Спаспорубса Потребобщество...

by Коми.

Спаспорубса Потребобщество...  (1926)  Коми.

Гижан кад: 1926, Йӧзӧдан во: 1926. Ӧшмӧс: Ордым. 1926. №1.

Спаспорубса Потребобщество.

Во гӧгӧрӧн ӧтик морт весиг абу пырӧма пайщикӧ, ӧтик куимур весиг абу содӧма паевӧй капиталӧ. Дӧза эськӧ колӧ капиталъяс да пайщик лыд содӧмыд, медым кооперативыд ёнмасджык, да тыдалӧ Правленньӧыс омӧля та йылысь тӧждысьӧма.

Важ паевӧй уджйӧз чукӧрттӧм. Вит шайта пай вылӧ петӧм могысь сёрни эз на кыпавлы.

Нем видзтӧг уна шыблалӧма абутӧм сьӧмъястӧ кытчӧсюрӧ: письмӧ, телеграм вылӧ видзӧма 153 шайт да 87 ур, вексельяс серти прӧчент вылӧ видзӧма 421 шайт да 22 ур, тӧвар вайӧмысь мынтӧма 553 шайт да 51 ур да мукӧдлаӧ.

Кулӧмдінса Потребобщество.

Став капиталыс (сьӧмыс) падмӧма: имуществоӧ пырӧма 2861 шайт да 25 ур, уджӧн тӧвар сеталӧмаӧсь 5638 шайт да 13 ур дон.

Дӧза эськӧ мукӧддырйи колӧ тӧвартӧ ньӧбыштны да, он буракӧ другӧн босьт.

Мый вӧчан сэки? Лоӧ удждысьны либӧ уджӧн ньӧбасьны, вексельясӧн мынтысьны.

Сы помысь рӧскодъясыд содӧны, тӧвар гӧгӧрыд гартчӧны — тӧварыд донсялӧ.

Мордінса Потребобщество.

Тайӧ во джынйӧн жебмӧма: уджӧн сеталӧмаӧсь тӧвар 7138 шайт да 17 ур дон, кытчӧсюрӧ видзӧмаӧсь 937 шайт да 79 ур. Сійӧ рӧскодыс усьӧ тӧвар вылӧ, сы вӧсна тӧвар донсялӧ.

Счетовод уджалӧ няйта, лёка. Сы ногӧн содтӧд (наложенньӧ) тӧвар дон вылӧ лоӧ сӧмын 10,3%, а кутан кӧ лючки артавны — петӧ унджык.

Босьтам со: Чӧддінса отделенньӧын тӧвар кольӧма, ас доннас кӧ артавны, 736 шайт дон, содтӧд сы вылӧ лӧсьӧдӧма 232 шайт, мӧд ногӧн кӧ, — 31% саяс.

Гамса Потребобщество.

Бӧръя во джынйӧн тӧдчӧмӧн ёнмис, кок йылӧ сувтіс. Тӧвар дон вочасӧн лэдзӧ. Обсоюзкӧд кӧртасис — векджык сылысь кутіс ньӧбасьны: тӧвар паськӧдӧм сылӧн содіс 70% мында важ вузасьӧм сертиыс, босьтасьысьяс вылысь важ уджйӧзсӧ 1229 шайт саяс чукӧртіс, аслыс лавка вылӧ выль керка лэптіс.

Эмӧсь, дерт, и лёкинъяс на: паевӧй уджйӧз абу ставыс чукӧртӧма, ньӧбасьӧмны корсюрӧ частнӧй тӧргӧвечьяслысь да мукӧдтор.

Коми.