Правосла́вный мл҃твосло́въ/Пра́вило ѿ ѡ҆скверне́нїѧ

А҆́ще бꙋ́кви непра́вилнѣ зрѧ́тсѧ, грѧдѝ сѣ́мо, да грамматоси́ры є҆́млеши.

←Бл҃года́рствєнныѧ мл҃твы по ст҃ѣ́мъ причаще́нїи

Правосла́вный мл҃твосло́въ Пра́вило ѿ ѡ҆скверне́нїѧ

Часы̀ ст҃ы́ѧ па́схи→

This page contains Church Slavonic text. Without proper font support, you may see question marks, boxes, or other symbols instead of letters and diacritics. Click here to download required fonts.

Пра́вило ѿ ѡ҆скверне́нїѧ.

Внегда̀ слꙋчи́тсѧ комꙋ̀ и҆скꙋси́тисѧ во снѣ̀ по дѣ́йствꙋ дїа́волю, воста́въ ѿ ло́жа твори́тъ покло́ны, глаго́лѧ:

Бж҃е, млⷭ҇тивъ бꙋ́ди мнѣ̀ грѣ́шномꙋ. Покло́нъ.

Созда́вый мѧ̀ гдⷭ҇и, поми́лꙋй мѧ̀. Покло́нъ.

Без̾ числа̀ согрѣ́ши́хъ, гдⷭ҇и, поми́лꙋй и҆ простѝ мѧ грѣ́шнаго. Покло́нъ.

Глаго́летъ же мл҃твꙋ сїю̀ со ᲂу҆миле́нїемъ, и҆ сокрꙋше́ннымъ се́рдцемъ, ꙗ҆́кѡ ѡ҆сꙋ́жденникъ: потре́ба же тогда̀ и҆ слеза́мъ бы́ти.

Та́же глаго́летъ: Сла́ва тебѣ̀ бж҃е на́шъ, сла́ва тебѣ̀. Цр҃ю̀ нбⷭ҇ный:꙳^[1] Трист҃о́е. И҆ по Ѻ҆́ч҃е на́шъ: Ѱало́мъ н҃: Поми́лꙋй мѧ̀ бж҃е:

И҆ тропарѝ сїѧ̑, гла́съ з҃:

Па́стырю до́брый, дꙋ́шꙋ твою̀ положи́вый ѡ҆ на́съ, свѣ́дый сокровє́нннаѧ, содѣ̑ѧннаѧ мно́ю, є҆ди́не бл҃же, ᲂу҆паси́ мѧ ра́зꙋмомъ заблꙋ́ждшаго, и҆ и҆схити́ мѧ ѿ во́лка, а҆́гнче бж҃їй, и҆ поми́лꙋй мѧ̀.

Ѡ҆тѧгче́нъ сно́мъ ᲂу҆ны́нїѧ, помрача́юсѧ пре́лестїю грѣхо́вною: но да́рꙋй мѝ ᲂу҆́тро покаѧ́нїѧ, просвѣща́ѧ ѻ҆́чи мы́слєнныѧ, хрⷭ҇тѐ бж҃е, просвѣще́нїе дꙋшѝ моеѧ̀, и҆ сп҃си́ мѧ.

Мгло́ю грѣхо́вною и҆ сластьмѝ жите́йскими сплета́емь ᲂу҆́мъ ѻ҆каѧ́нныѧ дꙋшѝ моеѧ̀, стра̑сти разли̑чныѧ ражда́етъ, и҆ въ по́мыслъ ᲂу҆миле́нїѧ не прихо́дитъ. Но ᲂу҆ще́дри, сп҃се, смире́нїе моѐ, и҆ да́ждь мѝ по́мыслъ ᲂу҆миле́нїѧ, да и҆ а҆́зъ спаса́емь пре́жде конца̀ воззовꙋ̀ бл҃гоꙋтро́бїю твоемꙋ̀: гдⷭ҇и хрⷭ҇тѐ сп҃се мо́й, ѿча́ѧннаго спаси́ мѧ и҆ недосто́йнаго.

Ꙗ҆́кѡ впады́й въ разбо́йники, и҆ ᲂу҆ѧ́звенъ, та́кѡ и҆ а҆́зъ впадо́хъ во мнѡ́гїѧ грѣхѝ, и҆ ᲂу҆ѧ́звена мѝ є҆́сть дꙋша̀. Къ комꙋ̀ прибѣ́гнꙋ пови́нный а҆́зъ; то́кмѡ къ тебѣ̀ млⷭ҇рдомꙋ дꙋ́шъ врачꙋ̀: и҆зле́й на мѧ̀ бж҃е, вели́кꙋю твою̀ млⷭ҇ть.

