Сарай дорын уна тьӧс

by Аноним

Сарай дорын уна тьӧс  (1927)  Аноним

Гижан кад: 1927, Йӧзӧдан во: 1927. Ӧшмӧс: Ордым. 1927. №2.

Сарай дорын уна тьӧс,
Кирпичысь сьӧкыд абу.
Слӧбӧдаын уна зон,
Милӧй вылӧ зон абу.

Ӧшинь улам пу выйим,
Петала да керала.
Ӧшинь дорам зон выйим,
Пырала да окала.

Лӧсьыд, лӧсьыд Мозын ва,
Кӧдзыд ӧд купайтчыны.
Лӧсьыд, лӧсьыд милӧй друг,
Труднӧ ӧд янсӧдчыны.

Нывъяс ваӧ ин келӧ,
Ылӧ ӧд кылаланныд.
Чужӧй зонмӧс ин любитӧ,
Ылӧ ӧд нималанныд.

Мамӧ сет, мамӧ сет,
Уна ин сёрнит.
Дӧмыс кӧть ӧд мӧк,
Милӧй ӧд муса.

Лӧсьыд черитӧ кыйны,
Коді берӧгӧ локтӧ.
Лӧсьыд милӧй любитны,
Коді правду сёрнитӧ.

Ӧшинь улын гу выйим,
Ме сартасӧн мерайті.
Ас сиктын милӧй выйим,
Кызь шагысь ылын абу.

Миян Мозын абу джуджыд,
Ме сартасӧн мерайті.
Менам милӧй абу ылын,
Кӧмтӧм кокӧн пышъявлі.

Нывъяс вӧрӧ ин кайӧ,
Номъяс ӧд кокаласны.
Нывъяс вӧлӧсьтӧ ин петӧ,
Зонъяс ӧд шыграласны.

Ытшкыси да ытшкыси,
Пӧлать вылӧ лэбӧдчи.
Чайті кӧ ме милӧйӧс,
Вӧлӧма да, пызь мешӧк.

Мамӧ менӧ ругайтіс:
Кытчӧ чунькытштӧ воштін?
Ме висьталі сундукысь, —
Менам вӧлі зон ордын.

Менӧ мамӧ ругайтіс,
Кытчӧ платоктӧ воштін?
Ме висьталі джадж дорысь, —
Менам вӧлі зон зептын.

Менӧ мамӧ ругайтіс,
Кытчӧ часытӧ воштін?
Ме висьталі енкоись,
Менам вӧлі зон стенын.

Милӧй ю, милӧй ю,
Усьтӧдзыд тэ ин ю.
Усьтӧдзыд кӧ тэ юан,
Ме тэ саяд ог мун.

Гӧра дорын пельса выйим,
Зонъяс кокъяс мыськӧны.
Сэті нывъяс мунӧны,
Сійӧ васӧ юӧны.

Коля, Коля, окасям,
Кодісся ми полам,
Папӧ менам салдатын,
Мамӧ менам узьӧ.

Вокӧ рӧбит, вокӧ рӧбит, —
Ме вылӧ ин надейтчы.
Тэнад челядь дай баба,
Менам чужӧй сторона.

Тайӧ сэтӧр колӧ вотны, —
Сьӧд кисьмӧмӧй сэтӧрӧй.
Тайӧ зон колӧ любитны, —
Сьӧд синкыма зонъясӧй.

Тайӧ ӧмидз колӧ вотны, —
Гӧрд кисьмӧмӧй ӧмидзӧй.
Тайӧ зон колӧ любитны,
Алӧй вира зонъясӧй.

Сьӧд юбкаяс зэв дженьыдӧсь,
Еджыдысь ӧд он содты.
Зон кӧ нылӧс оз кутлы,
Ассяньыд ӧд он кутчысь.

Менам вӧлі гребёнка,
Пожъясигӧн вӧйи.
Менам вӧлі ӧти милӧй,
Война вылӧ уси.

Мӧдлапӧлын ыджыд мыр
Быд мунысьӧс ыдждӧдлӧ.
Слӧбӧдаын ӧти ныв
Став нывъяссӧ лӧгӧдӧ.

Мый нӧ гармоньыс оз ворс,
Али гӧлӧсыс абу.
Мый нӧ милӧй оз сёрнит,
Али вӧмаыс абу.