Порсьлӧн вокыс
| Порсьлӧн вокыс (1926) by |
| Гижан кад: 1926, Йӧзӧдан во: 1926. Ӧшмӧс: Школаын лыддянтор. Сыктывдінкар, 1926. |
І.
Васюкыд ӧд зэв урӧс детина вӧлі. Нигаясыд пыр вӧлі джоджынӧсь, туплясьӧны. Кӧмкотыд — пызан вылас. Мыйкӧ сёйигад пызан вывтӧ да морӧстӧ киськалас, чери яйтӧ сідзи и сюялӧ вомас няйт кинас.
— Мун жӧ, — шуӧ сылы велӧдысьыс: — вокыд дінӧ петав. Ме кӧть сы коста оланінтӧ идӧртышта.
Васюк чуймис:
— Менам, — шуӧ: — вокыс абу да.
— Эм, — шуӧ велӧдысь: — тэ кӧ сійӧс он тӧд, сійӧ тэнӧ тӧдӧ. Мун-мун петыштлы регыдик кежлӧ да сёрнитышт!
Петіс Вася ӧшинь улас.
ІІ.
Видзӧдлас кӧ, сэні гӧрд бӧжа ур.
— Но, — шуӧ Васюк: — тэ нӧ меным вок лоан?
Ур гун-гонь видзӧдліс Васюк вылӧ:
— Ныр-вомыд, — шуӧ: — мисьтӧм. Кысь тэныд татшӧм шыльыд вокыс порсьворлы?
Ачыс тивк-тивк — кайис пу вылӧ.
ІІІ.
Кыськӧ локтіс кань. Васюк сы дінӧ:
— Гашкӧ инӧ, тэ менам вокыс да?
Кань лют-леткерис бӧжнас:
— Со, — шуӧ: — вок кодь кажитча. Ме катша-ракаыскӧд, тэ моз, ог юксьывлы да.
Муніс кытчӧкӧ пелькиника.
ІV.
Коркӧ локтіс порсь Вася дінӧ.
— Олан-вылан, — рукӧстіс: — муса вокӧй!
Васялы чушис:
— Мун, — шуӧ: — сэтысь: порсь вок ӧд абу жӧ ме?!
— Абу?! Ныр и вом ӧткодь да, быттьӧ нӧ тай ӧти луӧ кисьтӧмаӧсь. Лок мунам туплясьыштам няйтад...
— Мый сэтчӧ?! Няйтын ӧд ог жӧ туплясь...
— Эн соссьы: дӧрӧм-гачыд ӧд висьталӧ. Мунам, мися. Чӧскыд помӧйӧн вердасны...
V.
Сы шӧрӧ велӧдысьыд воис:
— Керкатӧ, — шуӧ: — пелькӧді, колӧкӧ, пыр, али вокыдкӧд мунан?
— Кутшӧм воккӧд? Порсьыскӧд?! Сэтшӧм няйтпозыдкӧд бара ме ог мун.
— Эз сьӧлӧм вылад во. Пыр инӧ, сідзкӧ, да водзӧ сы моз эн ов.
This work is in the public domain in Russia according to article 6 of Law No. 231-FZ of the Russian Federation of December 18, 2006; the Implementation Act for Book IV of the Civil Code of the Russian Federation:
- its creator didn't fight or work for Soviet Union victory during the Great Patriotic War — so the 70-year protection term is applied;
- and the creator died before January 1, 1954 (more than 70 years ago), and has been not posthumously rehabilitated since that date;
- and this work was first published before January 1, 1954 (more than 70 years ago).
This work is in the public domain in the United States because it was published before January 1, 1929 (more than 95 years ago).
The author died in 1925, so this work is also in the public domain in other countries and areas where the copyright term is the author's life plus 98 years or less (if applicable), or the copyright term is 97 years or less since publication for posthumous works (if applicable).
Public domainPublic domainfalsefalse