Сла́ва: Ꙗ҆́кѡ блꙋ́дный сы́нъ, прїидо́хъ и҆ а҆́зъ ще́дре: прїими́ мѧ, ѻ҆́ч҃е, возвраща́ющасѧ, ꙗ҆́кѡ є҆ди́наго ѿ нає́мникъ твои́хъ бж҃е, и҆поми́лꙋй мѧ̀.

И҆ ны́нѣ: И҆зба́ви, бцⷣе, ѿ ѡ҆бдержа́щихъ на́съ грѣхѡ́въ: ꙗ҆́кѡ и҆но́гѡ ᲂу҆пова́нїѧ вѣ́рнїи не и҆́мамы, ра́звѣ тебє̀, и҆ ѿ тебє̀ ро́ждшагосѧ гдⷭ҇а.

Гдⷭ҇и, поми́лꙋй, мⷤ. И҆ покло́новъ и҃, съ мл҃твою:

Бж҃е, млⷭ҇тивъ мѝ бꙋ́ди, и҆ прости́ мѧ блꙋ́днаго за и҆́мѧ твоѐ ст҃о́е.

Мл҃тва ст҃а́гѡ васі́лїа вели́кагѡ:

Па́ки запѧ́тъ бы́хъ ѻ҆каѧ́нный ᲂу҆мо́мъ и҆ лꙋка́вымъ ѻ҆бы́чаемъ, рабо́таѧ грѣхꙋ̀. Па́ки кнѧ́зь тьмы̀ и҆ стра́стныхъ сла́достей роди́тель, плѣне́на мѧ̀ сотворѝ, и҆ ꙗ҆́коже раба̀ смире́ннаго, тогѡ̀ хотѣ́нїємъ, и҆ жела́нїємъ плотски̑мъ рабо́тати принꙋжда́етъ мѧ̀. И҆ что̀ сотворю̀, гдⷭ҇и мо́й, и҆ и҆зба́вителю, и҆ застꙋ́пниче ᲂу҆пова́ющымъ на тѧ̀, а҆́ще не къ тебѣ̀ па́ки возвращꙋ́сѧ и҆ постеню̀, и҆ млⷭ҇ти и҆спрошꙋ̀ ѡ҆ содѣ́ѧнныхъ мно́ю; Но бою́сѧ и҆ трепе́щꙋ, да не ка́кѡ всегда̀ и҆сповѣ́даѧсѧ, и҆ ѿстꙋпи́ти ѕлы́хъ ѡ҆бѣщава́ѧсѧ, и҆ на кі́йждо ча́съ согрѣша́ѧ: и҆ не возда́въ мл҃твы моеѧ̀ тебѣ̀ бг҃ꙋ моемꙋ̀, долготерпѣ́нїе твоѐ воздви́гнꙋ къ негодова́нїю. И҆ кто̀ стерпи́тъ гнѣ́ва твоегѡ̀, гдⷭ҇и; Вѣ́дый ᲂу҆́бѡ мно́жество щедро́тъ твои́хъ, и҆ пꙋчи́нꙋ чл҃вѣколю́бїѧ твоегѡ̀, па́ки возверза́ю себѐ на млⷭ҇ть твою̀, и҆ взыва́ю тѝ: є҆́же согрѣши́хъ, простѝ. Поми́лꙋй мѧ̀ па́дшаго, да́ждь мѝ рꙋ́кꙋ по́мощи, въ ти́нѣ сласте́й погрꙋже́нномꙋ. Не ѡ҆ста́ви, гдⷭ҇и, созда́нїе твоѐ растли́тисѧ беззако́ньми мои́ми и҆ грѣхѝ мои́ми: но ѻ҆бы́чнымъ твои́мъ млⷭ҇рдїемъ и҆ бл҃гостїю принꙋжда́емь, и҆зба́ви ѿ ка́ла и҆ скве́рны тѣле́сныѧ и҆ стра́стныхъ помышле́нїй, ѡ҆сквернѧ́ющихъ всегда̀ дꙋ́шꙋ мою̀ ѻ҆каѧ́ннꙋю: се́ бо, гдⷭ҇и, ꙗ҆́коже зри́ши, нѣ́сть въ не́й мѣ́ста чи́ста, но всѧ̀ прокази́сѧ, и҆ всѐ тѣ́ло ѡ҆б̾ѧ́тъ ꙗ҆́зва. Са́мъ ᲂу҆́бѡ, чл҃вѣколю́бче, врачꙋ̀ дꙋ́шъ и҆ тѣле́съ и҆ млⷭ҇ти и҆сто́чниче, ѡ҆чи́сти тꙋ̀ сле́зъ мои́хъ тече́нїемъ, си́хъ и҆злива́ѧ на мѧ̀ ѻ҆би́льнѡ: и҆зле́й на мѧ̀ чл҃вѣколю́бїе твоѐ, и҆ да́ждь мѝ и҆сцѣле́нїе и҆ ѡ҆чище́нїе, и҆ и҆сцѣлѝ сокрꙋше́нїе моѐ, и҆ не ѿвратѝ лица̀ твоегѡ̀ ѿ менє̀, да не ꙗ҆́коже ве́щь, поѧ́стъ мѧ̀ ѿча́ѧнїѧ ѻ҆́гнь: но ꙗ҆́коже ре́клъ є҆сѝ, нело́жный бж҃е, ꙗ҆́кѡ ве́лїѧ ра́дость быва́етъ на нб҃сѝ ѡ҆ є҆ди́номъ грѣ́шницѣ ка́ющемсѧ, сїѐ сотворѝ и҆ на мнѣ̀ грѣ́шнѣмъ, и҆ не затворѝ ᲂу҆́шїю бл҃гоꙋтро́бїѧ твоегѡ̀, въ мл҃твѣ покаѧ́нїѧ моегѡ̀, но ѿве́рзи и҆̀хъ, и҆ ꙗ҆́кѡ кади́ло и҆спра́ви тꙋ̀ пред̾ тобо́ю: вѣ́си бо не́мощь є҆стества̀ созда́телю, и҆ ᲂу҆до́бь поползнове́нїе ю҆́ности, и҆ тѧ́жесть тѣ́ла, и҆ презира́еши грѣхѝ, и҆ покаѧ́нїе прїе́млеши призыва́ющихъ тѧ̀ и҆́стиною. Ꙗ҆́кѡ бл҃гослови́сѧ и҆ просла́висѧ пречⷭ҇тно́е и҆ великолѣ́пое и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва тогѡ́жде ст҃а́гѡ васі́лїа:

