Эриклэн дуныз мертамтэ,
Андан кымысыз — чурыт.
Килэн кужымыз вегнамтэ,
Тэрганы тае — кышкыт.
Корт безменлэн нушыез
Табазэ бӧрсяз кыске,
Няркыт дурем жильыез
Мерлы чидатэк чиге.
Сьӧд музъем гудырилэн
Пуппы кадь мырк гижыез,
Сьӧд ужась нош калыклэн
Чурыт корт кадь кужымез.
Кот сюбег сюрес вылтӥ
Кема калгиз сьӧд ужась,
Пеймытэныз шуг азьтӥ
Эриксэ тылын утчаз.
Сибыр зарни гудӥсьёс
Шуге-леке вуизы,
Сьӧд дышмон гудыриос
Кер поттэк ук ӵашйизы.
Сьӧд дышмонлэн ӵашъемез
Тӧдьы вылэ гожтэмын,
Сьӧд ужасьлэн эрикез
Син азе ни потэмын.
Эрик понна ужасьёс
Йырзэс чик ӧз жалялэ,
Мурт кужымез сюпсисьёс
Горд тыллы ӧз чидалэ…
Ужась калык эриксэ
Аслаз гаденыз талаз,
Кужмын шедьтэм ваньбурзэ
Сузӥ ки улаз басьтӥз.
Та понна курадӟизы
Ленских прискын ужасьёс,
Та понна уть ӵашйизы
Сьӧд музъем гудыриос.
