Пӧрысь да дзоля
Шонді лэччӧ вӧръяс сайӧ,
Шоныд ывлавыв.
Видзьяс вылысь мудзӧм йӧзыс
Локталӧ зэв дыр.
Керка дорын кага вылысь
Пӧль оз лэдзлы син.
Пӧльлы квайтымын вит арӧс —
Пилы сӧмын кык.
Зэв ӧд прӧсуж ичӧт Васюк,
Мыйсюрӧн оз ворс:
Сюся кайӧ пидзӧс вылас,
Пӧльлы нетшкӧ тош.
Оз сэн лӧгась пӧрысь пӧльыс:
«Мед нӧ збой кӧ тэ.
Мамлы отсасьысь кор лоан,
Видзӧдла сэк ме.
Быдмы регыд, муса Васюк,
Чукӧрт эбӧс-вын.
Кувтӧдз аддзыла мед эськӧ
Тэнсьыд кипод дін.
Тэ ӧд ӧтнад миян отсӧг,
Мамыд пессьӧ со:
Ытшкӧ, куртӧ, коньӧр, ӧтнас,
Войӧдз век оз во».
Оз нин кывзы нинӧм дзоля:
Чӧскыд локтӧ ун;
Кывзігмозыс небыд кывъяс
Копыртӧма юр.
Гортӧ пыртӧ сійӧс видзысь,
Паныдасьӧ мам;
Долыда ӧд босьтіс киас,
Кӧть и мудзис ань.
Гажтӧмтчи ме тэтӧг, Васюк,
Дум вылын лунтыр.
Мамлы удж вылын бур пиӧй,
Пыр тэ сетін вын!
|
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
This work is in the public domain in the United States because it was published before January 1, 1929 (more than 95 years ago). This anonymous or pseudonymous work is also in the public domain in other countries and areas where the copyright term of anonymous or pseudonymous works is 97 years or less since publication. |
|