Многомлⷭ҇тиве, нетлѣ́нне, нескве́рне, безгрѣ́шне гдⷭ҇и, ѡ҆чи́сти мѧ̀ непотре́бнаго раба̀ твоего̀ ѿ всѧ́кїѧ скве́рны плотскі́ѧ и҆ дꙋше́вныѧ, и҆ ѿ невнима́нїѧ и҆ ᲂу҆ны́нїѧ моегѡ̀ прибы́вшꙋю мѝ нечистотꙋ̀, со и҆нѣ́ми всѣ́ми беззакѡ́нїи мои́ми, и҆ ꙗ҆ви́ мѧ нескве́рна влⷣко, за бл҃гость хрⷭ҇та̀ твоегѡ̀, и҆ ѡ҆ст҃и́ мѧ наше́ствїемъ прест҃а́гѡ твоегѡ̀ дх҃а: ꙗ҆́кѡ да возбнꙋ́въ ѿ мглы̀ нечи́стыхъ привидѣ́нїй дїа́вольскихъ, и҆ всѧ́кїѧ скве́рны, сподо́блюсѧ чи́стою со́вѣстїю ѿве́рсти сквє́рнаѧ моѧ̑ и҆ нечи̑стаѧ ᲂу҆ста̀, и҆ воспѣва́ти всест҃о́е и҆́мѧ твоѐ, ѻ҆ц҃а̀, и҆ сн҃а, и҆ ст҃а́гѡ дх҃а, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва г҃:

Гдⷭ҇и бж҃е на́шъ, є҆́же согрѣши́хъ во днѝ се́мъ сло́вомъ, дѣ́ломъ и҆ помышле́нїемъ, ꙗ҆́кѡ бл҃гъ и҆ чл҃вѣколю́бецъ прости́ ми. Ми́ренъ со́нъ и҆ безмѧте́женъ да́рꙋй мѝ, а҆́гг҃ла твоего̀ храни́телѧ послѝ, покрыва́юща и҆ соблюда́юща мѧ̀ ѿ всѧ́кагѡ ѕла̀: ꙗ҆́кѡ ты̀ є҆сѝ храни́тель дꙋша́мъ и҆ тѣлесє́мъ на́шымъ, и҆ тебѣ̀ сла́вꙋ возсыла́емъ, ѻ҆ц҃ꙋ̀, и҆ сн҃ꙋ, и҆ ст҃о́мꙋ дх҃ꙋ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Мл҃тва д҃, ст҃а́гѡ і҆ѡа́нна златоꙋ́стагѡ:

