Священная история Ветхого завета (мокшень)/О/07
| ←6. Адамть иденза. | Священная история Ветхого завета на Мокшанском наречии Мордовского языка (1900) by 7-це главась. |
8. Нойть иденза.→ |
| Священная история Ветхого завета на Мокшанском наречии Мордовского языка. Издание Православного Миссионерского Общества. — Казань, типо-литография Императорского университета, 1900. — с. 9—11 |
7. Потопа.
Къда ломаттне масторть лангса пяк раштасть, дъ Сифонь родонь ломаттне шорявсть Каин родонь ломаттнень мархта, синь сембе юкстазь Шкайть. Илядсь аньцек фкя цебярь ломань, конац Шкайть эзда пелель; сонь лемоцоль Ной. Шкайсь мярьгсь Ноенди: азк ломаттненди: эряст цебярьста дъ тяст тиенде сяда лама грехт, каендамс Мон максан теест сяда комсь киза, а къда синь аф каендайхть тя пингть, эста Мон сембонь синь юмафтсайнень потопаса.
Ной азондозень ломаттненди Шкайть валонзон. Ломаттне ашезь кулхцонда сонь дъ ашесть каенда. Эста Шкайсь мярьгсь Нойти: тихтть оцю кораболь дъ сувак эзонза авацень мархта, сявить мархтот колмоцке эсь цёратнень аваснон мархта, дъ нинге сяфть мархтот цебярь нармотть, жуватат дъ зверьхть сисемонь пар, а аф цебярьда кафтонь пар. Нойсь тись, кода теенза мярьгсь Шкайсь дъ сувась корабольть потмос. Кодак Нойсь сувась корабольть потмос, эстокиге тусь вишке пизем дъ пизесь нилегемонь шит, нилегемонь вет. Ведсь пяшкодезе сембе масторть дъ ваяфтозень сембе масторть лангса эряйхнень. Илядсь аньцек Ной, дъ конат сонь мархтонзольхть корабольса. Ведсь масторть лангса ащесь сяда ведьгемонь ши. Сальде кармась прама. Нойть кораболец лоткась Арарат лемса панда пряс. Нойсь содамс — коськсь масторсь али эзь коське, нолдась корабольть потмоста варси. Варсись ашезь мърда меки корабольти. Сисем шида меле Нойсь нолдась гулю. Гулюсь эстокиге мърдась меки корабольти; масторть лангста ашезь му коське васта эстиенза валгомс. Нинге сисем шида меле Нойсь танга нолдась гулю, гулюсь иляденди мърдась меки корабольти, дъ кандсь кургсонза лопа мархта шуфта тараткя. Тянь коряс Нойсь содазе: што масторсь коськсь, дъ шуфттневок лопаясть. Тяда меле Нойсь колмоцеда нолдась гулю, ся гулюсь меки корабольти ашезь мърда. Тяда меле Шкайсь мярьгсь Ноенди корабольть эзда лисемда. Кодак Нойсь лись корабольть эзда, кандсь Шкайти озкс, потопать эзда ваноманкса. Шкайсь пърняндазе сонь озксонц; баславазе Нойть дъ мярьгсь: иля тяфтама потопа масторть лангса мъзярдонга аф ули, тянь кувалмова кармай теенть лятфнема менельста атям ёнксь.