Татю (книга)/Татю/2 пелькс/5

From Wikisource
Jump to navigation Jump to search
Татю  (1933)  by Раптанов, Тимофей Алексеевич, edited by Куторкин А.
2 пелькс, V—VI
Т. А. Раптанов. Татю. Повесть ды ёвтнемат. — Эрзямокшонь государственной издательствась, Саранск, 1933. — стр. 38—46
[ 38 ]

V

Чии народось окольцянтень. Чиить паметьстеме.

Ков истя чиить весе неть ломатне.

Вирь удало паксясонть церат вансть алашат. Сухойстэ покш кияванть сы ломань шинельстэ. Цератнень седеест эсть кирдть, штобу а варштамс кие юты. Мирем листь кинть чирес. Кода ломанесь пачкодсь малазост содавсь Ларькань Егорень Боря. Боксонзо шашка, револьвер. Конясонзо какарда, лавтов ланксонзо мазый пагонт. А усонзо конечкакс мендявсть. Сельме чирксэнзэ броватне, прок равжо пона куванкст. Цератнень мерят, прок ойместкак арасель. Теке кулозь аштить. Кода Боря ютась вакскаст, кекшевсь вирентень, сынь мирем кундсизь алашаст ды лия киява кудов. Веленть потмонзо сокардызь.

— Боря сы... Шашка боксонзо. Ледьнемка марто. Конясонзо — цитни весе. Шинялезэ кочкарязонзо токши. Кем кочкарясонзо таго месть чольнить.

И чольнесть не цератнень вайгелест кудотнева. Кудотнестэ сыренек однэк Борянь каршо, Борянь вастомо,

Борянь нинзэ — Анкань эзь кирьдевть радостезэ, озавсь. Мейле стявсь ды минень сюнонь вайгельсэ кармась аварьдеме. Сонсь мезе уле моцезэ ношкстась вастомо мирьдензэ. Чии пиштякась, тарка а саи. Чалги а мари уш: мода пильгалонзо эли арась.

Боря озась столь экшес. Родонзо племанзо сюпавт. Ойсесть ваксозонзо. Теде мейле явшиньзе гостинецензэ — кармасть симеме.

Аламодо оймасть талномадо, эрьва косто певерсть кевкснимат. Боря кенярдозь евтнесь.

— Да ... Войнась машсь ламо ломать — сон бубстась. [ 39 ]Сонзэ сельмесэ налксесь такодамо жалямо, такодамо лавшо седей. Тень эйстэ неявсь, што Боря прянек пильгенек войнанть каршо. Евтнеманзо коряс сон нярдояк больче авелявты службав. Отпусконзо прядомадо мейле обязательна кадсы веленть, войнав яла теке а моле.

Татю аштесь кенш лангсо, салава ваннось лангозонзо.

Тень весе вадрясто неизе.

— Борис Егорыч, моньсенть костояк эзик ней?, — пеидезь пшкадсь Татю. Тона пурдыньзе усонзо ды чаравсь прясонзо.

— Арась! Эзь савкшно вастомс..,

— Тон бульчук начальникекс ульнить? — виздезь пшкадсь Анка.

— Зводнойкс ульнинь.

— Зводнойкс. Минекесь мезекс бутим?

— Сон, чуть сэрть маринь... офицэр.

— Охвицэрэсь седе покш эли зводноесь?

— Офицэрэсь намо седе покш.

Кувать кортамотнеде мейле Татю овсе шашсь Боря малав. Сон кевкснизе весе, кодамо ойнанть ладозо, кодат ежост салдатнэнь, кода начальствась чави салдатнэнь. Боря евтниньзе педе пес. Теке марто сон евтниньзе тесэнь эрямо чинть. Кортамотнеде мейле сынь пек теевсть малацек. Туимадо мейлеяк Боря кувать арсесь Татю ланга. Сон ансик лиссь Даньчань Дригань кардайстэ прок пропка ертовсь Наста — Дриганизэ. Дрига чийсь ды саизе ульця куншкасто. Сон кундызе плетешкатнеде ды олоком уски мельганзо. Наста апаро вайгельсьсэ ранге.

— Максыть мартон панжуматнень! — Сонсь яла кучкори эйсэнзэ бокс.

