Поладкстомо (2016)/Эрзянь Мастор. Умонь ды неень шкасто.
| ←Ули мастор, конась монь седейсэ... | Эрзянь Мастор. Умонь ды неень шкасто (2016) by , edited by Ломшина Л. А., Маризь Кемаль, Малахова Е. П. |
Од шкань откерьтне. А.П. Рябовонь лемсэ казнень лауреатт 1993-2015-це иетнень перть→ |
| Нуянь Видяз. Поладкстомо. Без продолжения. — Саранск, 2016. — с. 491—503 |
[491]
| ЭРЗЯНЬ МАСТОР. УМОНЬ ДЫ НЕЕНЬ ШКАСТО |
Эрзянь раськесь зярыя пингень перть сравтневсь Россиянть келес. Весемеде ламо эрзят эрить ней Самара, Пенза, Ульянов, Ало ош ёнкстнесэ. Аволь истя сравтневсь, кода сравтнизь. 19-це пингень 20-це иетнестэ «Русская правда» газетасонть печатазель программа, мезе теемс лепштязь-изнязь раськетнень марто. Ушодовкшнось ведьгемень иень перть молиця Рузонь-Кавказонь войнась. Секскак истямо программась эрявкшнось кода ведь. Эйсэнзэ ульнесь пункт: сравтнемс-човорямс раськетнень. Истя эрзянь велетнень юткова тейневсть рузонь велеть. Теде башка орголесть локшосо-илевсо крестямо донть, войнатнеде, кирдийтнень каршо стякшноматнеде. 19-це пингень прядома малава ды мейлеяк ламо эрзят кадокшнызь чачома таркаст, срадсть Столыпинэнь реформатнень шкасто Сибирьга. Мейле, социализмань кастома шкасто, масторонь келес ульнесть «великие стройки коммунизма»...
Сравтнемс ломантнень ламонь таркава эрямо, чуролгавтомс — нежетне де неже рузыявтомань тевсэнть. Те методось кирдеви шовинистнэнь зепсэ нейгак. Рузонь-Чеченэнь меельце войнанть пингестэ неень шкань Федерациянь Советэнть прявтозо Валентина Матвиенко телевидениянь вельде ёвтакшнось истят «ривезень» валт: «Чеченэнь ават, пурнаводо ды ардодо Россиянь куш кодамо пев, куш кодамо таркав! Вагонтнэ анокт, учить тынк...». Мень а кевейксэеце пингень ушодкс?
9-12-це пингетнестэ Эрзянь модатнень лангс пек эцесть рузонь буетне. 1221-це иестэнть путозель Ало ошось, неень Нижноесь. Сон ульнесь нардев нежекс Эрзянь Масторонть лангс каявомасонть. 13-це пингестэ эрзятне, кода рузтнэяк, понгсть монголонь сталмонть алов. Лиякс ёвтазь, лепштямось эрзятнень лангс мольсь кавто ёндо: чивалгома ды чилисема ёндо.
«Сырнень орданть» каладомадо мейле седеяк виевгадсь рузонь князтнень мелест саемс, «пурнамс-сэрнямс» Эрзянь Масторонть. Талай эрзянь раськесь явозель [492] кавтов: веенстнэ понгсть Московонь кедькоморо, омбонстнэ — Казанень. «Олякстомтынзе» татартнэнь кедьстэ Кежей Иван. Зярыя снартнемадо мейле окойники авечкевиксэнзэ изнинзе, 1552-це иень ожоковсто Казань саезель. Ней эрзятне вейсэлть. Весе вейсэ понгсть Всея Русень царенть кочкаря алов. Понгсть пици псистэ кельмес. Кинь ало иля уле, татартнэнь эли рузтнэнь, изнязь раськенть уцясказо валдо-шожда а эрси. Изницятнень корост-обуцяст весень вейкеть. Сынст мелест-бажамост теке: седе виевстэ каявкссо-налогсо ды лиясо-месэ «потявтомс» изнязетнень. Изнязь, лиякс кортыця раськетнень теемс, васняяк, царенть кис тюрицякс, сонзэ масторонзо-государстванзо келейгавтыцякс, неень кортавкссо — «пушкань сывелекс»
Войнатнеде, косо кинь-бути ды мезень-бути кис певтеме ламо верь валсь Эрьзянь раскесь, ламодояк ламольть. 16-це пингестэ веенст эрзятнеде тюрсть, Кежей Иван кармавтынзе, Рузонь Масторонть кис, омбонстнэ — Казанень ханстванть. Ансяк прядовсь те верь валомась «олякстомтозь» эрзятнень теке жо Иванось сеске ильтинзе тюреме Ливониянть каршо.
