Сьӧд нюлэскын (Дядюков)

Сьӧд нюлэскын Автор: Иван Тихонович Дядюков

Источник: Гудыри : газет. — 1924. — № 66. — 2-тӥ бам.

Нуналъёс шунытэсь. Сьӧд нюлэс тӧл выртэмъя куаш поттыса сылэ. Инмын пурысь пилемъёс нуй-нуй уяло. Шуръёс эрказ вал кадь ворттыса кыдёке… кыдёке бызё-кошко.

Куазь тулыс шӧдке. Ӵукна тылобурдоос турагайёс, ӟузиликъёс шунды ӝужан вискын шулдыр гурзэс поттыса чебер кырӟало, шумпотэменыз сюлэм ик гор-гор серекъя. Турагайлэсь, ӟузиликлэсь чебер кырӟамзэс кылыса, юберъёс но тачыртыны кутско; дунне жингырес, крезь кадь жингыртэ, одӥг нюлэс гинэ тёпак шим-шим сылэ.

Та сьӧд нюлэскын улӥсь пӧйшуръёс, капчи мылкыдзэс секыт изэн зӥбыса, йырзы ишкалскымон ворттыло. Соос сьӧры пӧйшурасьёс санапалэн чырккем сёр кадь бызьыло.

Таослэн туртскемзы шоры кыдёке султыса учкиськод ке, куддыр пуӵ но тыре, куддыр синкыли но потэ, куддыр серем но потэ; серем потэмлы паймонэз ӧвӧл, мыл поттэк серекъяно луэ.

Со вискын гинэ сьӧд нюлэс пушкын санапал ыбем куара кылӥськиз. Талы пумит пӧйшур берпум куаразэ поттыса черектӥз; узвесь кӧжыос шуныт сюлэмзэ кысон вылысь мугораз мертчылӥллям, мон шудтэм пӧйшурлэсь кусмыль-кусьмыль ошкем йырзэ пӧйшурасьлэн сурон песьтэрысьтыз гуртаз бертыны потэм бераз тёп гинэ адӟи. Туж жаль потӥз. Мар карод, кинлы чагиськод, жаль ке но потэ, чидалод вылды ни. Пӧйшуренлы мыным улон удалтымтэ.

Кӧты бӧрдэ, сюлмы путыртэ. Гырпум вылам зӥбиськи но, гурен бӧрдӥсько. Бӧрдэмелы пумит кин ке куара сётӥсь луиз.

— Мар луиз тыныд, Иван Кудо, бӧрдыса пукиськод?

— Кӧты куректэ, сюлмы путыртэ, улэме секыт; соин бӧрдӥсько.

— Юнме куректӥськод, юнме сюлмыд путыртэ, юнме улэме секыт шуса тон бӧрдӥськод.

— Юнме бӧрдыны, юнме зарни синкылиме кисьтыны, мынам мултэс синкылие ӧвӧл… Кин-о тон? Бамдэ возьматы мыным.

— Азяд улӥсько, Иван Кудо. Бамме уй но нунал но адӟыса улӥськод… Эн бӧрды, Иван Кудо, эн куректы монэ кизисе, тынэсьтыд пӧйшуръёстэ пойшурасьёс санапалэн ыбылыса уз быдтэ, одӥг бырем пӧйшуред интые дас кузя вордскозы.

— Эк, шудэ-шудэ…