Тесэ ды тосо (2013)/11
| ←Кеменце сёрмась | Тесэ ды тосо (2013) by , edited by Ломшина Л. А. Кевейкееце сёрмась |
Кемгавтовоце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 68—74 |
[68]
| * * * |
| Кевейкееце сёрмась |
Модамасторов, Учаень Валдайнень, моронь вечкицянтень
Шумбрачи теть, умонь ялгинем!
Содат мезе, Валдай, тон, улема, — нолдык чумом — допрок веляськадыть: истят кевкстнемат тень макснят! Кодат пелькстамот, кодат фестивальть?! Каня а содат, кодат минь Тесэ «морыцятне»? Текеть «киштицятнеяк». Сэнь — ловнок седе тов — сув пакшкеть... Мезе пельденек учомс? Теяк: допрок, маряви, стувтык, кодаман мон «академикесь». Косто, кода тень, авань чарьксчисэнь, изнямс валонь тапарксот? Чемердят вельть уш превейстэ! Секень вант, пряудеметь эзнестэ лиси. Эли човоргадыть? Арась, арась, прядык те тевенть, сёрмадт седе нурькинестэ ды чарькодевиксстэ.
Теке марто...
Содат мезе, улевлиньгак мода ланга якицякс, сюконявлинь теть модас. Мезень кис? Окойники маринь Паксютонь Марюшто! Сюк-сюк. Топавтык мелем. Кемат, зяро тесэ аштян, кулине пельдензэ эзь пачколе. Ней на вана, окойники карминь содамо. Лисни, сонзэяк эрямозо аволь ламбамотнедель. Сонензэяк ламо мезень пачк савсь ютамс, эрямонь пивсэмась аволь аламо равтсь эйсэнзэ. О-хо-хо... Кить эно, косот, кува якить-пакить «пивсэмань» а содыцятне, парсте, пеедькшнезь эрицятне? Теяк... Мезе истямось — парсте, паро эрямось? Мейсэ онкстневи? Вакссо, сэльсэ, килосо, чисэ, иесэ?.. Мертяно, сядо иеде икеле сядоксть берянель эрямось — а кши, а ловсо, а сывель арасель. Ней весемесь те ули. Ялатеке марят текень: беряньстэ эрятано. Истя мерезь, эрьвась невтни сурсонзо омбо мастортнэнь пелев. Тосо, келя...
Мезе, алкукскак, те истямось — берянесь ды вадрясь? Кияк ёвтасы?
[69] Омбоцеде анокан икелеть пульзямс: совавтнимик умонь шкань моронь-киштемань программазонок. Сакшнынь, марявсь, аштемкужос. Сёрмат ловномсто, ды мейлеяк, ульнинь ялгань ютксо, тонь вакссо, седейшкава морынь ды кортнинь весемеде малавикс Паксютонь Марюш марто. Лиснесь-сакшнось икелень Пупоронь вальмалксост. Ковонь вановтсо валдомтозь латотне. Вайгельтне, вайгельтне! Нейгак гайгить, кадык эль марявиксстэ, эйсэнь. Сюкпря, Валдай!
Тон Течинь эрямодо, эседеть седе ламо ёвтнят, мон — Тоначиде. Истя улезэяк. Эно кода лиякс?
...Сэрень-эчкень коряс минь, Тоначинь эрицятне, куломадо икелень коряс ков седе вишкинетяно. Иень-кавтонь эйдинешкатанок. Ялатеке эрьвань эсензэ сэрезэ, эсензэ эчкезэ. Сталмонок? Ловт, мезеяк арась. Граммадо ламоксть аламо. Рунгонок — сэняжа сув; цивтёрдоволь, теке ловтештинеть, улевельгак тесэнь менельсэнек чипай. Шкань-шкань, кежиявтнемстэ эли кецнемстэ, марсеви эйстэнек лавшо, эль марявикс кашторкске. Теде содат: эрьва сёрмам теть пачколи истямо «кортавкске» марто. Истя? Ули-арась келенек? М-хы! Кодат кельть! Минек пельде гайть а марят. А тон морамодо кевкстнят! Машттано ансяк кунсоломо. Машттано. Те виде. А лезэсь мезень, бути весе кельтеметь!