— Вай саить, саить азе... ансяк кадумак живстэ. ды тосо ярмакоськак ансяк колмо целковойть.

— Таргить тонсь с... ата бутылканть лайса пря кунчказот! — Пижнесь Дрига.

Народ пуромсь ламо. Весе ваныть. Авинесь пешксесэ буто очко кевересь мирьдензэ пильге песэ. Вейкеяк зняро тестэ аштить эзть кунда кисэнзэ пшкадеме.

[ 40 ]— Муж да жена — одна сатана. Тече турить валске советнат. Кода човоряват юткозост. Сынь валске велув а тон чумокс кадоват. — Истя кортнесть вепеле ваныцятне.

Татюнь кирьвайсь седеезэ. Ды акода а кирваземскак. Ведь авась кирьди истяшка сэредькс. Эрьва вачкодемась каяты Татюнь седейс. Чавияк эйсэнзэ ансяк текень кисэ, мекс картасо нальксемс эзизе макст колмо целковойтнень, конань кисэ миизе остатка орчамо пелензэ.

— Несчастный клин! — Татю эсь городстензэ марто стясь Дригань каршо.

Перькаст општ мольсть.

Сексень чопода пельтне экшстэ лиссь чипай. Варштась ды таго кекшсь.

— Тонь тесэ теветь арась! Чаракадсь Дригань рунгозо.

— Тынь идиоттад! Тынь ава ломаненть ловсэнк пильгало соркс. Месть мелененк сень мартост тейтяд! Орготь вельстэнзэ, скотина! Мон малавгак амаксса больче вачкодемс. Ансяк улевельть дружна ават тонь понкс одароткак петевленек. Тон думат авань честезэ а истямо?! Ех, леньгень салдат.

Дрига яходсь мокшнасонзо. Татю комась.

— Кедеть шлить! — Татю тохмадизе Дригань мештес. Прок копна прясто пулт ертовсь.

— Перець, аволь ава, — ки бути пшкадсь ломатне ютксто.

Кепетець шум. Кармасть ракамо. Народось лымбакстни. Весе эцить малав, арсить нееме истямо сбой — аванть. — Ават! минь весе истят вийтеметян кинь лангсо истя анарьгить.? Нарьгить весеменек лангсо. Чавить эйсэнек кинень ансяк эряви. Улезэ жалостенк! Тынк икеле пешксесэ ава, яки кулумань киява. Дайте кепедьсынек пильге лангс сонзэ. Эряви ускомс больницяв.

Татю кежень пачк ды жалямо марто терьди аватнень. Эсинзэ сельведьтне пицесть шачонзо. Сон кепедизе Настань. Пайстомось эзь чалгавт пильге лангс. [ 41 ]Татю кирсь эйсэнзэ кедь вийсэ. Сон эзь сода косто сась эйзэнзэ зняро вий, геройства ды смел чи.

Народонть ютксто лиссть ниле салдаткат, мартост молсь Боря. Татюнь кедьстэ саизь Настань путызь каламушкантень. Татю сорнось. Мик вейкеяк сан арасель, кона бу аволь чавов, кона бу аволь лака пси веренть потсо.

Неждясть якшамотне. Модась копачавсь ашо руцясо. Эрьва ломанесь кизэнь перть прок коткодав анокстась телентень. Эрявсь лембе угол. Эрявсь ярцамо пель. Те весе можна анокстамс ансяк кизна. Велесэнть булга. Ульнесь яволявтозь, што инязорось каязь. Салдатнэ пачкасо састь велентень. Састь шинельсэ, састь ружияст марто ды лия оружия марто. Ней уш салдатонь неемась ульнесь а дива. Эйкакшнэ тейнесть маршировкат. Бутто анокстасть од войнань вастума.

Эрьва чистэ ардыть араторт. Пряст такодат пондакшт, окурат минек старостанть коньдят. Сивест ашот ды цицирьдить. Араторничасть ламо част, ламо чить.

— „Война до победного конца!“ — Велесэнть сюпавкатне кирсть те лозунгонть. Салдатнэ яла састь ды састь.

Верьгез Микита лиссь оляс Лиссть мирем. Эсь перькаст пурнызь беднякнень, середнякнень.

