Валда ян/1929/01/Садонь гастяхне и синнь мархтост тюремась

From Wikisource
Jump to navigation Jump to search
Валда ян (1929), № 1 (5), Январь ков edited by Шотин И. В.
Садонь гастяхне и синнь мархтост тюремась
Валда ян. Эрьковонь общественно-политикань и веле-хоз. журнал. Журналсь моли Од Веле газетати питьнефтема лезксоньди. — № 1 (5), Январь ков 1929 кизоня. — с. 14—15
[14]

Садонь гастяхне и синнь мархтост тюремась.

Нингя прокс ловсь аф солай, а сад — азорсь шовдавань седихть валхни мелавонь пизотнень эса. Сьоксенда, кодак пяярихть лопатне или тялонда сери ловть ланга, аф так васень тунда, мзярс нингя исть лопас маренатне, пяк лац няевихть таратнень ланкса нюрьги коськя лопатне (ванк 1-ця рисункать). Мярьгат синь тоза повсть, кода аф нароком—бта вармась уфазнь. Но кармандярят валхнемост, синь ащихть кемоста, — кода мушка сяльгоняса сотфт. Тяфта марена лопатнень ашкорясазь и эсь парьхцисост соцазь „баярышница“ и „златогузка“ мелавонь сукскятня, тиихть потмозост пиза и тялонь перьф мянь тумдать самос эряхть тоса.


Кода юмахть (урадыхть) садонь гастяхне.

Садонь гястяхне урадыхть аньцек снярда, мзярда ярхцахть яца бризгаф лопада, панчфта или марьда.

Бризганьдярясайнек, мярьгомс, табак сокса или шокгара саноньца марена ситьнень или синнь алняснон, эста синь юмахть. Бризксемась эряви ушоптомс васень тунда, кодак солай ловсь и кизень перьф, мянь ловть прамос, бризксемс несккстьокаль.

[15]Васенця бризксемась тиендеви рана тунда, мзярда, маренатня нингя аф ушептыхть путькодема. Эста бризксесазь сатнень известкань лофцса, или шовор меднай и железнай купороз веца. Известкань лофца маренать ланкс можна бризгамс сняра, штоба тавадоволь сембя маренась известкань шюваня слойняса (кода ал-ловса). Тяса известкась аф аньцек юмафцынь маренать лангста гастяхнень и синнь алняснон и урматнень видьмоснон, но арялясы соннь долгоносикть эзда, конанцты известкань лофцть мархта аф пялеви марена путьфкскять кедняц. Сяда башка, известкась маренать акшопцы, а акша маренать шись аф пидесы. Но сембода оцю польза максы меднай и железнай купорозса бризксемась.

Медяницась. Кизонь кучкада медяницась марена тарад пенятнень ланкс путы алнят, конат тялонь перьфь ащихть таратнень ланкса. Рана тунда, маренань путькодема йоткста, нят алнятнень эзда касихть мединицать лефкскянза. Васенда кармахть шокшома путьконтнень сокснон, тоса покольнь маравихть лопатнень и панчфтнень ланкс Сяс панчфненди эрямс аш кода и синь васенда пужихть, тоса коскихть и мекпяльти прокс юмахть. Лопатнендингя тя дрянць тии пяк оцю кальдяв: сингя поваднайста аф кассовихть.

Бризганьдярасак мединицать железна купороз веца (2—3 фунт купорос 1 ведерка ветти), сон эздакигя юмай—урады Васень тунда железнай купорозса бризксемась юмафцынь аф аньцек медяницать алнянзон, сон сияк юмафцынь марена ситьненгя, синь алняснонга.

Кода анокламс табак соксь. Табак сокть анокламац аф пяк мудренай тев. Сявомс 400 грамм (1 фунт) курендама табак и нолдамс 4—6 шис ведерка вец. Сяда меля тя ветть 3—4 часть лакафтомс но лакамста коськи ветть эземс кайсемс одукс ведь. Лакафтомода меля педямс котф пачк. Тя соксь ули пяк вишкя (кемя), сяс бризксемода инголя сон эряви шорямс нингя колма ведеркат ведь мархта.

Кода анокламс сапонь вець. Кода сатови шонгара сапонь (зеленое мыло), эста ведерка лямбя вец шорямс 400 грамм тяфтама сапонь, а кда шонгара сапонь аф муви, эста сявомс сняража простой сапонь, пельса шюваняняста инзедемс лямбя веца — и сапонь вец анок.

