Тесэ ды тосо (2013)/0
| ←Тесэ ды тосо (оглавления) | Тесэ ды тосо (2013) by , edited by Ломшина Л. А. |
Васенце сёрмась→ |
| Нуянь Видяз. Тесэ ды тосо: сёрмасо роман, келей ёвтнема ды ёвтнемат. — Саранск, Красный Октябрь, 2013. — с. 3—6 |
[3]
| Алтави Бозань Раянень |
| ТЕСЭ ды ТОСО |
| Сёрмасо роман |
Клянцьк-клянцьк панжия стенас понгавтозь почтань сэнь тюс жестень потмарнэнть, ды лапшт прась потстонзо пильгень ваксс эчке, якстерестэ артозь пакет. Неезденть пачкан ютась а чарькодевикс ёжо. «Якстере? Цитни? Те мень тамаша?» — талнозевинь, эль марявиксстэ прасть кельпрястон валтнэ. Коминь, кепедия «тамашанть» киякссто ды тандадомадонть эль эзия вырновто мекев. Сон аволь пек марявиксстэ... каштордсь! Истямо гайть марсеви уськень пачк виев токонь чиемстэ. Седеем токнозевсь седе сеедьстэ. Кедень сорнозевсть. Вай, те мезе истямось? Мень тюниха?
Теке марто саимим мель — содамс.
Варштынь перькан.
Паряк, кодаткак згилямонь тевть?
Аволь.
Ламо квартирас кудонь алце этаж. Маласо кияк арась. Пеедькшнемадо иля арсеяк. Истятнэде тесэ эзь марсеве.
Эно мезе?
Конвертэсь, ванан, кода конверт. Якстеренть ланга эйпаро покш ашо буквасо печатазь фамилиям, тетялемем, лемем, эрямо таркам. Весемесь кода эряви, мезескак а педяват. Ансяк кучицянть фамилиязо мекс-бути апак сёрмадо. Адресэзэ раужо, теке сод, квадраткесэ. Эйсэнзэ вейке вал: «Тоначистэ». Вай, авакай! Те таго мезе?! Эль эзинь аймельгадо. Раужонть ланга ашосто печатазь букватне эрьва ёндо [4] мазылгавтнезь сюрыне ды лопине ёнов молиця тешкскесэ. Абунгавтымизь тюсост: кувтолк-кувтолк полавтневсь сэньстэ якстерес, якстерестэ пижес ды мекевланг.
Кирдян кедьсэнь. Кие кандызе? Почтань явшицясь? А содан, мезе теемс. Кашторксось ёмась. Сонзэ полавтызе седе виев, седе марявиця бизнэма, прок конёвонь кескавнесэнть кирдевсть оляс бажиця зярыя мекшкеть. Пелезевинь. Таго токимим экше ёжо. Мелем вана, тень лангс апак вано, кадовсь теке — содамс, кодамо дюниянь «аппарат» кирдян кедьсэнь. Аволь НЛО-нь кодамояк кучовкс? Кие кандызе, кие шикадизе ящикентень?
Чалгамонь-чалгамонь трокс келейстэ ды эрязасто эскелязь кузинь ветеце этажос, панжия кенкшенть ды лексезь-пувсезь совинь квартиразон.
Автордынь стувором лангсто васоньпеельтнень ды, озамодо апак арсеяк, кериксэлня сёрманть, кода свал, теине чирева. Мезеяк эзь лисе. Каня кедьёнкстнэ ношкальть, каня кедтне эзть оймавтово, сорность талномадонть. Пакетэсь эзь керяво.
Муинь седе покш васоньпеельть. Носкозь-лексезь, окойники панжия пакетэнть. Потмо ёнганзо педявтозель алюминиень менчевиця келькш. Секс носкиныак зняро! «Зепинестэнть» таргинь човине, пачк невтиця ды мекс-бути сурс педиця кавксть мендязь конёв лопине. Кундыксэлинь ловномо: арась, кедьсэ сёрмадозь букватне, куш аволь вишкинельтькак, эль редявсть. Те таго мезе? Аламос аштезь ойминь, кикстнэ-букватне теевсть неявиксэкс. Лангост теке басом сеске копачизе та-кода сеедьстэ сорныця, сэншть мериця сувне. Ван, авакай! Те невак* кодамо «физика»?! Истят дюният онстонгак эзинь некшне. Тень лангс апак вано, чарькодия: кедесь аваломанень. Сёрмадозь ваньксстэ, чарькодевиксстэ, лопанть чирева чаво таркат апак кадо. Истя уряднойстэ-мазыйстэ, «паксявтомо» тешкстнигь ансяк сынь, аватне. Сынст, сынст обуцясь, мезеяк а мерят!
«Косто, кинь пельде? Вай, кода тантейстэ качады! Теке арвосо сюпав тикше. Васня эзь маряво. Ней... Мекс, мезде истя каштордсь-бизнэсь? Косто саеви чинесь? Мекс [5] конвертэнть лангозо якстере, теке верьсэ ваднезь?» — эвтсть превсэнь кевкстематне «муницянь» пельде тамашань казненть ванномсто...
