Талун сёрмӧмӧн петаліс шонді...
Талун сёрмӧмӧн петаліс шонді,—
Вӧлі лун шӧрӧдз кымӧра, саль.
Гожся ывлаыс сьӧлӧм эз шонты,
Менам морӧслы вӧлі зэв жаль.
Аслым ачым ме чорыд кыв сеті:
Сиктса том йӧзысь бокӧ ог кеж.
Босьта гудӧкӧс, гуляйтны пета
Нӧрыс йылӧ, кӧн эжаыс веж.
Эжва ю вылысь еджыд ру кайӧ,
Винёв бадьясын кышӧдчигсор.
Муса нывкӧд ми пуксям льӧм сайӧ,
Шӧпкас миянлы сылӧн веж кор.
Войся сынӧдын гудӧк шы гыалӧ,
Гажӧн тырӧм — колхознӧй том йӧз.
Муса нывлы ме сьӧлӧмсянь висьтала:
«Тэнад синъясыд енэж кодь лӧз».
Мед жӧ шондіыс аски петас,
Косьтас му вылысь лысвасӧ пыр.
Локтас, тӧлӧдас важ кадлысь ветӧш
Сиктса том йӧзлӧн гажа тӧв ныр.
Талун сёрмӧмӧн петаліс шонді,
Вӧлі лун шӧрӧдз кымӧра, саль.
Гожся рытӧ том сьӧлӧмӧс шонтіс
Муса шань нывлӧн небыд лӧз шаль.
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
The author died in 1943, so this work is also in the public domain in other countries and areas where the copyright term is the author's life plus 80 years or less (if applicable), or the copyright term is 89 years or less since publication (if applicable). |
|