Мезекс? Каня лия ломанень сэредьксэсь, мик пеень эли пилень, сэредьксэкс маряви? Содазь, а маряви, тень кис ёвтницянть ёжозо седе шождалгады. Секс теть сёрмадангак.
Весть Паня сась важодемстэ «токазь». Редикскак эзинь тее. Мезть а эрсить эрямосонть. Паряк, умонь ялганзо марто вастовсь, покш тев кодамояк тейсть, паряк, лия тувтал ульнесь. Иезэнзэ весть. Ней мезе, черть раздемс? Аволь кодамояк тосо кажось...
Омбоце чистэнть седейпелькскем пачкодсь, куш мель путсь пря а невтемс, чиремкшнезь. Кельденть а мезть кортамскак: понгонесь, пенгедсь мезть понгсь. Сеедьстэ менькшнесь кельпрястонзо «вечктян» валось. Арсезевинь. Совась мештезэнь кельме ёжо. Кевкстемкудов якамодон, тосо марязь ризнэвтиця валтнэде эзинь ёвтне. Лисни, тевесь аволь монь эйсэль. Мейсэль? Эно мезде ушодсь азаргадозь симеме? Мезде истя апак учо полавтовсь ломанем?
Сась Паням пильге лангсо беряньстэ аштицякс колмоцеде, нилецеде... Ох, авакай-сиякай... Кодамо, кодамо валаня эй лангс чалгавсь?! Кодамо наркоть орма педясь эйзэнзэ? Чипаз, паряк, Тон лездат менстемс эйстэнзэ?
Арась, Пазонтень энялдоман эзть лезда.
Ней, ламо-ламо иень ютазь, Тоначисэ эрязь, эсь прямгак чумокс лован. Эряволь, зярдо васенцеде сась копордазь, меремс тензэ казямо, седейс пачкодиця вайгельсэ: «Ваксозон иля эце! Эли мон, эли палыведесь. Ансяк истя!». Секень вант, тевенек лия чудильмава туевельть. Мон... А стяко кортыть: кодамо нись — истямо мирдесь. Видеть валтнэ, мезеяк а мерят.
Вана истя, малавикскем, прядовсть мельспаросо-кольнемасо эрямонь чинь. Таго ушодовсть сод чопода веть. Симемат, тюремат, певтеме покордамот, визькс валт. Прок превстэ лиссь, теке ормаза тикшеде андызь Паням. Аволь чи, кивчк шкаяк эзь кирдеве апак тазя, апак покоря. Сёвнома валдонзо лиснинь квартирастонтькак. Аволь чуросто сакшнось пелеведе мейле, чис-кавтоскак ёмсесь. Сыль ды дюм вензэ лангс апак вано кепедиль булга: зэрь, цяр, [101] тоц... — марявиль этажтнева. Шабратнень пельде, верде-алдо, — трубатнева: гай-гай-гай... Ве, удовольть ломантне, тесэ оно мезе моли.
«Каня алкукс, — арсян лиясто, — цидярдынь натой кавто иеть? Эстеньгак а кемеви». Меельцьпелев Паню допрок нолдызе прянзо: берякадсь, чамазо сормсевсь, сакалонзо-черензэ кассть, эзь шлякшнояк. Жаль тень марявсь.
Мезе теевсь цёранть марто? Сеске тень эзь чарькодевкшне. Косто, одолинь. Тувталось, ней тень маряви, лангсоль. Неяволь сельмень конязьгак. Авазо Панянь «муекшнизе». Цёразо — «вечкемань эйкакшоль». Кастсь-трясь эйсэнзэ кольневтезь, пельсь лексемскак лангозонзо, топавтсь эйдиненть эрьва бигельдеманзо. Кассь покольнезэ анелькайдеяк анелькайкс. Кода илязо уле, авазо макссь тензэ содамочить. Тонавтызе. Школадо мейле прядокшнось техникум. Теде башка, Пазось максокшнось цёрынентень марий пилеть. Сонсь тонадсь седямо музыкань эрьва кодамо инструментсэ. Эзик стувто аштемкужосонок гармониясо налксеманзо? Се чокшнесь каня стувтови!
Панянь авазо палыведенть чинензэяк эзь кирде, цёразо вана... Косто муизе педий те орманть, сонськак эзь сода. Марявсь, а кона ёндо. Кие соды, паряк, чумоль тетязо, конань Паня вестькак эзизе некшне. Кодамоль сон, те тетясь, Тая ававтом вестькак эзь ледстне. Кевкстемась, кода лисемс домка латкостонть, содавтнизе сеедьстэ. Сон истя арсекшнизе авань превсэнзэ: муи эсест велестэ эрзянь тейтерь, урьвакстсы цёранзо, ды тона карми эрямо паро эрямосо, кардави зыянонь кандый тевденть. Истя теекшнеськак. Сакшнось минек велев, вастневсь эсь буень ломанензэ марто, ды муимизь монь. Васень шкастонть, мерема, весемесь мольсь арсевксэнзэ коряс, мейле...
