Татю (книга)/Татю/1 пелькс/5
| ←1 пелькс, IV | Татю (1933) by , edited by Куторкин А. 1 пелькс, V |
2 пелькс, I→ |
| Т. А. Раптанов. Татю. Повесть ды ёвтнемат. — Эрзямокшонь государственной издательствась, Саранск, 1933. — стр. 22—26 |
V
Крестной авась Иванонь евкстызе удомсто. Кувать аштесь велькссэнзэ. Жаль тензэ марявсь пувтамс. Неявсь тензэ куяр сюлмокс. Иван удось мазынестэ, сэтьминестэ, тантевстэ. Прок мадемадонзо икеле эзь покордавкшнояк.
— Стяк церам, — пелезь токизе бокас авась. Иван стясь. Кепидезе пондакш прянзо. Картузозо валявсь крандазонть ало пулинть потс. Сельмензэ паншсыньзе, меекев конясыньзе.
— Стяк, стяк, сяткинем.
Таго чевстэ пшкадсь Полай.
Те одов кепедизе прянзо, ваны — кодаяк а чарькоди косо. Мейле панжиньзе сельме керензэ ды окойнике фатясь, што сон крестной аванзо марто сась Остргоров козяйкань чиявтомо. Теде мейле ледсь мелезэнзэ се обидась, конатань тензэ ертызь тейтертне. Сехте пек ульнесь апаро секс, што вана, те лыткасо орчавт тейтересь покордызе ды истя покордызе мик те обидась сельведьсэяк эзь шлявт. Те апарось кайсь. Ды акода а касомскак тензэ. „Ведь те тейтересь пильгало сор“.
Теде мейле сон аравтызе икелензэ эсинзэ улинзэ паранзо, ведь те ули парось кармавты мелензэ ваномо, мельдензэ пелеме. Те ланкс апак вано покордызе истямо ништий-коцкеревкс.
Сон укстась ды нилизе те обиданть. Кармась кильдиме алашанть.
Кияванть молемстэ Полай евтнизе, што тейтересь мельзэнзэ тусь да макссызь. Авась а родной пек эзь покшкавтне. Алкукскак ародной авась аволь ансяк эзь покшкавтне сонзэ койсэ, коть мартост саевлизь, [ 23 ]яла теке мелезэнзэ седеяк вадря улевель бу. Секс сон мерсь, штобу чокшне, саст алкукс чиявтомо.
Бедноень тейтересь можна чиявтомс сельгень прамс. Намо тейтеренть кедьс мезеньгак свадьбат а тейнемс. Вина четвертсэ аламодо чапаськавтсызь ды паро, мезе больче эряви. Эщо тейтерест рудайстэ таргасынек. Тече кармасть потлямо сюпав чисэст бедноень сельть.
Пандованть куземстэ алашась стакасто лексесь. Натой хорномо кармась. Но неть кавонест прок панкт кавтонь-кавтонь корет нолдасть крандазонтень. Кинть кавто бокава ацавсь пиже лугась, тюжа цецькатнестэ ашо кудрятне сюконясть чи валгумать пелей. Чись жо, пейдезь вановтонзо пезнавтызе тумо виренть экшс. А норов жорштнэ чоледезь васня новолить пряст вельксэс, мейле кепитеть одов верев ды прок ундсто каить човорявозь горниповонь вайгель.
Иван мезияк эзь сода, кува азгоньсь крестной авазо, ансяк евтнеманзо коряс аламодо кармась чарькодеме, што одирьвазо карми улеме самай се тейтересь, коната ульнись каргодць эчке коцтонь панарсо ды каладо ташто пулайсэ. Самай се, коната покордызе, коната мезикскак эссе пут Иванонь ули паронзо марто. Алкукскак сюпав чись пидизе Татюнь верензэ. Сюпав чись гробс нолдызе тиринь тетьканзо. Сюпав чиденть ды беднойстэ эрямось пужовтызе лазырька чама вановтонзо. Татюнь седеезэ ицирьди прок кискат эйсэнзэ раздить.
Карпа атя ды Кулина тарка эзем а муить. Учить Острагорсто куля. Кода Полай Иван марто совасть кардазов Кулина ноке кедь лангсо кепидемс крандайстэнть.
— Месть кума? Месть теть евтасть? — Кулина прок одкстомсь. А соды мезес васнятке кундамс.
— Ужодо валган, — кармась кортамо Полай. — Пряма тейтересь тусь мелезэнь. Кодамояк слава а канды. Каршо валонь евтамо а капши. Пашковнась сонензэ ведь а родня. Вал аевты макссы. Монь койсэ нейке саемс... кшить салт аламошка... ды виныне ды [ 24 ]молемс чиявтомс. Месть эщо сацнемс? Тосо койне теемс ды пара. Свадьбанть уш теемс теске. Тосо а ки марто...
Полай стясь крандайстэнть пулайстэнзэ урядыньзе педявт пиже тикшенть. Витизе прястонзо косынканть ды совась кудов.
Кудосонть пазаванть икеле цивтылсь лампаткасо тол кельнесь. Пазаватне велькска каязь пазава паця.
