Бесән саптыҡ, бесән йыйҙыҡ,
Арба менән ташыныҡ,
Икәүләшеп сөкөрләшеп
Ҡышлыҡ запас яһаныҡ.
Үҙебеҙҙең яйыбыҙса,
Сәбәләнмәй юҡ-барға,
Эште эшләп өйрәнгәнбеҙ,
Шатланып һаулыҡ барға.
Йәштәр йылмайып ҡарайҙар,
Йәнәһе лә, беҙ – ҡарттар,
Эште үҙҙәренә бирһәң,
Оҡшамай беҙҙең шарттар!
Бахырҙарҙың көстәре бар –
Түҙемлектәре етмәй,
Беҙ эшләп өйрәнгән инде,
Кешенән ярҙам көтмәй!
Беҙҙең быуын –эшләп үҫкән,
Эште башлап ташламай,
Девиз да бит елле ине:
“Кем эшләмәй – ашамай!”
Дары әле сыланмаған,
Беләктәрҙең көсө бар,
Эшләйбеҙ ҡулдан килгәнсе –
Беҙҙә кемдең эше бар?!
Беҙҙең быуын эштән ҡурҡмай,
Бөтәһе лә уңғандар,
Совет тәрбиәһе алған,
СССР –ҙа тыуғандар!
