Тесэ ды тосо (2013)/13
| ←Кемгавтовоце сёрмась | Тесэ ды тосо (2013) by , edited by Ломшина Л. А. Кемголмовоце сёрмась |
Кемнилееце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 84—90 |
[84]
| * * * |
| Кемголмовоце сёрмась |
Модалангов, Учаень Валдайнень — икелень велень эрицянтень
Шумбрачи теть, умонь оинем!
Эзия стувто «прявт кевкстемат», эзия. Тон энялдыть ёвтнемс, мезес пачтьсы тейтеренть шкадо икеле тейтерьксчинь ёмавтомась. Энялдыть, теде башка, сёрмадомс эсень эйстэ, явовомадонок мейле эсь эрямодон.
Мон истя арсян: эсь эрямодон ёвтнемась эсензэкс карми каршо валокс вельть пшти, седеень томбиця васень кевкстемат лангскак.
Ловнок. Кунсолок.
Тон уш сёрмалить ловсо ацазь, аволь шканзо коряс лембе, ёжонь колыця сундерьковонь се чокшнеденть. Монень а мезе поладомс. Ялатеке кой-мезде ёвтнян. Видестэ теть пачтякшнось Цянтаронь Вечкай. Сёксень пор ашо се вестэнть якинек васень ловсо копачазь велеванть аволь кавонек. Мартонок яксесь Киринэнь пельде сюлмавкскесь. Тон теде а содылить. Эзить сода майсемадон, седеем чачк керсиця ризкстэнь, куш кой-мезе редякшнытькак.
[85] Монень маряви, превезэть аволь весть совсесь кевкстемась: кода лавшочим лангс вансь, кода ветясь прянзо сонсь чумонь теицясь — Кирин? Янксесь-эзь теезденть?
Седе вадряль сондензэ тень чатьмонемс, а кепсемс бутратнень, а колсемс сэрькстамом-ёжом. Ды бути уш кирдевсь те превсэть, топавтса мелеть, ков эйстэть туят. Ёвтнемскак ламо а мезть.
Зярыя чинь ютазь чарькодия: Кириннэнь седе пек эрявсь... тонсь содат. Вейкеде алясь мелявтсь. Лия тен:э, пачкодсь тень шкадо мейле, мезеяк эзь эряво. Манимим. Эзимим вечке, ансяк пря невтнесь, налксесь. Вастовинь мартонзо самодот таргошкадо икеле чокшнеланга минек вальмало. Тердия. Якинь тензэ кудос. Мелезэ самс, сеске чарькодия, арасель. Тувталт вешнесь. Зярдо сась, бажась маласон а кирдевемс. Аламонь-аламонь, пупорькшнезь, кортазевинек. Муинь валтнэнь ютксто ён таркине ды ёвтыя покштояк покш, оймень ченгевтиця мелявксом — видькстынь.
«Кирин, — пшкадинь тензэ виздезь, — содак: тон — тетят, ули эйкакшот». Сон таймазкадсь, сеске эзизе чарькоде, мезде мольсь кортамось. Кургозо пекставсь. «А мезе?» — окойники явовсть турванзо, ды таго чатьмонезевсь, теке мерят сускизе келензэ. Монень маряви, лоткакшнось лексемадояк. Зярс каштмольсь — а содан. Шкась теке лоткакшнось. Тук-тук-тук... — учось седеем, мезе ёвты каршон аштиця сэрей, монь коряс палманьшка, лангс ваномс виев ломанесь. Окойники панжовсь кургозо, мерсь: «Ки соды мезть лабордат!» — риштимим валсонзо. Марявсь тень, таргамодонть аламнеде кижныця вайгелензэ марясы весе велесь. «Мы-мы-мы...» — каятотсь седе тов.
Тармазкадынь. Келем кундатотсь. Новолинь кузтемпень эземнентень. Сынь ёжос, яла тень эзь кемеве марязентень. Талакадоманть полавтызь кежть. Ёлк стинь. Стинь ды весе вийсэнь гамадия каршон аштицянть чама ланга, теке басом увсо лайшезевинь.
«Вый», — каятотсь Киринэнь вайгелезэ.