Татю пурнась ават, конат молевельть бу цератне марто Чагаевонь паронть саеме.

Сокицятне эсь олясост каподсть помещикень модатнень. Эсть кенерькшнэ кармамо видеме эли сокамо, паксяванть скокавтнесть казак. Лутасть мужикенть копорензэ. Теде мейле сеензасть пожартнэ. Пултасть помещикень именият. Крестьянтнэнь гаварнавксо проводявсть тюрьмав. Кадовикснэнь, авечкема мелесь помещикне ланкс кайсь ды кайсь. Вишка эйкакшнэ ертнесть лозунгт: „Не нады нам царя, нам не надо монархию, да здравствует Ленин! Да здравствует советская власть!“

Не пижнематне кисэ кадетнэ леднесть вишка [ 42 ]эйкакшнэнь. Чавсть плеткасо жалостеме. Киненьгак арасель, кодамояк пощада.

Кода яволявсть Татю лангс, кадетнэ прок азарсь кискат ардсть. Кудосонть ульнесть ансяк Кулина ды эйкакшонзо марто Татю.

— Собирайся!

Татю прок эзь тандаткак, яла теке таймаскадсь.

— Куда?

— Безразговора! Одевайся!!!

Татю больче эзь пшкадть местькак. Оршась, палызе эйкакшонзо ды лись кудостонь. Лиссть мельганзо кадетнэяк.

Кулина эзь сода мезес кундамс. Эзь сода месть тейнемс. Сон саизе аварьдиця эйкакшонть.

— Вот ават, кодамо усксевиця. Тарка эземс илязо пекста. — Кулина якась кудованть мекев васов. Совась Карпа.

— Минекенть рестовизь?

— Истя эряви!

— Эйкакшось...

— Мезе эйкакшось?

— Кода мезе?

— Вачкодикь кавто пильгеде угол пес. Тон мерят алкукс Иванонь. Ламо тетятнеде ульнесть. Аламо марто мерят усксевсь.

Карпа атя каизе пальтанзо, мадсь таркантень. Эйкакшось авардсь. Пижнесь „авай“ но седей кияк тензэ эзь пут. Истякаварьдезь матедявсь.

Татюнь ветизь Чагаевонь кевень кардс.

Кельме коштось вачкодевсь Татюнь коняс.

Ушось ульнесь сэтьме. Ульцяванть кияк эзь яка ды эсть мерь. Менелесь такода рипакадсь. Велесэнть мик тошна.

— Садиссь!

Татю озась.

— Кого ты знаешь из видных большевиков?

— Каких видных?

— Примерно Ленина знаешь?

— Я слышала о нем.

[ 43 ]— Ага! На кружке, чтоли слышала? —

— Нет! Люди говорят...

— Где твои товарищи?!

— Никого не знаю.

— Врешь!

Татю (Т. А. Раптанов, 1933) p45.jpg

— Скажи где те люди, которые тебе говорили о большевиках, — сонсь плеткасонть вачкодизе столенть. Куть страстесь ульнесь покш, яла теке кашт мольсь.

— Ну слушай, — озась ды сэтьстэ кармась кортамо муцицязо, — ты женщина, у тебя муж офицер, ребенок у тебя. Не томи себя и нас. Скажи, что ты знаешь о них? Неужели тебе будет легче если мы будем тебя пороть до потери сознания. Неужели тебе легче помереть за тех, кто пытается напакостить нашему отечеству. Ну говори, говори же черт возьми! — Офицэрэсь кутмордыксылизе.

Татю велявтызе вановтонзо ды мик синьдень вал [ 44 ]паморькс эзь правт. Сон аштесь, прок а сонензэ кортасть. Прок мерят а сонзэ тандавтнесть.

— Гадюка! Что ты молчишь! — Мезе ульсь виезэ ранкстась кадетэсь. Но Татю таго валгак эзь пшкадь. Седе-мейле кадетэсь стясь таркастонзо ды мольсь Танюнь каршо. Аштесь вейке минут ды кода лоштясы штека ланга. Теде мейле кирвайсть кевень стенатне. Пильгалдонзо масторксоськак веляськадсь.