1242-це иестэ саезь! 462-це иес Всея Русесь ветясь войнат 200 иеть. 14-це пингестэ саезь неень шкас ломанень маштнемань иензэ Россиянть ульнесть 525 ламо. Ловт, эрьвасонть ульнесть эрзят. Сынст ловажаст наксалить Африкасо, Кореясо, Афганистансо, васоло Порт-Артурсо, Вьетнамсо, Испаниясо, Германиясо... «Пушкань сывелекс» ульнесть войнатнесэ французтнэнь, туркатнень, немецтнень, японтнэнь, Кавказонь раськетнень, эсь буень фннтнэнь, мадьяртнэнь ды ламо лия раськетнень каршо. Эрьва войнась «сэви» весемеде виевтнень ды превейтнень, лавшомгаты лепштязь раськенть.
Покштояк покш зыян Эрзянь Масторонтень кандсь христианствас вийсэ, пряниксэ-локшосо, толсо-торосо панемась. Ютавтовсь сон колмо пингеде ламонь перть. Иисусонь лемензэ марто кандтневиця крестось юронь пес калавтызе-тапизе эрзянь оймеёжонь марямонь-эрямонть. Церьковатне-поптне седеяк виевгавтызь ды [493] эрязкавтызь рузыявтоманть. Келей-кувака аволь умок эрзянь ёнкстнэ, велетне-оштне теевсть рузокс кортыцякс.
Христианствас вийсэ панемась, эрьва кодамо тюсонь нарьгамотне, летнтямотне, ломанькс аловоматне кирьвазтизь 1670-це иестэ Тетянь-авань масторонь кис аштемань войнанть. Абунгадат. Рузонь историянь сёрмадомась ды сёрмадыцятне содасть ды содыть истят войнат ансяк... кавто: 1812-це иень ды 1941-1945-це иетнень. Лият, сынь рангить, кодаткак ды зярдояк арасельть! Те, чарькодеви, нулгодькс кенгелема. Эрьва раськенть, кодамо сон илязо уле, покш эли вишкине, ульнесь, паряк, аволь вейкеяк, эензэ, Тетяёнксонь, Отечественной войназо.
Эрзятнень тюремаст 1671-1672-це иетнестэ — те эсь Масторонь кис тюрема, Отечественная война. Власть ёндонь историктне-сёрмадыцятне лемдизь: Разинэнь стявтовксокс, гражданскойкс, крестьянскойкс...Виде, ушодыкшнызе те войнанть-тюреманть олячинь кис эрзянь цёрась Разин Степан. Ломанесь сон ульнесь превей, ламонь содыця, пси обуця. Содыль .. .кавксо кельть! Те ансяк мезде корты. Секень вант, содылизе эрзянсентькак. Разин ломанесь содавикс. Мик пек. Кода весетне, истя прявтнэ-ветийтне.
А вана лемесь Боляень Акай — истя а марсеви. Берянь. Сон, Разинэнь коряс, тюрсь Алексей инязоронть Ушманонзо каршо седе кувать ды седе верень валозь. Мезе ашти ансяк Кандарать эрзянь веленть маласо (ней Ульян ёнкс) покштояк покш недявомась. Сонзэ а стака путомс 1943-це иень Сталинград ошонть кис тюреманть ваксс.
Арась, Московонь царесь эзь изняво. Кодат репрессият, зяро ломанть ульнесть маштозь, эрийстэ пултазь, панезь, эрьва кода нарьгазь...Акай Боляень ускизь неень Лямбирень райононь Костюш чачома велестэнзэ Якстере Слободав ды тесэ инязоронь палачтне 1670-це иень ацамковонь прядома малава сезнизь нилев. Чачома велензэ пултызь. Арзамасонь Олёнь, те эрзянь ине аванть, эсь Масторонзо потмаксос вечкиця Ломаненть Темник ошсо (ней Мордовия) пултызь эрийстэ чапосо. Неень шкань кортавкссо тень лемезэ геноцид.
[494] Снартнизь эрзятне лисемс олячис Русенть алдо аволь весть. Аволь весть стякшность — ванстомс Инешкипазнэнь озномань коест, тюрсть православиянть каршо.
1743-1745-це иетнестэ пель ие малава Терюш волостень ды перьканзо лия эрзянь велетне (Ало ош ёнкс) эзть кунсоло а Московонть, а Петербургонть, эрясть кода Республика.