Лия мезеяк эзинь маря, эзинь учояк. Эрязасто велявтынь [86] кутьмере ёндо ды панжия кузтемпень кенкшенть; кудыкельга лисинь кардазов ды тосто састо-састо ютынь янганть пиренек пева чольдердезь чудиця лейненть чирес. Седеем пешксель ризкстэ, теке сэвезь сэвсь эйсэнзэ а ёвтавикс орма. Ялатеке косо-бути васоло потсон типельдсь кемемань кондямо: сон, лейнесь, кунсолосамам, оймавтсамам, путсамам превс ды апарось поты. Ютынь чиреванзо янганть аламодо верев. Лоткинь. Озынь, муинь седе коське таркине, сыредеяк сыре, эчке каленть алов. Шоль-шоль-шоль... — марявсь чоподасонть, морась сиякс жойниця морынензэ оймсемань а содыця, чинек-венек ков-бути капшиця керькскес^ морась сэтьместэ, седеень марязь. «Куш тон иля разде оймем, вечкевикскем! — зярыяксть пшкалинь тензэ эсь пачкан. — Улевлитькак седе келей-домка, улевлитькак покш ведь леекс, апак кавтолдо чопавтовлинь, празь правлинь эйзэть. Мезекс ней тень те эрямось? Кода карман ваномо ломантнень сельмс?»
Сельведень лосьсэ чудсть. Эрьва кодат мельть-арсемат велясть превсэнь, ульнинь анок весемеде а паронтень — туемс эрямостонть.
Аштинь ризксэм-мелявксом марто кельмемазон.
...Ютась шка. Ковгак эзинь тееве. Килькш кирьгазон эзинь кая. Анксемаскак, теленть сазь, прям эзия нерьгста. Пазось мерсь тень кадовомс эрицякс. Шкантень, васняяк, сюконян. Чи, мельганзо омбоце, колмоце, ды аламонь-аламонь карминь превс-ёжос само. Седе валдо суликань пачк весемесь кармась неявомо. А стяко кортыть: шкась мендязь кшнияк видемтни, ормаяк менстни.
Стакамс стакаль... Киньгак неемс мелем арасель. Кемемань сяткинесь, кадык лавшинельгак, потсон ялатеке эзь мадне: а кадсамам, сы, сы, сайсамам Кирин, истямо кажосо а кадсамам... Те кода истя? Кодамо чумочи теинь тензэ?
Арась, монь арсематнень коряс тевесь эзь сырга. Кемемань штатолнэнть валдозо лавшомгадсь чистэ чис. Матрась. Кирин эзь пачкоде, эзь са, кода эрсесь икеле, вальманок алов. Эзия маря вальмакундос шалтадеманзо. Эрясть, кода содат, Пичайть эйстэнек а васоло. Ловт, ушкс [87] шабранок. Весть вастовинь мартонзо чинь куншкат, лавкав молелинь. Варштась Кирин «вечкемам» лангозон прянь нолдазь ды та-кода пеень пачк, чирьстэ мизолдозь. Сон тусь эсензэ киява, мон — эсень. Аноколинь туемс мода алов. Течинь чис сардокс ашти седейсэнь покордамонь се мизолксось.
Тундовтомо кизэсь а учови. Эзь учово монь учомамгак.
Окойники чарькодия, кодамоль ломанесь Кирин. Аволь ломань — раужо нулгодькс ойме!
Эсенек велень, натой Эринекак ве песэ. Пичайтне лововсть велесэнть аволь берянекс. Тевень вечкицят, урядонь ды валонь кирдицят. Кирингак прок аволь лавгакайтнедель. Кода а кемемс? Кемемс кемть, ансяк аволь потмаксос! — чарькодия шкань ютазь: куш кенжинешка таркине ды кадома кавтолдомантень. Марят, Валдай, кодамо превеян-ёжован шкадо мейле? Эряволь истя, эряволь лиякс... Удалов ванозь, превтнесэ шождыне почолемс. Сестэ вана, зярдо тень кемгавксовольть, зярдо ансяк-ансяк совакшнынь Покшонь Масторс, ванынь ломантнень лангс лия, кемицянь сельмесэ. Весе тень неявсть видечисэ эрицякс. Секс лисськак мартон зыянось.
Саты, а?