Гдⷭ҇и, не лишѝ менє̀ нбⷭ҇ныхъ твои́хъ бла̑гъ. Гдⷭ҇и, и҆зба́ви мѧ̀ вѣ́чныхъ мꙋ́къ. Гдⷭ҇и, ᲂу҆мо́мъ ли и҆лѝ помышле́нїемъ, сло́вомъ и҆лѝ дѣ́ломъ согрѣши́хъ, прости́ мѧ. Гдⷭ҇и, и҆зба́ви мѧ̀ всѧ́кагѡ невѣ́дѣнїѧ, и҆ забве́нїѧ, и҆ малодꙋ́шїѧ, и҆ ѡ҆камене́ннагѡ нечꙋ́вствїѧ. Гдⷭ҇и, и҆зба́ви мѧ̀ ѿ всѧ́кагѡ и҆скꙋше́нїѧ. Гдⷭ҇и, просвѣтѝ моѐ се́рдце, є҆́же помрачѝ лꙋка́вое похотѣ́нїе. Гдⷭ҇и, а҆́зъ ꙗ҆́кѡ человѣ́къ согрѣши́хъ, ты́ же ꙗ҆́кѡ бг҃ъ, ще́дръ поми́лꙋй мѧ̀, ви́дѧ не́мощь дꙋшѝ моеѧ̀. Гдⷭ҇и, послѝ бл҃года́ть твою̀ въ по́мощь мнѣ̀, да просла́влю и҆́мѧ твоѐ ст҃о́е. Гдⷭ҇и і҆и҃се хрⷭ҇тѐ, напиши́ мѧ раба̀ твоего̀ въ кни́зѣ живо́тнѣй, и҆ да́рꙋй мѝ коне́цъ бл҃гі́й. Гдⷭ҇и бж҃е мо́й, а҆́ще и҆ ничто́же бл҃го сотвори́хъ пред̾ тобо́ю, но да́ждь мѝ по бл҃года́ти твое́й, положи́ти нача́ло бл҃го́е. Гдⷭ҇и, ѡ҆кропѝ въ се́рдцѣ мое́мъ ро́сꙋ бл҃года́ти твоеѧ̀. Гдⷭ҇и нб҃сѐ и҆ землѝ, помѧни́ мѧ грѣ́шнаго раба̀ твоего̀, стꙋ́днаго и҆ нечи́стаго, во црⷭ҇твїи твое́мъ. А҆ми́нь.

Гдⷭ҇и, въ покаѧ́нїи прїими́ мѧ. Гдⷭ҇и, не ѡ҆ста́ви менє̀. Гдⷭ҇и, не введѝ менє̀ въ напа́сть. Гдⷭ҇и, да́ждь мѝ мы́сль бл҃гꙋ. Гдⷭ҇и, да́ждь мѝ сле́зы, и҆ па́мѧть сме́ртнꙋю, и҆ ᲂу҆миле́нїе. Гдⷭ҇и, да́ждь мѝ по́мыслъ и҆сповѣ́данїѧ грѣхѡ́въ мои́хъ. Гдⷭ҇и, да́ждь мѝ смире́нїе, цѣломꙋ́дрїе и҆ послꙋша́нїе. Гдⷭ҇и, да́ждь мѝ терпѣ́нїе, великодꙋ́шїе и҆ кро́тость. Гдⷭ҇и, вселѝ въ мѧ̀ ко́рень бл҃ги́хъ, стра́хъ тво́й въ се́рдце моѐ. Гдⷭ҇и, сподо́би мѧ̀ люби́ти тѧ̀ ѿ всеѧ̀ дꙋшѝ моеѧ̀ и҆ помышле́нїѧ, и҆ твори́ти во все́мъ во́лю твою̀. Гдⷭ҇и, покры́й мѧ̀ ѿ человѣ̑къ нѣ́которыхъ, и҆ бѣсѡ́въ, и҆ страсте́й, и҆ ѿ всѧ́кїѧ и҆ны́ѧ неподо́бныѧ ве́щи. Гдⷭ҇и, вѣ́си, ꙗ҆́кѡ твори́ши, ꙗ҆́коже ты̀ во́лиши, да бꙋ́детъ во́лѧ твоѧ̀ и҆ во мнѣ̀ грѣ́шнѣмъ: ꙗ҆́кѡ бл҃гослове́нъ є҆сѝ во вѣ́ки. А҆ми́нь.

