Пывсян

by Лыткин Георгий Степанович

Пывсян  (1889)  by Лыткин Георгий Степанович

Гижан кад: 1889, Йӧзӧдан во: 1889. Ӧшмӧс: Зырянский край при епископах пермских и зырянский язык : пособие при изучении зырянами русского языка / сост. Г. С. Лыткин. - Санктпетербург, 1889.

Мунамӧй нӧ, мунамӧй
Пывсьыны-мыссьыны,
Аканьясӧй-чойясӧй,
Ӧксыясӧй-вокъясӧй,
Таг коль кокньыд
Юрнаным-баннаным,
Мича нимнаным,
Пывсьыны-мыссьыны.
Медбӧръяысь нин ме ветлі
Пывсьыны-мыссьыны
Таг коль кокньыд юрнам,
Кольк кыш шыльыд юрнам.
Квайт ныв тай миӧй ветлім
Ӧттшӧтшъя быдманъясӧйкӧд;
Куим ныв тай миӧй ветлім
Югыд шондіясӧйкӧд.
Кок пӧв тай меӧй ветлі
Чеччалігтырйи;
Сой пӧв тай меӧй ветлі
Ӧвтасьлігтырйи;
Син пӧв тай меӧй ветлі
Видзӧдігтырйи;
Пель пӧв тай меӧй ветлі
Кывзысигтырйи;
Пызан дӧра тай меӧй ветлі
Шыльыд туй кузя;
Ыджыд тай меӧй ветлі
Паськыд туй кузя;
Жемчуг тай меӧй ветлі
Поса туй кузя.
Ӧтик морта тай меӧй пывси
Бӧрйӧм керъя пывсянін;
Кык морта тай меӧй пывси
Пӧрӧдӧм керъя пывсянын;
Куим вӧла-морта тай меӧй пывси
Лэдзӧм-лэптӧм керъя пывсянын;
Нёль морта тай меӧй пывси
Тшупӧм-лэптӧм керъя пывсянын;
Нидз кузьмӧс тай меӧй пывси
Вевта (йирка) пывсянын;
Ыргӧн тай меӧй пывси
Ыргӧн горъя пывсянын;
Эзысь тай меӧй пывси
Эзысь пазъя пывсянын;
Зарни тай меӧй пывси
Зарни нитша пывсянын;
Веж небыд тай меӧй пывси
Тугъя корӧсьӧн;
Нюдз виж тай меӧй пывси
Кӧртӧда корӧсьӧн.
Казанса тай меӧй пывси
Дона майтӧгӧн;
Сибирса тай меӧй пывси
Еджыд майтӧгӧн;
Шорса тай меӧй мысси
Визув ыркыд ваӧн;
Гӧп выв тай меӧй мысси
Пӧтка варччан ваӧн;
Куръя тай меӧй мысси
Чери гыбалан ваӧн;
Сыктыв тай меӧй мысси
Сыктыв шор визувтан ваӧн.
Пывси-мысси
Таг коль кокньыд
Юрнам-баннам.
Код нӧ меным, коньӧрлы,
Пывсян пессӧ поткӧдліс?
Коми ӧксыӧй, муса вокӧй!
Пывсян пес ӧмӧй тэӧй виччысян?
Сійӧ тай менам, коньӧрлӧн,
Том лыӧй-сьӧмӧй голяліс!
Код нӧ меным, коньӧрлы,
Пывсянсӧ ломтіс,
Бисӧ вартіс?
Коми аканьӧй, муса чойӧй!
Би ӧмӧй тэӧй вартін,
Би ӧмӧй тэӧй виччысин?
Сійӧ тай менам, коньӧрлӧн,
Оз тусь югыд вирӧй разъяліс.
Коми аканьӧй, муса чойӧй!
Пывсян ӧмӧй тэӧй ломтін?
Коми аканьӧй, муса чойӧй!
Тшын ӧмӧй тэӧй лэдзин?
Коми аканьӧй, муса чойӧй!
Тшын ӧмӧй тэ виччысин?
Сійӧ тай менам, коньӧрлӧн,
Ныв нылӧмӧй ен кыа увсӧ кайис
Пельӧн кывлытӧм вылӧ,
Синмӧн аддзывтӧм вылӧ.
Коми аканьӧй, муса чойӧй!
Из ӧмӧй тэӧй шонтін?
Из ӧмӧй тэӧй дзирдӧдін?
Сійӧ тай менам, коньӧрлӧн,
Том сьӧлӧмӧй дзирдаліс!
Коми аканьӧй, муса чойӧй!
Кунва ӧмӧй тэ изъялін,
Кунва ӧмӧй тэ виччысин?
Сійӧ тай менам, коньӧрлӧн,
Шудӧй-нылӧмӧй вӧлі.
Коми ӧксыӧй, муса вокӧй!
Ӧзъян сисьӧй, муса вокӧй!
Кок улӧдзым тай меӧй юрбита
Пывсян пес поткӧдлӧмыд вылӧ.
Коми аканьӧй, муса чойӧй!
Кок улӧдзым тай меӧй юрбита
Пывсян ломтӧмыд вылӧ,
Пывсьӧдӧм-пӧлялӧмыд вылӧ!