Слово любьве

From Wikisource
Jump to navigation Jump to search
Слово любьве,
стихь стефана лаꙁаревича деспота срьбьскаго
This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.


Слово любьве,
стихь стефана лаꙁаревича деспота срьбьскаго.


Стефань деспоть сладчаишомѹ и любьꙁьнѣишомѹ и срьдьца моѥго неѡтлѹчьномѹ и много сѹгѹбо вьжделѣньномѹ и вь прѣмѹдрости обильномѹ, царствїа моѥго искрьнѥмѹ .їме рекь. о господи любьꙁьное цѣлованїѥ, вькѹпѣ же и милости нашеѥ нескѹдноѥ дарованїе.

Лѣто и веснѹ господь сьꙁда, ꙗкоже и пѣвьць рече, вь нихьже и красоти многыѥ, пьтицамь скороѥ и веселїа испльнь прѣлѣтанїѥ, и горамь врьхы, и лѹговѡмь пространьства и польскыѥ ширѡти, и вьꙁдѹха тьнькаго дивньными нѣкїми гласы оглашенїѥ, ꙁемльнаа же дароносїа ѥже цвѣтовь ѥже благоѹханїа и ꙁлаконосьноѥ, нь и самого чловѣчьскаго ѥстьства обновлѥнїѥ и вьꙁыгранїѥ достоино кто исповѣсть;

Обаче вьса сиꙗ и ина чюдодѣлїа божїа, ꙗже и остроꙁрительныи ѹмь сьꙁрьцовати не довлѣѥть, любовь прѣвьсходить, и не чюдо, богь бо любовь именѹѥть се, ꙗкоже рече їѡань громовь.

Вьсакаа льжа вьмѣщенїа вь любви не имать, каинь бо тѹждїи любве рече авелѹ: иꙁыдевѣ на полѥ.

Острѡ нѣкако и бистротечьнѡ дѣло любьве, вьсакѹ добродѣть прѣити могѹще.

Лѣпотьнѣ сию давидь ѹкрашаѥть ꙗко мѵро, рече: на главѣ сьходещеѥ на брадѹ аароню, и ꙗко рѡса аерьмоньскаа сходещїа на горы сїѡньскїе.

Юноше и дѣвы, кь любвамь прикладнїи, любовь вьꙁлюбите, нь правѣ и неꙁаꙁорнѣ, да не нѣкако юнотьство и дѣвьство поврѣдивьше, имьже ѥстьство наше кь божьствномѹ присваѥть се, божьствноѥ негодѹѥть. Не ѡскрьблꙗите, рече апостоль, дѹха светаго божїа имьже ꙁнаменасте се, ꙗвѣ ꙗко вь крьщенїи.

Бѣхѡмь вькѹпѣ, и дрѹгь дрѹга блиꙁь, или тѣлѥси или дѹхомь, нь аще горы, аще рѣкы расцѣпише нась, давидь да речеть: горы гельвѹнскые да не сьнидеть на вась ниже дьждь ниже рѡса, ꙗко саѹла и їѡанаѳана не сьхранисте. Ѡ беꙁлобїе давидово, слышите царїѥ, слышите, саѹла ли плачеши обрѣтеньныи? Ѡбрѣтохь бо, рече богь, давида, мѹжа по срьдьцѹ моѥмѹ.

Вѣтри же да прираꙁеть се рѣкамь и да иꙁьсекнѹть, ꙗкоже при мѡѵсеи море, ꙗкоже прї їсѹсѣ сѹдыи кївѡта ради їѡрьдань.

Еще да сьвькѹпимь се, еще да ѹꙁримь се, еще любовьнѣ да сьѥдинимь се о тѡмь самомь христѣ боꙁѣ нашемь, ѥмѹже слава сь ѡтьцемь и сь светымь дѹхѡмь вь бесконьчьныѥ вѣкы. Амїнь.


This work was published before January 1, 1929, and is in the public domain worldwide because the author died at least 100 years ago.