Мл҃тва є҃, ко прест҃ѣ́й бцⷣѣ:

Прест҃а́ѧ влⷣчце моѧ̀ бцⷣе, ст҃ы́ми твои́ми и҆ всеси́льными мольба́ми ѿженѝ ѿ менє̀ смире́ннагѡ и҆ ѻ҆каѧ́ннагѡ раба̀ твоегѡ̀, ᲂу҆ны́нїе, забве́нїе, неразꙋ́мїе, нерадѣ́нїе, и҆ всѧ̑ сквє́рнаѧ, лꙋка̑ваѧ и҆ хꙋ̑льнаѧ помышлє́нїѧ, ѿ ѻ҆каѧ́ннагѡ моегѡ̀ се́рдца, и҆ ѿ помраче́ннагѡ ᲂу҆ма̀ моегѡ̀. И҆ погасѝ пла́мень страсте́й мои́хъ, ꙗ҆́кѡ ни́щъ є҆́смь и҆ ѻ҆каѧ́ненъ: и҆ и҆зба́ви мѧ̀ ѿ мно́гихъ и҆ лю́тыхъ воспомина́нїй, и҆ предпрїѧ́тїй, и҆ ѿ всѣ́хъ дѣ́йствъ ѕлы́хъ свободи́ мѧ. Ꙗ҆́кѡ бл҃гослове́на є҆сѝ ѿ всѣ́хъ родѡ́въ, и҆ сла́витсѧ пречⷭ҇тно́е и҆́мѧ твоѐ во вѣ́ки вѣкѡ́въ. А҆ми́нь.

Чⷭ҇тнѣ́йшꙋю херꙋві̑мъ: Сла́ва, и҆ ны́нѣ: Гдⷭ҇и, поми́лꙋй, гⷤ. Гдⷭ҇и, бл҃гословѝ.

И҆ ѿпꙋ́стъ:

Гдⷭ҇и і҆и҃се хрⷭ҇тѐ бж҃е на́шъ, мл҃твъ ра́ди пречⷭ҇тыѧ твоеѧ̀ мт҃ре, и҆ всѣ́хъ ст҃ы́хъ, спаси́ мѧ грѣ́шнаго.

Моли́тва ѿ ѡ҆скверне́нїѧ:

