Руч да чокыр
| Руч да чокыр (1921) |
| Гижан кад: 1921, Йӧзӧдан во: 1921. Ӧшмӧс: Посни чой-воклы мойданкывъяс. Сыктывдінкар: Коми нига лэдзанін, 1921. |
Важӧн олісны-вылісны руч да чокыр. Кор налӧн няньыс быри, пудъясисны – коднысӧ начкыны. Пуд уси чокырлы. Чокыр шуӧ:
— Менӧ начкыны пан пурт колӧ.
Руч мунӧ пан ордӧ:
Пананӧй, пананӧй,
Вайтӧ меным пурттӧ, пурттӧ.
Чокырӧс начкыны,
Менӧ, ручӧс, вердны.
Пан шуӧ:
— Менам пуртӧй ныж, колӧ ен зуд кеслыныс.
Руч мунӧ ен ордӧ:
Енманӧй, енманӧй,
Вайтӧ меным зудтӧ, зудтӧ.
Пан пурт кеслыны,
Чокырӧс начкыны,
Менӧ, ручӧс, вердны.
Ен шуӧ:
— Менсьым зудтӧ кыскыны колӧ тӧлысь ӧш.
Руч мунӧ тӧлысь дінӧ:
Тӧлысянӧй, тӧлысянӧй,
Вайтӧ меным ӧштӧ, ӧштӧ.
Ен зуд кыскыны,
Пан пурт кеслыны,
Чокырӧс начкыны,
Менӧ, ручӧс, вердны.
Тӧлысь шуӧ:
— Менам ӧш оз мун шонді зонтӧг.
Руч мунӧ шонді дінӧ:
Шондіанӧй, шондіанӧй,
Вайтӧ меным зонтӧ, зонтӧ.
Тӧлысь ӧш вӧтлыны,
Ен зуд кыскыны,
Пан пурт кеслыны,
Чокырӧс начкыны,
Менӧ, ручӧс, вердны.
Шонді шуӧ:
— Менам зонмыд оз мун кӧч йӧвтӧг.
Руч мунӧ кӧч дінӧ:
Кӧчанӧй, кӧчанӧй,
Вайтӧ меным йӧвтӧ, йӧвтӧ.
Шонді зонмӧс вердны
Тӧлысь ӧшкӧс вӧтлыны,
Ен зуд кыскыны,
Пан пурт кеслыны,
Чокырӧс начкыны,
Менӧ, ручӧс, вердны.
Кӧч шуӧ:
— Менам йӧлӧй оз пет пипу пӧдӧнчатӧг.
Руч мунӧ пипу дінӧ:
Пипуанӧй, пипуанӧй,
Вайтӧ меным пӧдӧнчатӧ, пӧдӧнчатӧ.
Кӧч йӧв лысьтыны,
Шонді зонмӧс вердны,
Тӧлысь ӧшкӧс вӧтлыны,
Ен зуд кыскыны,
Пан пурт кеслыны,
Чокырӧс начкыны,
Менӧ, ручӧс, вердны.
Пипу шуӧ:
— Менам пӧдӧнчаӧй оз шед кынь пиньтӧг.
Руч мунӧ кынь дінӧ:
Кынянӧй, кынянӧй,
Вайтӧ меным пиньтӧ, пиньтӧ.
Пипу пӧдӧнча перйыны,
Кӧч йӧв лысьтыны,
Шонді зонмӧс вердны,
Тӧлысь ӧшкӧс вӧтлыны,
Ен зуд кыскыны,
Пан пурт кеслыны,
Чокырӧс начкыны,
Менӧ, ручӧс, вердны.
Кынь шуӧ:
— Менам пиньӧй оз шед дорччысь клещитӧг.
Руч мунас дорччысь дінӧ:
Дорччысянӧй, дорччысянӧй,
Вайтӧ меным клещитӧ, клещитӧ.
Кынь пинь перйыны,
Пипу пӧдӧнча вӧчны,
Кӧч йӧв лысьтыны,
Шонді зонмӧс вердны,
Тӧлысь ӧшкӧс вӧтлыны,
Ен зуд кыскыны,
Пан пурт кеслыны,
Чокырӧс начкыны,
Менӧ, ручӧс, вердны.
Дорччысь шуӧ:
— Вомтӧ паськӧд да кывтӧ нюжӧд.
Руч вом паськӧдіс, кыв нюжӧдіс. Дорччысь дон клещинас ручӧс кывйӧдыс куті да сэтчӧ и виис.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- it was anonymously published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 102 years or less since publication.
Public domainPublic domainfalsefalse