Предисло́вїе
е҆́же ѿ лꙋкѝ ст҃а́гѡ є҆ѵⷢ҇лїа.
Лꙋка̀ бж҃е́ственный, а҆нтїохі́анинъ ᲂу҆́бѡ бѣ̀ ро́домъ, вра́чь же хи́тростїю, и҆ внѣ́шнѣй премꙋ́дрости мно́гъ, не то́чїю же, но и҆ є҆вре́йское наказа́нїе и҆звы́къ до конца̀, во і҆ерꙋсали́мъ прише́дъ, є҆гда̀ гдⷭ҇ь на́шъ ᲂу҆ча́ше. Ꙗ҆́коже нѣ́цыи реко́ша: и҆ тогѡ̀ бы́ти ѿ седми́десѧтихъ а҆по́стѡлъ, и҆ ѿ ме́ртвыхъ воста́вшꙋ хрⷭ҇тꙋ̀, срѣ́сти съ клео́пою. Возне́сшꙋсѧ же гдⷭ҇ви, и҆ па́ѵлꙋ вѣ́ровавшꙋ бы́ти соше́ствена, и҆ послѣ́дователѧ томꙋ̀, глаго́лю, па́ѵлꙋ. И҆ ᲂу҆̀бо списа́въ є҆ѵⷢ҇лїе со всѧ́кимъ и҆звѣ́ствомъ, ꙗ҆́коже и҆ са́мое то̀ нача́ло є҆гѡ̀ ѡ҆б̾ѧвлѧ́етъ, по пѧтина́десѧтихъ лѣ́тѣхъ хрⷭ҇то́ва вознесе́нїѧ. Пи́шетъ же къ ѳео́фїлꙋ сѷгкли́тїкꙋ сꙋ́щꙋ и҆ кнѧ́зю: є҆́же бо держа́вный, на кнѧзѣ́хъ и҆ и҆ге́мѡнѣхъ глаго́лашесѧ. И҆ па́ѵелъ речѐ ко и҆ге́мѡнꙋ фі́стꙋ: держа́вный фі́сте. И҆ всѧ́къ человѣ́къ бг҃олюби́вый, держа́вꙋ над̾ страстьмѝ воспрїи́мъ, ѳео́фїлъ є҆́сть держа́вный, си́рѣчь бг҃олю́бецъ, и҆́же и҆ досто́инъ є҆́сть пои́стиннѣ слы́шати ст҃а́гѡ є҆ѵⷢ҇лїа. Тридесѧтолѣ́тенъ ᲂу҆́бѡ сы́й гдⷭ҇ь крести́сѧ, поне́же то́й во́зрастъ соверше́нный: въ не́мъ человѣ́къ є҆́сть и҆лѝ и҆скꙋ́сенъ и҆лѝ неискꙋ́сенъ. Родосло́ви бо того̀ лꙋка̀, и҆ воз̾ѻпѧ́ть матѳе́й ꙗ҆́кѡ да ꙗ҆ви́тъ, ꙗ҆́кѡ и҆́же ны́нѣ роди́выйсѧ по пло́ти, ѿ бг҃а є҆́сть. Ви́ждь ᲂу҆́бѡ родосло́вїе, ка́кѡ соверша́етсѧ на бг҃а: и҆ ꙗ҆́кѡ да ᲂу҆вѣ́мы, ꙗ҆́кѡ всѐ є҆́же посредѣ̀ ѻ҆ц҃а̀, къ бг҃ꙋ возведе́тъ, и҆ сы́ны твори́тъ, сегѡ̀ ра́ди воплоти́сѧ. И҆́мать же и҆́но рещѝ, не вѣ́ровашесѧ рождество̀ гдⷭ҇не, поне́же безсѣ́менно сꙋ́ще: хотѧ̀ ᲂу҆́бѡ ꙗ҆ви́ти благовѣ́стникъ, ꙗ҆́кѡ и҆ и҆ногда̀ без̾ сѣ́мене бы́сть человѣ́къ, ѿ до́льнихъ восхо́дитъ ко а҆да́мꙋ, и҆ къ бг҃ꙋ, то́чїю не глаго́лѧ на́мъ: а҆́ще не вѣ́рꙋеши, ка́кѡ вторы́й а҆да́мъ бы́сть без̾ сѣ́мене, взы́ди мѝ ᲂу҆мо́мъ къ пе́рвомꙋ а҆да́мꙋ, и҆ ѡ҆брѧ́щеши того̀ без̾ сѣ́мене бы́вша ѿ бг҃а, и҆ про́чее не невѣ́рꙋй. И҆́щꙋтъ же нѣ́цыи, ка́кѡ ᲂу҆́бѡ матѳе́й і҆ѡ́сифа і҆а́кѡвлѧ глаго́летъ бы́ти сы́на, лꙋка́ же и҆лі́и; не возмо́жно же тогѡ́же двѣма̀ ѻ҆тцє́мъ бы́ти сы́на. Глаго́лѧ ᲂу҆́бѡ къ семꙋ̀: ꙗ҆́кѡ і҆а́кѡвъ и҆ и҆лі́й є҆динома́терни бра́тїѧ, и҆́ногѡ же и҆ и҆́ногѡ ѻ҆тца̀. Оу҆́меръ ᲂу҆́бѡ и҆лі́й безча́денъ, приве́дъ женꙋ̀ є҆гѡ̀ і҆а́кѡвъ дѣтотвори́тъ ѿ неѧ̀. И҆ та́кѡ глаго́летсѧ: і҆ѡ́сифъ і҆а́кѡвль, сы́й сы́нъ по є҆стествꙋ̀, и҆ и҆лі́и по зако́нꙋ. І҆а́кѡвъ ᲂу҆́бѡ є҆стество́мъ того̀ родѝ: и҆ по и҆́стинѣ и҆ по є҆стествꙋ̀ про́чее сы́нъ тогѡ̀ є҆́сть, и҆лі́и же по зако́нꙋ то́чїю бы́сть сы́нъ. И҆́бо зако́нъ повелѣва́ше, а҆́ще кто̀ ᲂу҆́мретъ безча́денъ, сегѡ̀ женѣ̀ спрѧга́тисѧ бра́тꙋ є҆гѡ̀. И҆ є҆́же ѿ негѡ̀ ро́ждшеесѧ, мни́мо сꙋ́ще ᲂу҆ме́ршагѡ, а҆́ще и҆ по є҆стествꙋ̀ жива́гѡ бы́сть. Тѣ́мже до́брѣ благовѣ́стницы глаго́лютъ, и҆ не сопротивлѧ́ютсѧ. Матѳе́й ᲂу҆́бѡ є҆сте́ственнаго ѻ҆тца̀ і҆ѡ́сифова восписꙋ́етъ: лꙋка́ же и҆́же по зако́нꙋ ѻ҆тца̀ є҆гѡ̀ вмѣнѧ́етъ, си́рѣчь и҆лі́и: ꙗ҆́кѡ да ꙗ҆вѧ́тъ ѻ҆боѝ, ꙗ҆́кѡ сегѡ̀ ра́ди роди́сѧ гдⷭ҇ь, ꙗ҆́кѡ да є҆стество̀ и҆ зако́нъ ѡ҆свѧти́тъ.
This is a translation and has a separate copyright status from the original text. The license for the translation applies to this edition only.