Марена ситьня (тлясь). Соксенда марена ситьня таратнень ланкс путыхть алнят. Тунда алнятнень эзда лисихть сит, конат эзтакигя кармахть шокшема марена лопатнень и од тараштяктнень соксон. Марена лопатне сермахть, ашкодыхть, пяшкедыхть сида и лоткахть касомода. Станежа осалста касыхть од тараткятневок (вани -ца рис). Сокай ломатня ситьнень ильня мезькска аф путнесазь и аф тяряфнихть синь юмафтомс-ка. А ситнень юмафтомасна аф прокс мудренай тев. Ванцаськь, кода синь раштахть и кода синня эряма-ащема кайсна.

Сексенда путф алнятнень эзда тунда лисихть од синят. Васенда синь ярхцахть од путькотьфкскитнень эзда, тоса лопанятнень. Си лефкскятня курок касыхть и тиевихть паценясна. А паце мархта ситьня алнят аф путнихть, а лефхцозахть живой лефкст и аньцик сексе малати мекпяльдень поколениясь лефхцозамода лоткай и тараткятнень ланкс путы серай, почти равжа, пиндолды алнят. Лия кизонда марена лопатнень ланкс раштай сняра си, ильня кярьксокс фкефкянь ланкс маравихть. Приметасть, сиря маренатнень ланкса сить почти аф эряхть, синь кельксазь од маренанятнень. Кона маренать ланкса лама сида, ванат — тоса панжафненок арнихть — кода эф эфтихть. Аф прокс опытнай сад-азорхня думондахть, што сингя порихть лопатнень эса и кода маштыхть старандахть юмафтомс панжафненгя. Но панжафнень мархта тевсь аши прокс аф станя. Синь панчфта и лопада аф ярхцяхть, а потяхть ситьнень эзда ламбама сока, марьгомс кода лофца. Кармандяряхть поваднайняста ванома панжафнень меля, эста няйсак, кода синь усанясост котьфцазь сить конорнянц, а сить копорьса улихть стамка потянят, конатнень эзда моли ламбама сока и панжавось сонь нолсесы. Сяс синь и арнихть ситнень мельгя.

Тя, ламбама сокть сюнеда, ситьнень тьожанца сивсазь стамка сьормав унжанятня, конатненди рузкс мярьхихть „божья коровка“, а мокшетня тейнза хотя лем исть пут, но сонь кельксазь, особенно идьморхня, конать кунданьдяряхть тяфтама унжаня, ласьконтьфцазь кядь-лапшонь ланга и кизифнесазь: „пизем, или мани?“...

Марена ситнень можна юмафтомс шонгара сапоньца, табак сокса, или шовор газ мархта сапонь веца. Но бризксесь ситнень мархта тюремась стака, синь ашкоряф лопатнень потмоста аф бризгавихть. Сяс пяк сии лопатня эрявихть эшлемс кодама кодамс кели кядьгоняса. Лама си можна юмафтомс табак качамса.

Панчфонь пори унжась („Яблоневый цветоед“). Тунда маренань панжема пингоня ванат — кона панчфкясь панжи, а конац стак ашкордафста пужи и коськи (ванк ця рис.). Мес тяфта? Орадода кафта-колма тяфтама пужф панчфт и потмостост мутада тюжа сукскат, конат сивсазь панчф потмонят (ван. -ця рис.). Курок тя сукскясь панчфть потмоса шарксты куколкакс (-ця рис.). А сяда меля куколкать эзда лиси кувака нярь шовда тюжа унжаня.

Пяк оцю осал тии сад азорхненди тя панчфонь пори унжась. Сон гастяй сембя имичфнень эзда 30—40%.

Юмафтомс сойнь вов кода:

1) Путнемс маренатненьди кундама каркст (ванк -ця рис).

2) Эстакигя ловонь соламода меля, мзярс нингя изь кенерь путомс алнянзон, эряви шюкамс марена прять эзда: ацамсь маренать алу кодама келя (торпища или лия мезя) и байдеконяса вачкиемс таратнень ланга (бадекть пец улеза ашкоряф лоскоца, суконаса или кеньдя лоскоца, ато тапави марена суць). Вачкиемать эзда унжатня пиземкс пяярихть алу и эстакигя синь эрявяхть пуроптомс и кайсемс газ мархта ведеркас. Шюкадемс эряви рана шобдава и илять, мзярда унжатня ащихть шуфтомофста и аф лиевихть.

3) Пяк цебярь — эстакигя ловонь соломода меля вадемс маренатнень шонгара известкаса. Унжась известкав маренати алнянзон аф пуцынь. Тиендихть станянга: сатть разнай вастованза кадыхть колма ниля известкаса апак ватть маренат (оцю саца сяда лама), а лядыкс маренатнень ваденцазь. Апак ватть маренатнень ланга унжатня пуромихть маронь марон и эста синнь шукасазь и юмафцазь, кода азф сяда веря.