Селькоръяс коми художествоа литература йылысь
| Селькоръяс коми художествоа литература йылысь (1929) |
| Гижан кад: 1929, Йӧзӧдан во: 1929. Ӧшмӧс: Ордым. 1929. №4. |
(Селькоръяс 3-ӧд обласьтувса совещанньӧлӧн резолюция)
1. Коми художествоа литература отсалӧ коми уджалысь йӧзлы тэчны выль нога овмӧс да олӧм — социализм.
2. Медыджыд могъясыс коми художествоа литературалӧн — кыпӧдны культурасӧ коми уджалысь йӧзлысь, тӧдмавны ӧнія олӧм, петкӧдлыны коми уджалысьяслы социализмлань мунан туйсӧ (промышленносьт кыпӧдӧм, колхозъясӧ ӧтувтӧм, выль олӧм тэчӧм, енлы эскӧмкӧд вермасьӧм, сідзи водзӧ).
3. Коми художествоа литература тайӧ бӧръя вояснас ёна быдмис, мичмис, шыляліс. Сӧмын тайӧ абу на тырмымӧн. Пролетариат нога гижысьяслӧн коми ассоциация (КАПП) шлен лыднас, дай художествоа литература выннас абу на ыджыд. Ми эгӧ на вермӧй тырмымӧн сетны коми уджалысь йӧзлы коми художествоа литература.
4. Коми селькоръяслӧн 3ʼ совещанньӧ сувтӧдӧ быд селькор водзын мог отсасьны КАПП-лы быдтыны выль гижысьясӧс коми уджалысь йӧз пӧвстысь. Водзмӧстчысь коми селькоръяслы колӧ кутчысьны паськӧдны коми художествоа литературасӧ коми йӧз пӧвстӧ. Селькоръяс сетісны нин выль том гижысьясӧс: Спира Прокӧӧс, Сандрик Ёгорӧс, Выль Пашӧс, Кон. Ӧльӧс да мукӧдӧс. Сӧмын тайӧ оз на тырмы. Дас пӧв тайӧ выль гижысь лыдсӧ колӧ ыдждӧдны.
Водзӧ кежлӧ выль коми гижысьяс вермасны петны медся ёнасӧ коми селькоръяс пӧвстысь.
5. Ӧні олӧмыс корӧ татшӧм коми художествоа литература:
а) сиктса сценаяс вылын ворсанторъяс (драмаяс, комедияяс, операяс, водевильяс да мукӧд сикас пьесаяс);
б) очеркъяс, висьтъяс, романъяс, поэмаяс;
в) челядьлы коми художествоа литература;
г) газетъясӧ да журналъясӧ ӧнія олӧм йылысь дженьыдик, гажа да мича гижӧдъяс (фельетонъяс, очеркъяс, кывбуръяс, дженьыдик висьтъяс).
6. Коми художествоа литература оз вермы быдмыны ставнас сӧмын оригиналь (асланым коми гижысьяслӧн) литератураысь. Бурджыкторъяссӧ колӧ тшӧтш босьтны и роч да загранича художествоа литератураысь (медсясӧ пролетариат нога гижысьяслысь) да бурджыка, сямӧнджык вуджӧдавны коми кыв вылӧ.
7. „Ордым“ журналлӧн тиражыс (700 экз.) вывті на ичӧт. Быд селькорлы колӧ лоны „Ордым“ лыддьысьӧн, зільны сійӧс сюйны коми сиктъясӧ. Миян лозунг: быд 50 керка вылӧ — ӧти „Ордым“ журнал. Пуктыны могӧн — тайӧ куим тӧлысьнас лэптыны „Ордымлысь“ тиражсӧ 1500 экземплярӧдз.
8. „Ордымын“ колӧ лэдзны художествоа гижӧдъяс колхозъясӧ ӧтувтӧм да сэні выль олӧм тэчӧм йылысь, видз-муяс бурмӧдӧм йылысь, вӧр лэдзӧм да кылӧдӧм йылысь, выль пабрик-заводъяс стрӧитӧм йылысь.
9. „Ордымӧ“ быд номерын лэдзны челядьлы художествоа литература юкӧд. Селькоръяслы колӧ зільны сетны сэтчӧ колан художествоа гижӧдъяс.
10. „Ордым“ журналӧ колӧ тшӧтш лэдзны корсюрӧ выль сьыланкывъяс нотаясӧн, медым сиктъясын вочасӧн велӧдчисны мичаа сьывны.
11. „Ордым“ редакция водзын сувтӧдны мог — донтӧммӧдны журналыслысь донсӧ. Коми нига лэдзанінлы колӧ зільны донтӧммӧдны художествоа литературасӧ, мед эськӧ крестьянаыс ёнджыка сійӧс ньӧбисны.
12. Коми художествоа литератураын колӧ пондыны гижны унджык сикас гижӧдъяс, мед коми уджалысьяслысь ловсӧ лэптыны быдсяма нога гижӧдъясӧн. Тайӧ могсӧ оз позь олӧмӧ пӧртны, оз кӧ став коми гижысьясыс пыдісяньджык тӧдмасьны роч да заграничаса художествоа литературакӧд да оз кӧ налысь сюрӧс тэчӧм ногсӧ, формасӧ сюйны коми литература пытшкӧ.
13. Быд печатьысь петӧм гижӧд либӧ нига колӧ сетны уджалысь йӧз критика улӧ. Медся нин тайӧ колӧ коми художествоа литератураын. Селькоръяслы колӧ зільны лӧсьӧдны критика художествоа литература вылӧ. Гижны да мӧдӧдны ассьыныс шыӧдчӧмъяссӧ газетъясӧ да журналъясӧ.
14. Быд селькорлы колӧ тӧдмасьны КАПП мӧд конференцияса шуӧмъяскӧд.
15. Местаяс вылын селькоръяслӧн колӧ отсавны лӧсьӧдавны литература кружокъяс.
16. Сиктъясын стенӧ ӧшӧдан газетъяс лэдзӧм кындзи, кӧні выныс судзсьӧ, колӧ тшӧтш лэдзны киӧн гижӧм литература журналъяс.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- it was anonymously published before January 1, 1954 (more than 70 years ago).
This work is in the public domain in the United States because it was first published outside the United States (and not published in the U.S. within 30 days), and it was first published before 1989 without complying with U.S. copyright formalities (renewal and/or copyright notice) and it was in the public domain in its home country on the URAA date (January 1, 1996 for most countries).
This work was in the public domain in Russia on the URAA date January 1, 1996, according to the Law 09.07.1993 No 5351-1 which was enacted on that date:
- it was anonymously published before January 1, 1946 (more than 50 years ago from 1/1/1996).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 94 years or less since publication.
Public domainPublic domainfalsefalse