Рытъя лирика
Тувсов лунся горыс
Сынӧд пиӧ сылӧ.
Ломзьысь кыаыс —
Кыдз алӧй шӧвк.
Небыд шыӧн шувгис пожӧм
Кыркӧтш йылын,
Шевкъяліс руд визьӧн
Мӧдлапӧв.
Лӧсьыд, пӧсь удж бӧрти
Рӧмыд енэж улын
Лӧня мӧвпавны,
Кӧть мый йылысь эн босьт...
Талун... талун...
Нимкодь торъя мыла.
Талун артмӧ менам кывбур — ёсь.
Гӧгӧрво тэ менӧ,
Муса пожӧм,
Менсьым ӧтка мӧвпъяс
Тӧдысь ёрт.
Ӧні, ӧні уна кыпыд вожӧн
Сьӧлӧм шӧрсянь буждӧ вына шор.
Мед ме ӧткӧн дзоля,
Мед ме ӧткӧн ичӧт,
Сӧвет муыс,
Му шар вылас
Ыджыд зэв.
Абу вуджӧр ме...
Ударнӧй уджӧн гызьӧ
Миян киясын быд шы,
Быд мог, быд мӧвп.
Миян муса —
Выль гигантлӧн быдмӧм,
Вынӧн дзирдалысь Сӧветскӧй му!
Мед жӧ, мед
Историяыс кывлас
Миян уджъяснымлысь
Лов шы — шаг...
А талун тэкӧд
Сёрнита ме, ывла,
Тэнӧ чолӧмала,
Яла нитшка яг.
Тэныд, муса пожӧм,
Сьыланкылӧс сьылі,
Ассьыд пайтӧ меным
Сьыв жӧ, сьыв...
Кымӧр чуктасторъяс
Шлывӧдісны вылі.
Тӧвру серӧдыштіс
Рӧмыд Эжва выв.
Мӧвпъяс разалісны гӧгӧр
Уна вожӧн,
Кыдз тай лӧсьыд асъя унлӧн вӧт.
Шонді югӧр йылысь
Меным мойдіс пожӧм,
Войся шыяс видзысь
Часӧвӧй.
Букыш кымӧр ӧшинь сайын
Сяльгӧ зэр.
Мича дзоридз меным вайис
Сьӧлӧмшӧр.
Шуа сылы: «Дзоридз вылысь
Лысва ва
Аслам медбур сьыланкывйӧн
Чышкала».
Нылӧй менам: «Тэнад мыла
Сьыланкыв
Кӧдзыд, быттьӧ арся кыа
Рытъявыв.
Мунан таво. Шогӧ коля
Ме тӧвбыд.
Вай жӧ мелі кывйӧн колльӧд
Тайӧ рыт».
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator fought or worked for Soviet Union victory during the Great Patriotic War — so the 74-year protection term is applied;
- and the creator died before January 1, 1950 (more than 74 years ago), and has been not posthumously rehabilitated since that date;
- and this work was first published before January 1, 1950 (more than 74 years ago).
The author died in 1943, so this work is also in the public domain in other countries and areas where the copyright term is the author's life plus 80 years or less (if applicable), or the copyright term is 89 years or less since publication (if applicable).
Public domainPublic domainfalsefalse