Оршамопельть, содазь, лангсонок арасть. Сынь а эрявитькак. Кекшемс-копачамс тенек а мезе. Визькс тарканок арасть. Мезенекак парсте а неяви: а пилыть, а пря, а... Неявтано, ды истямокс ультянояк, тей-тов якиця-эвтиця чопачинекс. Якатано аволь эскелязь. Тонсь содат, эскелямо пильгевтеме кодаяк а кармат. Минь, ашназа-сэнь сув пакшкеть, полавтнетяно тарканок уйкшнезь, теке алга ливтнезь. Чатьмонезь, а марят кашторкскеяк. Тесэ, омбоцеде ледстяса, певтеме, буень а содыця кашт. Озамот-мадемат а содатано. Свал, свал стядо. Стядо удотанояк. Чувто пряскак а кузнетяно, кода тынк нармунтне.
Удотано? Истя-истя! Ули мезе-бути тень кондямо. Валсо а ёвтави. А вана ярсамодо-симемадо иля ледстнеяк, Тоначисэ теде а содыть.
[70] Эйстэнек тесэ, Кулозень Масторсо, ламодояк ламо. Зяро — кияк а соды. Куш кодамо компьютер иля кармавто, тензэ а лововтано. Аволь кода тынк тосо, сёрмалемань-тешкстнемань шкасто цётс саеви эрьва прясь. Эрятано, дугай, прок певтеме, келейдеяк келей покш ошсо, эвттяно, каштмолезь, эсенек юткова, мерят коткудавт. Секскак вастовомс тей, а прядовиця эрямос, сыця содавиксэть марто летекшни пек чуросто — те теке муемс видьмень покштояк покш оровтсто сэньстэ эли якстерестэ тешкстазь видьминенть. Паряк, седеяк стака.
Тесэ улемам перть, тень лангс апак вано, вастневинь — кемат? — чачтыцям, тиринь авань марто. Сонзэ нуемстэ чавокшнызе — содат, ёвтнекшнинь теть — пурьгине. Куломадонзо а весть ёвтнекшнесь тетям. Иень сестэ ветешкаяк арасельть. Секскак чачозо мельсэнь эзь кирдеве. Кода содыя? Сон монь содымим. Кода? Те тонеть а чарькодеви. Лездась, арсян, сонсь Тоначинь Кула Пазось. Сонтемензэ, кеман, тенень зярдояк а улемаль. Содан вейкеде: Тесэнь эрицятнестэ эрьвань эсензэ, лия ёнов а молиця, кевень менельсэнть пек лавшинестэ цивтёрдыця тешксэзэ. Те, койсэнь, лезды муемс ды вастовомс содавиксэть марто. Тынк ёно, мода лангсо, эрьвань эсь тюс сельмензэ, черензэ, кедьсэнзэ эсензэ киксэнзэ-сормсевксэнзэ, эсензэ вайгелезэ, молевксэзэ, корозо, кортавксозо... Тесэ вана... Мезень тансть ульнесь авань марто вастовомасонть?! Аштинек-аштинек карадо-каршо, цивтёркшнынек вейкенек-вейкенек туртов ды теке басом явовинекак. Бажинь, бажинь валнэ ёвтамс. Арась. «Вай, авакай-тирякай!» — теяк тень эзь мереве. Визькс тень ульнесь, ды мезе теят... Те кодамо вастовома? А палсемат, а мизолкст, а сельведть... Те кодамо кеняркс вейкенек-вейкенек неемадонть? Мезе неинь? Сынь, кеняркстнэ, Валдай-чивалдынем, вейкень пес Модамасторсо^ тынк ёнот... Сыть мелезэнь коввалдо ветне, сыть превезэнь ашо парсейсэ копачазь ламарь чувто ало вастневеманок, ды эль а веляськадан. Секскак, Валдай... Седе тов а поладсынь валон. Чарькодимик?