1743-це иень панжиковонь 18-це чистэ Ало ошонь епископось Сеченов мерсь кирьвазстемс Сарлейвелень, козонь сакшнось тесэнь попонтень, калмазыренть. Крёстонь таркас калмонь марнэтнень ланга, эрзянь койтнень коряс, ульнесть кудынеть. Ансяк кепететсь качамо, чийсть ломанть. Курок пурнавсть сядот. Мейле тёжат. Истя ушодовкшнось поптнень-церьковатнень каршо содавикс тюремась. Прявтокс-ушмодеекс ульнесь Василень Несмеян. Полавтыцязо Помраз Семёнов. 1743-це иень сундерьксковонь 26-це чистэ вастовсть Алексей рузонь царенть ды Василень Несмеянонь ушмонзо. Сюлмавсь верев недявкс. Эрзятне изнязельть. Ламо ломанть маштозельть, седеяк ламо томбавозельть. Василень Несмеянонь пултызь Сарлей велень кезэрень пингень калмолангсо. Помразонь повизь. Те лангс апак вано войнась эзь прядово, кода партизанонь война мольсь 1745-це иес.
Колоньгемень иень ютазь эрзятне таго стясть эсь олячист ды видечинть кис. 1773-це иестэ Рав чирева эриця раськетне арасть Пугачов Емельянонь кедензэ алов.
Меельцеде эрзятне виест, олячис бажамост, Инешкипазнэнь кемемаст невтнизь 1805-1809-це иетнестэ. Прявтокс тенст ульнесь Алексеень Кузьма, конань Уцясказоль аламнеде лияль: нарьгамодо, тюрьмасо аштемадо мейле панезель Сибирев.
Покш полавтовкст эрямосонок кандсь Россиясо 1917-це иень ожоковонь-октябрянь Революциясь. Ютазь пингень 20-30 иетнестэ Россиясо эриця аволь рузонь раськетненень максозельть масторт: Республикат, область, округт. Кода иляст сялдо, кодат чопода валт революциядонть, коммунистэнь партиядонть иляст тапаря, истямо тев — максомс олячи лепштязь этностнэнень — ломантнень [495] историясо зярдояк арасель. 30-це иетнень васень шкасто ютавтозельть рузонь кельстэ эрзянь кельс школань тонавтнема весе книгатне. Те сестэ, зярдо СССР масторонтень пектеяк пек эрявсть ярмакт, зярдо сынст таштамга Эрмитажсто микшнесть питнейдеяк питней картинат! Мезе лангскак апак вано, муевкшнесть. 1931-це иестэ Саран ошсо панжозель Агропединститут, Россиянь келес панжозельть 12 тонавтыцянь училищат. Истят тевть Модамасторонть лангсо косояк-зярдояк арасельть! Ней, зярдо Россиясто ламо масторов чудить нефтень лейть, арасть ярмакост рамамс школань библиотекас художествань книга. А вана эстест правтне колмо этажонь кудонь путомс косто-бути мукшныть.
Ризкс тапардатанзат — те сырнень шкась нурькинель. Кемень иетькак эзь моле. Ушодовсть репрессиятне. Саран ошось теевсь грамотас содыцятненень, превейтненень туворокс-кундсемкаекс. Зярдо кемекстазель Мордовиянь автономиянь Республикась, Саран ошов сакшность СССР-нь келес эриця эрзятнестэ сехте ламонь содыйтне — сёрмадейть, морыцят, артистт, тонавтыцят, врачт.... Пурнавсть ды яволявтызь сынст...«раськень ятокс». Ламот леднезельть, ламот озавтнезельть тюрьмас, эрьва ков пансезь. Эрзянь раськесь кадовсь арсицявтомо, прявтомо, икелев ветицявтомо раськекс.
Неть раужо иетнень полавтызь седеяк раужот. 1939—1945-це иетнестэ маштозельть кирдат-поколеният. Маштозельть «ине-ине войнасонть» весемеде шумбратне, тевсэ-превсэ виевтне, маштозельть одтнэ, икелев ветицятне.
Вана, нурькинестэ, Эрзянь раськенть уцясказо, зярыя пингень перть ютазь кизэ.
Мезес сон истямо «уцяскадонть» пачкодсь?
Теде кортыть Россиянь-СССР-нь келес ламоксть ютавтозь эрицянь ловоматне. 1834-це иестэ Россисо эрясть 480 тёжат «мордват», 1859-це иестэ — 682, 1897-це иестэ — 1020 ламо, 1926-це иестэ 1370 тёжа малава. Истя раштазь эрзятнеде мокшотнень марто улемальть кавто миллиондо ламо. Те войнатнень, репрессиятнень, [496] христианствас вийсэ панематнень шкасто. Сынтемест, кода сёрмадыть историктне, улевельть ней эрзятнеде вейсэ мокшотнень марто 20-25 миллионт.
