Сезьпызь сиисьёс

Сезьпызь сиисьёс Калык выжыкыл

Поттэмын: 1880. Источник: Удмурт выжы кылъёс: Вотские сказки / собрал И. Яковлев. — Казань: Изд. Казан. вотск. изд. подотдела, 1920. — С. 2—3.

Огпол куать муртъёс куать ӟук сезьпызь нуса мыно вылэм. Мынон дыръязы кунокае пыриллям.

Отын одӥг салдат та сезьпызь нуисьёслэсь юам:

«Тӥ мар нуиськоды?» — шуэм.

Соос вераллям:

«Ми сезьпызь нуиськомы», — шуиллям.

Соос асьсэос сезьпызез сиыны тодымтэзы. Солдат соослэсь сезьпызьзэс курем: «Вае мыным ог сузь гинэ сезьпызьдэс», — шуэм.

Соос сётӥллям. Та солдат тэркые ву понэм, собере отчы пызь понэм но сураса сием.

Та муртъёс салдатлэсь, кызьы сииськод шуса, юаллям. Салдат верам: «Тэркые ву понӥ, вуаз сылал понӥ, собере пызен сураса сии, озьы ческыт луэ», — шуэм.

Таос кунокаысьтызы кошкон дыръя одӥг пуд сылал басьтӥллям.

Кам вылтӥ потыса мынон дыръязы таос, одӥг люкмес адӟыса, отын сезьпызь сураса сиёно кариллям.

Одӥг каб пызьзэс басьтыса люкмесэ ӝоктӥллям. Ву нярак нуэм. Кизер луиз шуса нош ик одӥг каб вайыса ӝоктӥллям. Ву нош нуэм. Нап уз на луы на шуса нош одӥг ӝоктӥллям. Озьы но нап луымтэ.

Озьы вань сезьпызьзэс люкмесэ ӝоктыса быдтӥллям. Собере нап луымтэысьтыз одӥгез сураны шуса ву пушкы люкмесэ тэтчем. Тэтчем но «бугль, бугль» каре, пе.

Огназ сиыса быдтэ ини шуса, кыкетӥез тэтчем. Соиз но «бугль!» каре, пе. Чалякгес куиньметӥез тэтчем; куиньметӥез сьӧры ньылетӥез, ньылетӥез сьӧры витетӥез, витетӥез сьӧры куатетӥез — озьы ваньзы тэтчаса, вуэ выйыса бытмиллям.