Озынь стувором экшс.
Кедьсэнь лопиненть кирдезь, васняяк варштынь сёрмадовксонть пес: кинь пельде?
«Вияна? Лемаень Вияна?! — тарск меринь неезденть, эль эзь пра кедьстэнь сёрмась. Абунгадозь ванан кавто лемтнень лангс, мезеяк а чарькодян. — Те, те... кода истя — сонзэ пельде? Сон, сон... теня, умок-умок Тоначинь эриця! Мельсэнь, 1985-це иестэ кулось, кемнилее иеть уш ютасть! Кодат сонзэ пельде шумбрат-парт?! Сеть ёнкстнэстэ зярс ве сёрминеяк киненьгак эзь пачколе. Арась-арась, тесэ мезе-бути а истя! Эли раужо ойме ломань вередемсь мартон истя казямосто налксеме, эли сонсь идемевсесь. Конвертэсь... Каня истямо киненьгак содавиксэм ютксто тееви? Аштека, аштека! Эзинь веляськадо? Прям таркасонзо? Таркасонзо. Сэреди? Арась. Эно мезе сестэ? Мезеяк. Кемть-иля, кедьсэть кирдят, оймак, кирдят — ловнок! — сёрма Тоначистэ. Истямо киненьгак, киненьгак зярдояк эзь сакшно. Тон — васенцесь Модамасторонть лангсо. Содазь, карминдерят теде ёвтнеме, а кемтядызь, секень вант, ловтадызь превстэ лисезекс».
Сялгавтынь сельмень, ушодынь ловномо.
Мазыйстэ, мелень путозь аравтнезь валтнэнь ланга ютынь весть, омбоцеде. Сёрмадовксось теевсь седе ловновицякс, седе шождынестэ кармасть совамо превезэнь валтнэнь вельде ёвтазь мельтне, эйстэст стазь кортамонь лувось. Мезе теемс, эзинь сода. Мельс сынь: сёрмась кучозель тень умок, пек умок, ды аволь Эрий Масторсто, пачкодсь, алкукскак, Тоначистэ. Сон сась сеть ёнкстнэстэ, конатнеде ловнынь книгасто, марсинь вишка пингестэ авань пельде. Покштянок кемсть: эрямось поладови ойменть лисемадо мейлеяк. Секс уловонть марто кандолазтнэс путыльть эрьва кодат кедьёнкст.
Ловнан. Ёвтнить сёрмасонть валтнэ Тов ютыцятнень эрямодост, лангозост прыця стакачитнеде, мода ало эрьва кодат майсематнеде.
[6] Менчия конёв панкскенть кода ульнесь, путыя стувором лангс. Стакасто лекстинь, нежедия прям кавто кедьсэнь ды талнозь арсезевинь нусманя арсемасо: «Те мезе, валанясто ёвтазь тердема Тов, чопода таркав? Иля арсеяк, Вияна! Монень аволь сядо, мик аволь кавксоньгеменьгак... Ну мезе неть сизьгементне! Мон невак цёра. Секскак, Сэрдяй, ды тон, васень вечкемам, илядо капшавто, кенерян, шкам сы — Тозонь чопавтан. Ней зярс илядо, илядо ледстнеяк теде. Тыненк а эрязкалян. Кадык, кода маряви, кундымизьгак каштордыця сёрмасонк, ялатеке зярс а молян. Мелем арась. Тосо монень, тевень вечкицянтень, Сэрдяй, ды тон, Вияна, зярс а мезе теемс, Тесэнь тевтнень васня сявордсынь, таркава-эземга аравтнесынь. Мейле уш... Содан, Тонь эйстэ, Кельме Ялгай, кудопотмарс а кекшат. Мусамак тостояк. Ялатеке...».
Тоначистэ сёрма...
Потмоёжонь полавтневемадо пешксе се чиденть мейле шкадонть ютась аволь аламо. Аволь весть сакшнось Модамасторонть лангс кенярксонь сравтниця, шалныця, тюсонь полавтниця тундось, зярыяксть кайсизь лавтовост ланга тантей чине ожо пацяст кудонок каршо пекшетне.
Эрьва мезес тонадат. Эрямось тонавттанзат. Тонадынь а содавикс, дюм чопода, кельме ёжонь сыргозтиця Масторонть марто сюлмавксонтеньгак. Васень сёрмадонть мейле васень вечкемам Вияна кучнесь эйстэст зярыя: кувакат, нурькинеть, оймень эждицят, кельмевтицят, вечкемадо ды... Кучнинек сёрматнень вейкенек-вейкенек туртов: мон, Валдай, ды сон, умонь-умонь мазый шкань вечкемам, Вияна, зярыя иеть.
Кода-бути весть талай чокшне таркасо мадезь аштемстэ апак учо содавтымим истямо мель: мезе берянесь, ламолгавтындерясынь ды невтиндерясынь сынст, Тоначинь сёрматнень, весенень? Кадык ловныть! Кармить содамо Лия эрямодо ды, паряк, лиякс, лия сельмсэ кармить ваномо Тесэнь эрямонть лангс! Вана сынь, Виянань ды монь сёрматне...