Васня кулось — видьстэ ёвтаса, цёразо куловтызе — Тая ававтом. Модась тензэ улезэ чевте таркакс. Кулось, ловт, од ломанькс. Ниленьгементнень трокс эскельдякшнось. Ансяк. Пароль авась. Сэтьме обуцяль, ванькс оймель. Эрямс ды эрямс эряволь! А берянь квартира, цёра, урьва... Мезе, теде башка, эряви ломанентень? Арась, эзь саво. Мейле [102] мезе, од шкастонзо «муекшнесь» эйде? Эзизе кадо. Эзизе кандо урозонь кудос. Тризе-кастызе. Тонавтызе. Ялатеке совсить-валгонить превезэнь мельтне: умонь шкань ильведьксэсь, од шкасто а истя чалгавксось, кода а кода «лездась» авантень шкадо икеле туемс калмазырев. Таго сави ледстямс: беряньстэ ушодыцясь парос чуросто пачколи.
Кадовинек Паня марто кавонек. Лемезэ... эринек. Сеедьстэ савкшнось удсемс шабратнень кедьсэ. Пелинь, зыян кодамояк илязо тее. Истямонть пельде учнек эрьва мезть. Весемеде пек пелинь паломадо. Квартирасонок кадовкшность ансяк стенат. Весементь, мезесь маштовсь симемс, симизе.
Истя мольсь иешка. Куроксто пурнызе-сэрнизе Пазось — идизе пельскулозь эрямодонть. Лездасть Тов ильтемс важодема таркастонзо. Мелявкстнэдельть... Сюконян. Ськамон аволинь сода, мезе теемс. Виень авольть сато. Ну, те уш лия кортамо. Эрдекстамс нарьгамонзо кис? А арсянгак. Истякак эрдекстазель-сюдозель. Уцясказо тень теизе. Менчесь, яжась-янгась эйсэнзэ кода маштсь. Секскак арсекшнинь тензэ текень: чевте алкст-велькст, паро эрямо Тоначисэ. Тешкстаса теке басом: тесэ мартонзо эзинь вастневе. Седе паро а вастневемскак. Ледстнемскак пелян пиций-пупий эрямонь се лехадонть.
Кадовинь квартирантень, ниле чаво стенатнень юткс, ськамон. Паро, сынь сёрмадозельть монь лемс. Кенярдан, шкастонзо яксевтекшния аволь шожда мелявксонть. А стяко пилыть чавинь. Кода, косто совакшнось прязон те мелесь?
Истя прядовсь мирде марто коень-закононь коряс эрямом. Бути истямонть, седеяк — омбоце пельксэнзэ, ловомс эрямокс... Мон а лован. Кода, а чарькодеви тень, ламот аватнестэ пинге эрить симиця марто?
Эль-эль эскельдякшнынь комсь иетнень трокс.
Ков молемс, мезе теемс, кинень пшкадемс?
Тон яла кевкстнить, мекс ванстома тейтерьксчинть. Превс путыть валон, чапить сынст ды совавтыть пряудемезэть: тейсак васень эскелькссэть чирьстэ, эрямоткак карми молеме чиремкшнезь.
...Велев сеедьстэ якат? Кода тосо? Кудонок икеле [103] килеесь таркасонзо? Калесь, чудикерькс чиресэ сыре калесь, эрий? Латокс ульнесь алганзо чольдердиця чудикерькскентень, ванстыцякс. Мельсэнзэ Киринэнь сэпей-чапамо валдонзо лайшема чокшнем? Монень маряви, умок уш коськсь. Сестэяк аволь одоль. Шка муят, варштак.
Понгиндерят куроксто кудо ёнов, тейть, энялдан, вана мезе. Мольть пиресэнек касыця ламаренть содавтомо. Бути эзизь керя, бути эзь коське, сюконяк тензэ монь пельде. Эрямонь пинге, ловт, ютась. Ломанень. Сонзэ, чувтонть, пингезэ минекшка. Бути сявордызь иень варматне ды таркасонзо раськси тейтерезэ, комавтык прят икелензэ. Ёвтак тензэ пельдень валдо арсемат, мерть: «Ават, од ламарь, умок-умок, тунда, ашосо оршнема шкастонзо, валскень зорянь лазовомс кунсолокшнось вечкиця кавто седеень чоледемат ды цёковонь морот». Мольть, иляк стувто. Кутмордык, теке монь зярдо-бути, чувтонок. Сакшны икелеть панжиковонь ашо палязо? Онстот а некшнесак? Сонзэ кондямо ашоль эсень лаштоськак. Мельсэть? Вай, Ине Шка, куш ве минутас понгомс тов, Пазонь казевть се вентень, ашосо копачазь ламаренть алов, весть-кавксть лекстямс иредстиця кошттонзо. Мельсэть, ялгинем, пешксе ковонть мекс-бути нусманя вановтозо?
Ламо иеть теть эрямс, Валдай.
Иля капша. Эряк тундонь кенярксто пешксе неень таркасот. Тесэ, дугай, сундерькс чопода те Масторсонть, зяроцеде уш мерян, улят.
Тонь свал-свал ледстницят Вияна.
Тоначи.
Поладкс. Содан, ней тынк тосо ламартне морыть ашо морот. А кадновить эйстэст сиянь кирьгапарь цёковтне. Седеяк мазыйстэ, содан, гайгить вайгелест пешксе ковонь валдосо артозь ветнестэ.
Секскак — кармавтан омбоцеде — кучан эйсэть минек чувтонть варштамо, тензэ сюконямо, чевте валонь ёвтамо.