Малав колмо ковонь ютазь вастовинек — иля абунгадо — тетянь, Лемаень Тумай марто. Шуморксоль цёрась, [71] содылик. Кода а содылик, эринек тынк эйстэ кото-сисем кудонь ютазь, теде башка, кедьсэнек аволь весть, аволь кавкстькак ульнить. Содамокс, а маняван, эсь пачканзо ловсь эйсэть. Вастневить мартонзо лиясояк, аволь ансяк минек кедьсэ. Эзик стувто — тунь а кавтолдан — лангсот пеедькшнеманзояк: «Кодат теветь, содамо-кодамо?». Мельсэть? Пароль тетям ломанесь, а мезть кортамс. Седеймарицяль. Лангс ваномскак... Сэрей, келей лавтов. Тумо. Тесэ — сув пакшке. Мекс Чипазось истятнэнень «сюро мартот» кучни, а содан. Пели, маряви, илязо лисе кавто вадрясто седеяк вадря. Лемаень Кевганя. Од авам. Сонзэ тетядон парсте содасак! Каня стувтови истямо пачась? Сон, содан, зярс эсенек велень эрийтнень ютксо, эрий, эзь куло. Косто тетям ускокшнызе, а содан. Каня Чиргужсто, каня Чукалсто... А содан, вишкинелинь. Идемевсесь, тунь а кавтолдан, нерьгстакшнызе тензэ те гуенть! Сон, сон, анамазось, аволь кияк лия. Нарьгась тетянь лангсо кода маштсь. Минденек кортамскак а мезть: пансесь эйсэнек, веренек потясь, мезе лангскак эзь вано. Зяроксть сазоркань марто кепе-штапо ёртнимизь кудосто. Зяро шка ютавтнинек шабратнень кедьсэ! Онгсь чинек-венек. А стяко куринкань аватне, ды мейле веленек, мерсть тензэ аволь Кевганя — Онганя. Таштавольтькак Кастуш сазорнэнь марто эйстэдензэ валозь сельведенек, ве ведрас авольть кельге. Нулгодькс валонзо ледстямсто пачкан сурневтема ютни. Кежтнеде сельмензэ полгарьгадыльть. Кирвазиль эйсэст кирнявтниця-липниця тол. Зярдо мелезэнь леди цярныця вайгелезэ, пачкан ютыця вардань вановтозо, ёжом берякады. Кода модась кирди истятнэнь — превс а саеви! Мезе, тесэнь лувтнень коряс венстема тензэ чевте-лембе тарка? Калгодо-кельме эзем тензэ — вана мезе!
Тетямгак маштовсь сондензэ.
Ульнесь, а стувтови, телень якстере-сэнь валске. Сыргозтимизь од аванок цярномазо. «Ознось», чарькодинек, тетянь. Мезень кис? Эли чалгась а се сэдявксонть лангс, эли валось тензэ та-кода кокнозь ёвтавсь, эли... Мезде? Сонськак эзь сода. Сон лиякс, ломанькс кортамо эзь машто.
[72] Тетям сестэ, кирдевсь мельсэнь, эзь ёвта валгак; комась, чатьмонезь таргизе эзем аксялдо четвертенть, нуртясь стопка ды весть лекстязь каизе потмозонзо. Эрязкалезь оршнесь, лисемстэ мельганзо варсодизе кенкшенть ды тусь важодеме: апак ярса, кши кочомтомо.