— Ах вы идиоты! Вы пьете нашу кровь! Запомни стерва... подавитесь! Вы угнетатели, вы издевались, вы мучаете нас! За это вы получите долги! Ты знай, что моих товарищей тысячи, миллионы и десятки миллионов. Так, что ты от меня не выпытаешь ничего! — Татюсь сеедьстэ оймень тарксезь кортась. Чиень вачкодемадонть, куркстонть вересь лепеявсь эйсэнзэ.

— Врешь скажешь!.. — Сон стукадизе кенкшенть, кенкш удалдо совасть кавто, буто сынь теске аштестькак

— Пятнадцать и в сырую!..

Сонсь хлопадизе кенкшенть.

— Упрямая чертовка...

Кадетэсь капшезь таргизе зепстэнзэ попироз пачканть истяжо капшезь кармась таргамо. Сонсь покш эськелькссэ подвалганть якась мекев васов.

Татюнень каясть кеветее розгат ды пельс кулозь тохмадизь начко киякс марто кардс.

Кардось чопода. Кода Татюнь тылкадизь сон прась кинь бутим лангс. Тоната сювордась авалем ды полавтызе тарканзо. Кода Татюнень сась паметь сон содызе Польтянь Андреень вайгеленть. Сон шашсь малазонзо.

Андрей понгсь соньдензэ мейле. Сон евтнизе кодамо ладось велесэнть. Сон евтнизе, што Кузьмань маштызь Микилен ки лангс „Оргодикссэль, эзь кенерь вирентень. Минь сралинек. Монь кундымизь каськасто. Миимем Борсук Вера“. Андрей весе ладонть евтнизе. Сон эзь ризнавт Татюнь остаткатне кисэ, секс, што списокось понгсь Микитанень. Микита оргодевсь.

Сынь аштесть чоподасонть. Аштесть эсть сода зярдо ульнесь ве, зярдо ульнесь чи. Тесэ читькак ве.

[ 45 ]Андреень сознаниязо эзь маштне. Сонзэ ловноманзо коряс мольсь уш колмоце сутка.

Колмо суткас арась потсост кше паморькс. Учомскак ульнесь а косто. Кода кармасть кортамо ярсамодо ки бути нерькстась Татюнь элес мешок,

— На, кочкседе мешок уголстонть паморькст. Те ульнесь Ридванычень Наталь. — Кода кевкстизь мейсь аште, сон вайгельсэ кармась аварьдеме ды рикнетезь кармась евтнеме.

— Минек ведь кодамо эйкакшось. Знаш бойка. Моры ды моры „Долой буржуй,“ кода кевкстизь, „Авам, келя, тонавтымим“. Уш божень, уш энялдынь, арась милостест. Колмонест месть мартон тейнесть кияк а содасы. Ансяк, ежо састь тень апаро марявсь. Весе янгимизь. Сынь ведь прок букат цидярдат, штоли.....

Кортавтось сезевсь кенкшень панжомасонть.

Ушостонть чи валдось штавтыньзе шачост. Колмо суткас вейкест вейкост неизь васенксекс.

Пек тоштялгадсть. Штекаст новольсть курго потмозост. Мокшнань виев вачкодематнеде сельмест таргойсть. Вейкень вейкень неемась седеяк тандавтнесь. Седеяк тапась седеест.

Кардонтень совасть ружия мартот. Штюпизь пшти вановсост чавозь, таргозезь ломатнень ды мольсть Татю ваксс.

— Вставай, корова, — вейкесь кучкордызе бокас. Татю стясь чиремкшнезь мольсь икелест.

Андрей арсесь стямо Арась виесь. Сон арсесь пижнеме — Чавомо не имеете права! Но истя састь кежензэ, мик курго саласкензэ свистявсть вейс ды прязо чиремсь начко уголонтень.

Татюнь ветизь таго секе кевень кардонтень. Секе якстере, прок верь боцька, кадетэсь якась уголсто уголс.

— Пришла матушка! Теперь скажешь... Иначе будет поздно!

— Расстреляйте! Казните! Ничего не могу сказать.

— Ах подлюга!

Кадетэсь стукадсь пильксэнзэ ды вачкодизе шачо [ 46 ]ланга, ногайкасо, мееле мольсь стукадизе кенкшенть; совасть неть, конат ветизь тей.

— Посадите... И завтра врасход!