Валда ян/1928/01/Сембя масторонь трудяй аваннь празднек

From Wikisource
Jump to navigation Jump to search
Валда ян (1928), № 1, 8-ця Мартста edited by Шотин И. В.
Сембя масторонь трудяй аваннь празднек
Валда ян. Сокай ломаннь журнал. Нолдаец "Од веле" газетать редакцияц. — № 1, 1928 кизоня, 8-ця Мартста. — с. 1
[1]
Валда ян 1928-01 03стр изобр1.jpg
Сембя масторонь трудяй аваннь празднек.

Эрь кизонда 8 марцта эрьси авань празднек. Тя од празднек шить, конань лемоц сембя масторонь коммунистическай авань ши — трудяй аватня кармасть тиеньдемнза нингя 1911 кизоста.

Клара Цеткина ялгась инголякигя няфтезя тя шить.

Капитализмань масторга трудяй аватня тя шить эзда варчесазь и арьсесазь: мезя тийф цебярь синнь эряфсост и мезя синць тийсть, штоба аватненди лангстост сталмоть и сатомс ломаннь прават.

Аньцек совецки государстваса, тиеньдеви од эряф социализма, аньцек тяса рабочай и сокай аватненди максф сембя праватня — теест эряви лувондомс свободна тийф тевснон.

Кодама атвед кулихть трудяй аватня буржуазнай государствава?

Германияса, Англияса, Америкаса нужа шись кассь, сядонга лама арасть работафтома авада.

Францияса мянь тянис аватненьди исть макс кочкама прават. Кальдявдонга кальдяв аватнень эряфсна Китайса. Клара Цеткина ялгась корхтай: „аф азмошка ужялхть Китаень аватня, конат стака тевса работахть заводга, фабрикава 56 киза шабаснон мархта. Буржуазнай масторга кой мезя цебярь тийф аватненьди аньцек валса, а тевса тиеви пара мзяра тиеви минь коньдямонок революция. Но аватня апак лотксек тюрихть эсь праваснон инкса.

Лама масторга йотасть забостовкат, коста аватня кемоста ащесть эсь ширеснон инкса.

Китайса лама тьожянь ава путозь пряснон революциять инкса.

Лиякс ащи миння тевнеськ 8 мартти. Коммунистическай партиясь и Совецки власць лама тийсть аватненьди пара.

Катк сембя масторонь капиталистня ванцазь, кода Совецки Союзса авась и сияк мокшаваськя строяй эсь государстванеськонь эса и моли социализмань кити.

Тя кизоти мокшавать эряфоц цебярьгоц. Беднячкатненьди лама максф кредитта, ламонь кяцта налок аф сявихть. Кооперативга — авань пайщекня касыхть, лама пай панф беднай ава инкса. Цьомбарнянь уездаса, Пичека велеса тийф авань велехозяйствань артель.

Рамафт кафта мушконь пулодмат и кафта стама машинат — нят машинатнень перьф кармахть пуромма артелхть.

Совецки власць лезды авати свободнай пингя работама парада: тиеньди идень яслят, площадкат. Ков киза, тов ясляда арси сяда лама 1926 кизонда идень площадкада улсь 9, а тя кизоня 17. Тя кизонда первай мокшерзя велева панчфт кафта идень сатт. Шабатня тонадыхть тоса цебярь и эздодост лисихть од эряфонь тиихть.

Лама кармасть тонафнема авада стирдя, мелямба сембя тонафнихнень эзда улсть 10 процетт, тяни 13. Велева панчф 40-ка авань ликпункт.

Ленин ялгать, заветонзон изезь кад и мокшаватня, конат сьорматфнихть партияв и комсомолу. Совеца, кооперативса, лездома комитеца аватня работахть активна. Аф лядондыхть фталу и военнай тонафтомать эзда.

Вага кода мокшаватневок строяхть социализма.

Март 8 шиста вишкопцаськ работанеськонь и йотафцаськ эряфс 15 партиянь пуромксть путфксонзон. А омба масторонь ава ялганекя сяда вишкста кармахть тюрьма капитализмать мархта.

Шумбра улеза коммунистическай партиясь, конац вяцы авать од, валда эряфти!



Сембя масторонь авань коммунистическай шиста СССР-нь рабочай и сокай аватня пара арьсихть омба масторонь трудяй ава ялгаснонды.