Тусь ды мекев уш эзь велявто. Керясть колхознэнь вирь. Понгсь, ёвтнематнень коряс, прыця чувто алов. Ловось се иестэнть карксамгаль. Оргодеме эзь кенере. Кие чумось, содык азё! Шкадонть оно зяро ютась. Паряк, комавтозь стопкаськак «лездась», мезеяк а мерян. Ялатеке ушодксокс кажонтень, арсян, ульнесь «кудоютконь гуесь». Тетянь калминек. Апарось ськамонзо а яки. Сёксестэнть монь черде кундымим — ёмавтыя тейтерьксчим, ды курок чарькодинь — пекиинь.
Виде, тетям чапамонть вечкилизе. Ульнесь эйсэнзэ истямо асатыкс. Ялатеке пес панизе аволь палыведесь. Тиринь авань марто эрямсто истямокс сон, ёвтнекшнесть тень, арасель. Сонзэ марто эрязь, эрямозо истя аволь сезеве. Ветизе кудозонок те эвсенть — ды весемесь полавтовсь. Цёрась юртсонть, седеяк ней, ансяк неяви прявтокс, алкуксонь прявтось се, кие цёрань прянть ков эряви велявтни — авась. Кодамо авась, истямо мирдесь, истят эйкакштне ды кудосонть коштось. Эжди эли кельмевти. Ну... мезеяк а теят — уцяскадот чувто пряс а кузят, мутанзат тостояк.
Мезень, тагояк теть мерян, тесэ, Тоначинь Масторсо, вадрясь? Мезень, кодат мелень ваномат кавто покш шапкашка сэнь сулейнетнень ютксо? Ванат, ванат... Кортамс? Кель арась. Кутмордамс? Кедть арасть. Те тынк тосо, Валдочисэ, кортак, палсек, пеедькшнек, морак топодемазот. Тесэ минек...
Содат мезе, Валдай? Зярс эрицят, зярс пильгеть якить, пертьпелькссэнть ламодояк ламо мазычитнень вакска иля ютне, сайть эрямостонть зяро саеви. Кургот свал улезэ пешксе мизолксто, пилеть — мородо. Тесэ, Модапотмонь Масторсо, тагояк ледстяса, истямо мезеяк арась, мезеяк а марят, а неят. Секскак...
...Паро кулям ули. Кецневттян.
Содат, Валдай, кие марто вастневинь? А мезть кевкстнемс, [73] ялатеке а содави. А кемевияк. Тонь... тетять марто! Вана кие марто. Весть пачкодсть тень сигналт: пи-пи-пи... — пикстердезевсть «тештинень». Те истя сон кевкстнесь, чарькодеви, аволь валсо: «Тон аволь Лемаень Тумаень тейтересь?». Мон чатьмонезь каршонзо: «Сонзэ, сонзэ, Тумаень». «Тетять, Тумаень, парсте содылия, кирдажом, ве куринкасо эринек. Ялгат минь икелень. Сон войнастонть, конань лемдизь «отечественноекс», велявтсь кудов. Мон вана, Учаень Оло, эзинь пачкоде, кадовинь тюрьганонь «якстере паксятнес». Маштымизь. Цёрань, Валдаень, кеман, содылик. Кода эно! Тынь, мерема, ве шкань. Аволь кирдажтадо? Сон зярс тосо, Эриень Масторсо...» — лостерьсэ совасть эйзэнь тетять пельде магнитэнь-электрононь кеверькстнэ-сигналтнэ.
Ванынь тетять лангс кувать, бажинь содамс арсемань лувонзо, ёжонзо, неемс чачонзо. Вант-иля — шапкадо покш сэняжа сувнеде башка, мезеяк а неят. Мезеяк! Вай, Валдай, берянь — арась келенек! Кевкстневлия педе-пес: кода-зярдо понгсь тюрема таркантень, кода-косо, мезень кис маштовсь... Сеске лиссь оймезэ эли савсь кувать сэредькст кирдемс... Чоп авольть прядово валонок. Мезеяк а теят: сави кецнемс куш тенень — ваномс, кода кортыть, келень сускозь, вейкенек-вейкенек лангс. Теяк паро! Сигналтнэде кортамскак а мезть, сынтемест сёрмаяк аволь кучово. Косто... Сюкпря Кулаванень! Паро тевть тенек тейсь ды теи! Лиякс аволь сёрмине сёрмадомс, кодамояк эрямо Модаалкссонть аволь уле.