Ужо. Ушодозенть — прядома. Пельстеезь тевде берянь, кортыть, мезеяк арась. Монгак истя арсян. Тень кувалма та-кие ине превейтнеде истя мерекшнесь: «Ушодксось — весементь пеледензэ ламо».
Поладса эно ёвтнемам. Кунсолок.
Ёжом а пароль. Рунгозон прок пеельсэ шоркаесть, седеем човсезь човсевсь. Сась шка — сэредьксэсь лавшомгадсь, теке стувтовсь. Эзинь арсеяк: стакачитне, майсематне кармить седе тов. Минь кода, яла вадрядо арсетяно, кемтяно парос. Лисни... Васень шкастонть, теке мезеяк арасельгак, якинь ялган марто клубов. Мейле лиялинек сиведезь кудос. Ялгадон мейсэяк эзинь явово: киштинь, морынь, пеедькшнинь. Од тейтерь... Кие содась, мон уш омбоце ков аволь «одан», кие содась, кие маризе морамсто лайшиця вайгелень. Морынь, а седеем палозь палсь. Редизь ялган [88] лиянть: Кирин прок ведьс ваясь, клубто мейле морамонь-киштемань аштемкудозонок эзь сакшно. Те сельме вакска эзь юта, редизь сеске. Мекс — теде содынек ансяк кавонек: сон ды мон. Эзь сода сехте малавикс ялгамгак, Паксютонь Марюш.
Зярс кавонек...
Састь читне, ды кекшнемам лиссь лангс. Весемеде пек пелинь банятнеде. Тосо аватнеде а кекшеват. Сеске редявлимизь. Васня бажинь якамо весемеде мейле, ськамон. Мукшнынь эрьва кодат тувталт: псиде пелян, иредян, ськамон вечкан...
Да, оно мезе! Тон эзик стувто каникулас самстот Од иень чокшнестэнть чульть-чальть вастовоманок? Эртевкшнинек сэдь лангсо. Тон тень сестэ пшкадить: «Вияна, тон?». «Мон, мон, Валдай!» — меринь теть. Тон ювк туить эсеть киява, мон — эсень. Теке кавто сулейть. Сестэ уш, монень маряви, редякшнык эчкелгадомам. Редякшнык, а? Пазонть пельде максозь иетнестэ те шкась эрямосон ульнесь весемеде казямокс: визьксэсь, ризкстнэ, янксематне чополгавтсть эрьва чинть. Пекем кекшнемга каркснинь перькан келей каркА нолдтнинь ланганзо шаль пе. Васня лездась, мейле...
Ве ёндонсетне, ялган-кить, несть-эзть — чатьмонсть, сельмес чувар эзть ёртне. Кортасть, содазь, удалга. Сень кис од авам... Сеске редизе — кандтнян... Вай, седе вадряль теде а ёвтнемскак! Кода ансяк эзь човоря, эзь пенза эйсэнь, кодат ансяк нулгодькс валт эзь ёвта. Весемеде «шождакс» ловсь «усксевиця», «цёрань кенде», «моргонь вечкиця» валтнэнь. Снартнесь кудоскак а нолдтнемень. Зяро сельведть валынь...
Шкась тень лангс эзь вано, таркасонзо эзь аште. Кода улемс? Мезе теемс? Чачтомс? Эли...
Неят, марят, мезес пачти се, мезде кевкстнить?
Ламот, Валдай, монь кондятнэде прянь ёмавтомаскак пачколить. Оймень костиця майсематнень пачк ютазь, шкадо икеле сакшныть Тоначинь Масторов. Моньгак аволь весть содавтнимизь истят мельтне. Содавлитькак, тагояк мерян, зяро эрдекстамонь-пензамонь валт маринь, кода [89] ды кить ансяк эзть лопавтне эйсэнь! Од авадон башкаяк мукшновсть истят. Мезень кис? Вай, теке а содан...
Тетянь ёндо малавиксэнк, Дандаень Матря, аволь пек сыре ава, превс путымим: эйкакшонть каявтомс. Келя, кикс туи, кодамо киява сырги тетявтомо чачтозесь? Карми-арась «муезенть» чанстезэ? Кие эйкакш марто сайтянзат никс? Кинень эряват? Эстетькак, мерсь тень авась, сави пиемс-паломс: касы «муевкскесь», карми кевкстнеме, кие тетязо, косо, кода лемезэ. Истят валткак маринь Матрянь пельде: вейкине эйкакш — а эйкакш.
