Священная история Ветхого завета (мокшень)/О/47
| ←46. Еврейскяй царствать кафтува явомац. | Священная история Ветхого завета на Мокшанском наречии Мордовского языка (1900) by 47-це главась. |
48. Илиять менели сявомац.→ |
| Священная история Ветхого завета на Мокшанском наречии Мордовского языка. Издание Православного Миссионерского Общества. — Казань, типо-литография Императорского университета, 1900. — с. 59—62 |
47. Пророк Илия.
Израильскяй царствась кирдсь кафта сятт ведьгемонь сисем кизот. Сонь эсонза комсь оцязороль. Синь сембе аф цебярьхтельхть — сюконякшнельхть идолонди. Сембода аф цебярь Израильскяй оцязорсель Ахавсь. Ахавсь ърьвяясь Сидонскяй оцязорть стиренц лангс, конань лемоцоль Иезавель. Иезавельсь шачема вастстонза тусь Израильскяй царствав идол — Ваал дъ кармась сембонь кошяряма Ваалти озондома дъ сюконякшнема. Шкайсь народть каендафтома кучсь пророк Илиять. Илиясь сась Ахавти дъ кяжиста мярьгсь: тонь аф цебярь эряфцень инкса дъ тонь наротцень аф цебярь эряфонц инкса, аф ули пизем тонь царствасот сенярс, мъзярс мон аф озондан Шкайти пиземонкса. Тяда меле Илиясь тусь Иорданть омбокс дъ кармась эряма аф оцю ляйня ваксса, коза кокнайхне канельхть теенза эрь шиня кши, а симондель сон ся ляйняста. Кизода меле ляйнясь коськсь. Шкайсь мярьгсь Илияти тумда Сарептав (ош) фкя вдовой авань пяли.
Сарептав сувамста Илиясь васьфтсь фкя ава дъ анась кядьстонза ярхцама. Авась мярьгсь: монь илядсь аньцек курмось почфозе дъ кукшенняса аф лама ваезе; молян куду, сивсайнек снятнень цёразе мархта, а сальде арай куломс вачеда. Илиясь мярьгсь теенза: тят пель, арт пидек теень васенда кеворькс, а сальде эстить цёрацень мархта, — тонь аф машты парьнястот почфце дъ кукшеннястот вайце сенярс, мъзярс Шкайсь аф максы модать лангс пизем. Кода Илиясь мярьгсь, стане и ульсь: авать афоль машне почфоцка, ваецка. Илиясь кармась эряма ся вдовать пяле. Ся пингть ся авать кулось цёрац, Илиясь озондсь велькссонза Шкайти, и цёранясь эреклась[1].
Илиять Ахавти корхтамац топодсь: колма кизот пяле мархта ашель пизем. Ся пингть ётамда меле, Шкайсь мярьгсь Илияти: арт Ахавонди, Мон максан пизем модать лангс. Илиясь сась дъ мярьгсь Ахавти дъ сембе народти: ламос-ли тинь карматада шамордома кафта пильге лангс? весть озонтада Ваалти, омбоцеда виде Шкайти; канттама жертва, кона шкайсь максы менельста тол жертвать лангс, ся ули виде Шкайсь. Васенда кандсть жертва Ваалонь жрецонза. Жрецне анасть Ваалть кядьста тол жертвать лангс; синь жертваснон лангс ашезь пра менельста тол. Шоподем-бяли Илиясь тись жертвенник, мярьгсь шувомда жертвенникть перьф лотка дъ кайсефтсь пенгятнень лангс ведь, лоткть пяшкодемс, сяда тяст арься Израильтятне, што жертвенникти инголькиге путф тол. Сяда меле Илиясь кармась Шкайть кядьста толонь анама. Менельста прась тол, пълтазе сембе жертвенникть дъ косьфтазе лоткста ведть. Эста сембе Израильтятне прасть комада дъ ювадсть: виде Шкайсь Илиять Шкаец. Илиясь мярьгсь шавондомда Ваалть жрецонзон; сальде тага озондсь виде Шкайти; Шкайсь макссь пизем.
Иезавельсь, Ахавонь ърьвяц, мъзярда кулезе, што Ваалть жрецензон шавондозь, пякь кяжиясь Илиять лангс. Илиясь тусь Харив пандть пряс дъ кяшсь пещерас. Тоса сон кармась пяк ризнама Израильтятнень кувалмова, мес синь кадозь виде Шкайть. Шкайсь мярьгсь Илияти: Израильскяй народсь аф сембе кадомань Монь, улихть сисем тёжятть ломатть, конат ашесть сюконякшне Ваалти. Эста Шкайсь мярьгсь Илияти путомда эсь вастозонза прорококс Елисейть.
- ↑ Живондась.