Татар огълу татарым
Татар огълу татарым,
Тюп-темельден татарым.
Ата Чынгъыз кунюнде
Адам олгъан татарым.
Къырда догъып, атлы осип
Къымыз иле бесленген.
Татар огълу татарым,
Къалкъан иле безенген.
Къырлар манъа ола кельген
Ватан эзельден.
Чин тавында аш ашап,
Су ичем мен эзельден
Бир аягъым Асурда,
Бири Салгъыр боюнда.
Тимур киби джигитлер
Бек де коптир союмда.
Бир селамгъа, бир тютюнге
Бир къыраллыкъ сатарым.
Он эки хангъа тадж берип,
Джигит олгъан Татарым.
Аткъа минсем токътамам,
Джиан чевирген татарым.
Анкарада султанны
Эсир туткъан татарым.
|
This work was published before January 1, 1929, and is in the public domain worldwide because the author died at least 100 years ago. |