Пашковна истяжо кода Кулина китырдсь. Сон пурнынзе род племанзо, евтнизе, што Татю мельга якить сюпав пошкудат, эрикс кудазорт.
Омбоце чинть Кулина ды Полай пурнасть—сэрьнясть ды тусть чиявтомо.
Иван ульнесь мартост. Сон ней эзь покшкавтне эзь кежеявтне, мольсь, но исень апарось палсь потсонзо. Те толонь паломась чиде чис яла покшолгадсь, яла стакалгавтсь седеензэ. Теке пициця толонть марто кайсь прянь шнамозо, кайсь коштан чизэ. Те сюпав чись, ули парось, кона прась сонзо пряс, сонзо доляс те сонзэ койсэ ульнесь паз, пазонь мель ванома, истямо вий бутто те виенть арасель пезэяк. Вана те певтеме а неявикс вийсэнть арьси пандомс кеж аволь ансяк не тейтерьтненень, конат раксесть ласксонзо, мик арьсесь кежень пандомо весе Острагор велентень. „Кие моньдень сюпав, кие моньдень виев те чей пулосонть эрицятнеде? Вейкест пес нолдасынь пурнамо. Пандонть алов сроян кирьпицень завод веленек сюконить пильгезэнь.“ Истя ськамонзо, эсь потмованзо тольковась Иван. Пандованть валгомсто кармась ванномо тарка, косо карми улиме удобна. Сонзо икелей сравтовсь сэрий „Кудаш“ пандалксось. Пандонть ало якстере песокось сырнекс налксесь Иванонь сельмсэ. Коське эркенть чиресь карми улиме кирьпецень костямо тарка. Кинель леесь вишкине вармадонть волнатне лефень гривакс лыйнить чинть каршо.
Те мелесь, не превтнэ шлязь шлизь прястонзо урьвакстуманть. Намо урьвакстомо ней согласясь сонськак. „Апак урьвакст те тевесь а тееве, кона тевенть тееме алтыя эсь сюпав чим“. Теде мейле седеяк палсь урьвакстума мелезэ. Но те обидась, конань теизе [ 25 ]теизэ Татю, сон эзь мацте урьвакстума мельсэнть мекев ланк, седеяк покшолгавтсь.
Ансяк Татю совась пекстызе мельганзо кудо кенкшенть. Удалонзо мольсть колмо ломать: кавто ават ды од цера. Икильсь аванть чамазо палсь прок фата. Кецэнзэ ашо паця сюлмо. Татю абунгадсь. Натой лаказемсь верезэ. Сон нейке чарькодсь, што саве симемс чапамо вина, вина цярка. Тейтересь эзь фатяяк, кода совасть не колмо фигуратне. Колмонест васня вановтост каизь пазавантень, колмонест крестась ды карксамга сюконясть. Ней кото ваны сельть пезнасть Татюнь лангс. Теде мейле не сельме вановтнэде, седеяк чувтомсь, чувтомсть кедензэ пильгензэ, мерят пандо сяворьсь лангозонзо, ковгат а чиртеви рунгозо. Копорьганзо тусть „коткодавт“, кутьстить эйсэнзэ, ансяк визди коцкеремедест. „Нать эльнеман эльневсть“. Сонензэ жаль кармась марявомо оля чись. Тече чокшне больче а лисе ушов, ялга-оя юткс. Оля чись сехте питней. Куть эзь пешкеле парьсте пекезэ, коть нулат-валат ланксонзо яла теке тейтерькс-чисэ ульнесь седе вадря.
Ламо арьсимат куйсть потмозонзо. Ансяк кавто ендонь ломатне глушизь пря потсо шумонть. Теде мейле овсе лоткась чарькадемеде ки ды месть кортыть ды месть аштить эсь пря потсонзо. Алкукскак пилинзэ лоткасть марямодо, сельмензэ тунь чополгадсть — лоткась неемеде. Мелезэ ульнесь лисемс кудостонть ды туемс ков, косо оля, косо кияк аволь меша эрямо. Ледсь мелезнзэ тетясь, авась.
Коть Татю ульнесь а пакша яла теке од. Кемсисемге иесэ ломанесь прок тундонь васинь цецька. Кода не лецнематнеде мейле Татю сайсь ежо, покшкудатне уш ульнесть озадо столь экшсэ. Татюнь мель кияк эзь кевстне, чапамо винась веляськавтыньзе нонань превтнень. Татю уракадсь, прась крестной тетянзо пильге пес.
— Чи валдынем, валдо сельменем... Корьминецькем! Мейсь кирьтявтсак касы рунгенем, мейс пужовтсак мазый чаминем. Илямак макст, сяткинем, [ 26 ]мирьдинень! Тонсь несамак — пек одан. Асавтове атявтнэнь акирьдеви авантонь корозо. Аванове мирьденть мелезэ? Козонь мееле молян, кинень потмом чамдаса... — Вал евтамонтень Татюнь кундатоць келезэ. Чуди пси сельведезэнзэ сон лепеясь ды венемсь рунгозо иредьстэтнень пильгест пес. Каргодсь киякс кучкантень майш илекезэ, ансяк чуросто ды стакасто тарксесь лексевтьсэнзэ.