Зярольть, Валдай, иеть тетять войнав саема шкастонзо? Сисемшкальть, монень маряви. Истя? Маштызь сонзэ саема иестэнзэ эли седе мейле? Одоль. Ванынь-ванынь лангозонзо ды, кадык мезеяк эзинь нее, прынь мельс: пек сюморды, мелявты-янкси шкадо икеле куломанзо кувалма. Кить чумот? Фашисттнэ? Кинь? Сынст, немецень, эли... тескенсетне? Сеедьстэ сорныця сувнесь, марявсь тень, кевкстнесь вейкеде: «Мезень кис? Мезень кис истя одсто саизь оймем?».
Мезень кис?
Кевкстеманть смустезэ эзь чарькодеве. Сы сёрмасот, кеман, панжсак. Учан.
[74] Седе икелень сёрмат — мерян омбоцеде — «калгодоль». Эль чулговсь. Ялатеке ламо мезе чарькодинь. Васняяк, теевемс урекс вечкемадо — те а тев. Нулакс усксевиця вечкемась — а вечкема. Майсевема. Каштанчизэ улезэ эрьвань. Эрьвась эрязо эсензэ превсэ, эсензэ мельсэ. Виде. Мезеяк а мерят. Ансяк мекс сынь арасельть эсень, Лемаень Виянань? А каштанчи, а превть. Косолинь? Мекс эзия вансто эсь прям? Мекс истя куроксто мендявинь ды шкадонзо икеле, эль кенерекшнесь панжовомо, максыя сеземс чахранть?
Сестэ мезе? Лисни, монгак ульнинь урекс Кириннэнь? Истя сонзэ вечкилия, мик превень чополгадокшность? Арась, урекс араселинь. Лавшочим ды кемемам — ульнесть. Сынь пачтимизьгак кажонтень. Тонь, Валдай, набойчинь аразеть лангскак аламнеде пеняцян. Эзимик тонавто эсень кис аштеме. Арсинь, весе тонь кондят. Тон аволь тосо мезеяк, палсемеяк паро ладсо эзить терявтне. Ванстыть эйсэнь. Вечкилимик ванькс вечкемасо. Кирин тонь коряс — карциган. Кенжензэ сеске нолдынзе. Чарькодевсь ней. Ней истя кортан. Сестэ... Мекс минь превейтяно шкадо мейле?
Зярс саты, а? Саты. Инксэмгак ношкалгадсь. Те тонь «инзазь» кувака сёрмат кис. Монськак эйстэть... а кадовкшнан. Лодордан, лодордан... Несак, зяро ваднинь? Тонавтымик. Ялатеке энялдан: сёрмадт седе нурькинестэ ды чарькодевиксстэ. Содак: кулозь ломаненть превензэ лият, аволь сеске цопадьсызь сёрмадозенть. Вечкевить тень минек велестэ кулятне. Содан, мелем топавтсак. Кой-мезде пачтят.
Тошнаинь, Валдай, кисэть. Учан. Кадык учан, тон ва иля капша тей, иля. Апак эрязкалеяк тесэ улят. Весе тесэть: паротнеяк, кежейтнеяк, аксунтнэяк... Улят тесэ тонгак. Прядса сёрмам истямо валсо. Кода ды зяро аволинь музгорде, аволинь мурне, «морыця» сёрмат кис сюконян омбоцеде. Содавлитькак, зяро ды кодат кеняркст сон тень казсь, зяро оймень эждиця валт. Сюкпря, арсий прев.
Тонь учиця ялгат Вияна.
Тоначи.