Гдⷭ҇и бж҃е на́шъ, є҆ди́не бл҃гі́й и҆ чл҃вѣколю́бче, є҆ди́не ст҃ы́й и҆ на ст҃ы́хъ почива́ѧй, и҆́же верхо́вномꙋ твоемꙋ̀ а҆пⷭ҇лꙋ петрꙋ̀ ꙗ҆ви́вый видѣ́нїемъ, ничто́же скве́рно и҆лѝ нечи́сто мнѣ́ти, ѿ тебє̀ сотворе́нныхъ на пи́щꙋ и҆ въ наслажде́нїе человѣ́кѡмъ, и҆ сосꙋ́домъ твои́мъ и҆збра́ннымъ, а҆пⷭ҇ломъ па́ѵломъ, всѧ̑ чи̑ста чи̑стымъ заповѣ́давый: ты̀ са́мъ влⷣко прест҃ы́й, призыва́нїемъ стра́шнагѡ и҆ пречⷭ҇тагѡ твоегѡ̀ и҆́мене, и҆ зна́менїемъ чⷭ҇тна́гѡ и҆ животворѧ́щагѡ крⷭ҇та̀, бл҃гословѝ и҆ ѡ҆чи́сти мѧ̀ раба̀ твоего̀ [и҆́мⷬ҇къ] ѡ҆скве́рншагосѧ ѿ всѧ́кагѡ непрїѧ́зненнагѡ дꙋ́ха, ѿ всѧ́кагѡ мечта́нїѧ и҆ га́да ꙗ҆дови́тагѡ, ѿ всѧ́кагѡ беззако́нїѧ и҆ всѧ́кїѧ ле́сти, ѿ всѧ́кагѡ потво́ра и҆ ѿ всѧ́кїѧ сꙋеты̀, и҆ ѿ всѧ́кагѡ недꙋ́га, и҆ всѧ́кїѧ ꙗ҆́зи, и҆ ѿ всѧ́кагѡ проти́внагѡ ѕлодѣ́йства дїа́волѧ. И҆ ны́нѣ недосто́йнаго менѐ раба̀ твоего̀ [и҆́мⷬ҇къ], сподо́би по твоемꙋ̀ млⷭ҇рдїю слꙋжи́ти пречⷭ҇тымъ твои̑мъ та́йнамъ. И҆ пре́жде ѡ҆чи́сти мѝ дꙋ́шꙋ и҆ тѣ́ло ѿ всѧ́кїѧ скве́рны, и҆ ѡ҆ста́ви всѧ́кое прегрѣше́нїе, во́льное и҆ нево́льное, є҆́же согрѣши́хъ во всѧ̑ дни̑ живота̀ моегѡ̀, дѣ́ломъ, сло́вомъ и҆ помышле́нїемъ, во днѝ и҆ въ нощѝ, и҆ до ны́нѣшнѧгѡ часа̀. И҆ да́ждь мѝ гдⷭ҇и, слꙋже́нїе сїѐ стра́шное нбⷭ҇ныхъ чинѡ́въ, и҆ прича́стїе пречⷭ҇тыхъ твои́хъ та̑инъ, не въ сꙋ́дъ, ни во ѡ҆сꙋжде́нїе, но въ проще́нїе грѣхѡ́въ, и҆ въ дх҃а ст҃а́гѡ прише́ствїе, и҆ живо́тъ присносꙋ́щныѧ ра́дости, є҆го́же ᲂу҆гото́валъ є҆сѝ и҆́стиннымъ твои̑мъ слꙋже́бникѡмъ. Сохрани́ мѧ, влⷣко всеси́льне, ѿ всѧ́кагѡ грѣха̀ и҆ ѕло́бы, соблюдѝ нескве́рна и҆ непоро́чна ѿ всѧ́кїѧ прока́зы проти́внагѡ дїа́вола: и҆ да́ждь мѝ гдⷭ҇и, слꙋжи́ти тебѣ̀ въ преподо́бїи и҆ пра́вдѣ до послѣ́днѧгѡ днѐ и҆ часа̀ и҆ сконча́нїѧ моегѡ̀: ты́ бо є҆сѝ бл҃гословлѧ́ѧй и҆ ѡ҆сщ҃а́ѧй всѧ́чєскаѧ, хрⷭ҇тѐ бж҃е на́шъ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆ц҃е́мъ, и҆ съ прест҃ы́мъ, и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ, и҆ во вѣ́ки вѣкѡ́въ. А҆ми́нь.

Вины̑, и҆̀хже ра́ди приключа́етсѧ во снѣ̀ соблажне́нїе:

Ѡ҆ є҆́же сꙋди́ти и҆́скреннѧго, си́речь бра́та своего̀, є҆́же є҆́сть грѣшно̀ вельмѝ: ѿ высокоꙋ́мїѧ и҆ го́рдости, и҆ то̀ та́кожде грѣшно̀. ѿ многоѧде́нїѧ и҆ питїѧ̀, томꙋ́же прили́чно: ѿ є҆стества̀ без̾ двиза́нїѧ и҆ без̾ мечта́нїѧ и҆злива́етсѧ, ꙗ҆́коже и҆ и҆́на и҆зли̑шїѧ: ѿ сла́бости тѣле́сныѧ, и҆ болѣ́зни нѣ́кїѧ: ѿ за́висти бѣсо́вскїѧ: ꙗ҆̀же сꙋ́ть безгрѣ̑шна ᲂу҆̀бо, но ѻ҆ба́че сквє́рна и҆менꙋ́ютсѧ.

---

1. ꙳ Ѿ па́схи до вознесе́нїѧ вмѣ́стѡ сеѧ̀ мл҃твы глаго́лемъ тропа́рь: Хрⷭ҇то́съ воскр҃се и҆з̾ ме́ртвыхъ: Три́жды.
   Ѿ вознесе́нїѧ же до трⷪ҇цы вмѣ́стѡ Цр҃ю̀ нбⷭ҇ный: ничто́же глаго́лемъ.

This is a translation and has a separate copyright status from the original text. The license for the translation applies to this edition only.
Original:
Translation: