Сиктса зон

by Размыслов Ананий Прокопьевич

Парма ягын, карсянь ылын,
Кӧні пыр зэв лӧнь,
Ичӧт сикт эм вӧлӧк вылын —
Ӧтка скӧнь.

Кыдз пу дорӧ, кӧні луд выв,
Помасьӧ кӧн сикт,
Быд рыт волӧ сэтчӧ гудӧк,
Быд рыт дзик.

Гудӧк ворслывлӧ зэв нора.
Тӧдчӧ — шогсьӧ зон.
Мыйкӧ сьылӧ, мыйкӧ корӧ
Гудӧк тон.

Сійӧ сьӧлӧмшӧрсӧ виччӧ —
Ломзьӧ морӧс выв.
Тӧвнас ылӧ карӧ лэччис
Сылӧн муса ныв.

Бӧръя рытӧ сійӧ шуис:
— Вен тэ сьӧлӧм шог,
Водзӧ мунны бурджык туйӧд
Пукты водзад мог.

Велӧдча да татчӧ вола,
Аддзысям на ми...
Таво медбӧръяысь вылӧ
Сет мем ки.

Пыр на гудӧк ворслывлывлӧ,
Нор зэв ворсанног.
Том зон частӧ шогсьывлывлӧ —
Муса ныв оз лок.

Важӧн кыдз пу корсӧ вежис,
Тулыс коли дзик.
Том зон подӧн карӧ лэччис,
Колис ичӧт сикт.

Босьтіс гудӧк, пельпом вылас
Волысаліс кӧв.
Аддзӧдлыны карысь нылӧс
Ковмис сылы зэв.

__________

Карын мича ныв эз виччысь
Сиктӧ кольӧм зон.
Верӧс сайӧ велӧдчигӧн
Муніс кольӧм во.

Сэтӧр синъяс лэдзӧ муӧ.
Лэдзӧ сьӧд синкым.
Сиктса зонлы тадзи шуӧ:
— Кежис туйясным.

Верман кӧ, вай менӧ вунӧд, —
Сиа шуда нэм.
Мича нывъяс чужан муын
Метӧг уна эм.

Вӧльнӧй муыс тай зэв паськыд —
Мӧдкӧд оз ло шог.
Мун да эн жӧ сэсся казьтыв
Менӧ омӧль ног...

Воши зонлӧн томлун эбӧс,
Воча кыв эз сюр.
Морӧс вылӧ надзӧн лэдзис
Кудриа сьӧд юр.

Курыд нюм пыр сэсся кайтіс:
— Гажтӧм Ичӧт сикт...
Курсъяс вылӧ пырны чайта, —
Лоа тракторист.

Куті лача... Сьӧлӧм косьті,
Виччыси кык во.
Тайӧ тулыс гажтӧм босьтіс,
Мыйла дыр эн во.

Ӧні казялі ме вӧлись —
Эг тай муса вӧв.
Пельпом вылын гудӧк кӧлыс
Сьӧкыд лоис зэв.

Важ моз овны лоис мустӧм,
Важ моз овны — шань!
Лоа медбур трактористӧн
МТС-ын тан.

Муслун тэ дінӧ он пактав,
Сійӧс ачыд тӧд...
Лоас муса меным трактор,
Кыдзи вӧлін тэ...

__________

Лун шӧр пӧсьсӧ тӧвру венӧ,
Ывлаыс зэв шань.
Помтӧм муяс, помтӧм енэж,
Быдмӧ помтӧм нянь.

Мыйкӧ кузь лунтыр сэн варгӧ,
Оз и дугдыв тай.
Мича шобді вундӧ, вартӧ
Му вылын комбайн.

Гыӧн ворсысь сюяс водзын
Тірзьӧ потшӧс сер.
Нюмъялӧ дзик шонді мозыс
Том ныв — комбайнер.

Радлун том нывкалы восьтӧ
Сьыланкыв задор...
Коді сэтшӧм том да востер
Трактор вылас морт?

Чужӧм вылыс гажӧн ыпйӧ,
Енэж кодьыс дон.
Тайӧ... Тайӧ — Ичӧт сиктысь
Гудӧкасьысь зон.