Каявтомс... Меремс шождыне. Арась, а карман теде. Эрьвань Пазось ванозо! А карман, виень а сатыть...
Содат, Валдай, пек уш а янксян — кунсолыя Матря патянь. Эйкакшонть, пежетьс прынь, ёмавтыя. Тонсь содат, истят тевтне сестэ тейневсть салава — кудосо, банясо; аволь кода ней — чачтома кудосо. Каявтыцятнеяк ульнесть аволь врачт. Вай, седе вадря а ёвтнемскак! Зяро визькс кирдинь, зяро рудазов ведь валовсь ланган!
Шождалгавтыя рунгом. Таго теевинь ялган юткс лисницякс. Зярдояк а стувтса Паксютонь Марюшонь. Мейле уш видькстакшнынь тензэ. Алкуксонь ялгакс тень ульнесь. Сон лездась тень изнямс стакачитнень; лездась аволь ансяк валсо, тевсэяк. (Неиндерясак велев понгомстот, — сюконяк тензэ.) Ялатеке маринь эсь прям пильге алов понгонезь, модердязь чахрынекс. Цёратнень пельде савкшнось марсемс кургонь чиремтезь ёвтазь кельме, мик «сускиця» валткак. Ды аволь ансяк валт, нокасть, нарьгазь-пеедькшнезь, кутмордамс, автордамс, эцемс косояк чопода таркинесэ а меревикс таркас. Седейсэ маринь: ловсть монь аволь ансяк омбоце сортонь тейтерекс — омбоце сортонь ломанекс.
Содасть визьксчамадон, кода эзинь кекшне, ламот. Бути аволь весе велесь. Те теть аволь ош. Тонсь содат. Тесэ мезеяк а кекшат. Кулятне срадыть, кода кортыть, кальде кальс, каль тарадс, верев — менельс. Зепс сынст а путсыть. Панжома экшскак а пекстасыть.
Читне полавтнесть читнень. Ютась эрямосон, паряк, весемеде чопода, пиземетнеде нолажа сёксесь, мельганзо — [90] тарькс якшамо телесь. Сась тундось. Важодинь, кода тонь пингстэяк, колхозонь фермасо, уряд кирдинь кудосо. Од авам мель эзь путо ваньксчинь кирдемантень. Нузяксчизэ чачсь эседензэ икеле. Чокшне ланга, тевтнеде мейле, — клубов, тосто — аштема-морамо таркав. Пурнавкшнынек, кода тонь пингстэяк, Пупоронь вальмалов. Морсинек неке моротнень. Кирдть мельсэть — тень кевейксэель, тонеть — иеде ламоль! Тон сестэ ульнить уш васоло, тонавтнить машинань урномадо, ломанень вайгельде шалныця покш ошсо... Кинь кирдьсак зняро иесэ кудосо пекстазь? Тондеть кортамскак а мезть.
Течис, дугай, саты. Сизинь. Оно зяро «викшнинь-кемельдинь», тоньгак, маряви, икельдитинь. Тон арсят, минь, электронсто-нейтронсто аштиця сувнетне, а сизетяно? Э-э-э... Миньгак стомавтано. Натой псилгадат! Содак, Валдай, минек эйсэяк ули мезе-бути Модалангонь. Эрьванень эряви оймсемс. Ну, тон прят иляк нолда. Сы сёрмасо поладса ёвтнемам. Туи? Эх, да! Оно мезе! Мекс тон эсь эрямодот а куш а каш? Теке чаво кудосо ськамот эриця. Тешкстак куш зярояк.
Вант, кунсоломак: кецнек, эскеляк моразь, сайть, амоляк эрямостонть мазыенть, пародояк паронть апак кавтолдо. Тесэ, ялгинем...
Содан, ней тынк Масторсо сёксесь кирвазтни виртнева укшторонь толпандят, чувтотне мадемадо икеле кайсить лангстост ожо, васолдо неявикс оршамопелест. Теде тумотнень, пекшетнень, сирттнень... юткс сови валдо. Свал кирдть мельсэть, зярс чави седееть: берянесь вадрявтомо а эрси.
Васень вечкемат Вияна. Тоначи, Пельсчопода Мастор.