Пывсьӧм
| Пывсьӧм (1923) |
| Гижан кад: 1923, Йӧзӧдан во: 1923. Ӧшмӧс: Выль туйӧд. Сыктывдінкар, 1923. |
Ӧти морта тай меӧй пывси
Бӧрйӧм керъя пывсянын;
Кык морта тай меӧй пывси
Пӧрӧдӧм керъя пывсянын;
Куим вӧла-морта тай меӧй пывси
Лэдзӧм-лэптӧм керъя пывсянын;
Нёль морта тай меӧй пывси
Тшупӧм-лэптӧм керъя пывсянын.
Ыргӧн тай меӧй пывси
Ыргӧн горъя пывсянын;
Зарни тай меӧй пывси
Зарни нитша пывсянын;
Бӧрйӧма пӧ тай пывсяныслы
Пессӧ дас кык ягысь,
Дас кык ягысь пӧ ӧд да
Медконӧдсӧ да медвӧснисӧ.
Бӧрйӧма пӧ тай пывсьыныс
Дас кык расысь корӧсьсӧ,
Меднебыдсӧ да медмичасӧ.
Веж небыд тай меӧй пывси
Тугъя корӧсьӧн;
Нюдзвиж тай меӧй пывси
Кӧртӧда корӧсьӧн.
Кыдз пу кор пӧ локтӧ
Гӧгрӧсасигтырйи.
Бадь пу кор пӧ локтӧ
Кузьмӧсасигтырйи.
Таг кор ме вылӧ локтӧ
Кокнипырысь локтӧ.
Зӧр киль ме вылӧ локтӧ
Зэв кокнипырысь.
Лежнӧг дзоридз локтӧ
Мичапырысь.
Вайӧма пӧ тай васӧ
Дас кыклаысь бӧрйӧма
Медсӧдзсӧ да медъюгыдсӧ.
Ёльса тай меӧй мысси
Визув ыркыд ваӧн.
Гӧп выв тай меӧй мысси
Пӧтка вартчан ваӧн.
Куръя тай меӧй мысси
Чери гыбалан ваӧн.
Ю тай меӧй мысси
Ю шӧр визувтан ваӧн.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- it was anonymously published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
This anonymous or pseudonymous work is also in the public domain in other countries and areas where the copyright term of anonymous or pseudonymous works is 100 years or less since publication.
Public domainPublic domainfalsefalse