Ассимиляциянть капшазь молемадо корты Нижегород ёнкска ютавтозь эрицятнень сёрмалемась 1859-це иестэ саезь 1989 иес. 130 иень пертьть те ёнкссонть эриця эрзятне аламолгадсть 111,4 тёжасто 36,0 тёжас, лиякс ёвтазь, 67,7 % . Юрраськенть пельксэзэ Мордовиянь автономиянь Республикасонть 1934-це иестэ саезь 37,7 % валгсь 32,5 %- с, теяк, седе тов невтеви, кенгелемка.
Вана кода эрязасто, капшазь моли рузыявтомась лиякс невтезь - зяро эрзянь ды мокшонь ломанть Россиясо эрицятнень ловомсто чачома келекс яволявтызь рузонь келенть (процентсэ):
1926-це ие — 5,7, эйстэст 10,2 оштнесэ ды 0.3 велетнесэ.
1970-це ие — 22,0, -х- 16,2 -х- 1,3 -х-
1979-це ие — 25,3, -х- 43,1 -х- 12,7 -х-
1989-це ие — 38,8, -х- 44,1 -х- 16,4 -х-
2010-це ие — 35,2, -х- -х- ....-х -х-
Рузыявтомась ды рузыямось, а стака чарькодемс, чиезь чийсь, мезде кортыть цифратне-числатне, ды чии нейгак, васняяк оштнесэ. Содави теяк, кинь чачома келезэ рузонь, те уш а эрзя, ловт, руз-мордовец. Ансяк кой-кить, чуросто кой-кить мурдыть эсь келень масторозост эли кармить аштеме сонзэ кис.
2010-це иестэ Россиянь келес ютавтозь ломанень ловомадонть. Весемезэ Россиянть келес пурнавсть 744236 «мордват». Саиндерясынек эйстэст сетнень, кить чачома келекс яволявтызь рузонь келенть, кадовить 582266 ломанть. 744236-нь ютксо 57008 мордва-эрзят (7,7 % ) ды 4767 мордва-мокшат (0,6 %). 1939-це иестэ мордватне-дельть 1,5 миллион малава. Лиякс ёвтазь, ней кадовсть эйстэнек улезденть пель. Паро, бути парсте-беряньстэ неень шкас ванстовсть эрзятнеде 400-450 тёжат. Зяро алкукс, кияк а ёвтасы, малав весень Меркушкин ялгась «лаксинзе» мордвакс. Теке басом, а эряви стувтнемс парочинь тешкстэнть, качествадонть. Кодат сынь, неть [497] ванстовозетне? Ули-арась эйсэст эрзянь ойме? Чуди сангаст эрзянь верь? Мелявтыть-арсить раськеденть, путыть мель тензэ лездамс? Лездыть? Кода содасызь эрзянь келенть? Улить-арасть кодаткак чартьчист эрзянь историядонть? Содасызь, кие те Эрзямасонь Олёнась?
Сави, куш те а шождыне, видькстамс, а мезть кекшнемс. Пароль, 400-450 тёжатнень эйстэ муевельтькак видестэ, аволь модас ванозь, якицят куш 1 (вейке!) процент, те 4000-4500 эрзят. Те уливель вий, уливель нардев неже. Иля арсеяк. Кецнек, муиндерят 0,1%, 450-500 эрзякс эриця, эрзянь раськентень лездыця, кисэнзэ ризныця-мелявтыця ломанть. Ансяк 0,1 %...
Кода ютась, мезе макссь эрицятнень сёрмалемась 2010-це иестэ Мордовиясо?
Нурькинестэ: седе курок нардамс эрзятнень, васняяк, аволь рузонь юрраськетнень ютксто. Теемс тень Мордовиянь се шкань Прявтонтень, Меркушкин Николайнень, шождаль. Кедьсэнзэль нардевдеяк нардев шаштолмась — мордвась, мордвинизациясь. Сонзэ ловомадо-сёрмадстомадо мейле Мордовиясо кадовсть ансяк 49579 мордват-эрзят, сынст эйстэ чачома келест содасызь ансяк 30909 ломанть, лиятне, 15168, кортыть кельсэ, кона косояк... арась, мордвань. Истямось веляза превсэяк а чарькодеви! Те ловоманть питнезэ вейке — уголовной статья.
Лиссь те вана кода. 2002-це иестэ мордватнедель Мордовиясо 31,2% (зяро эрявсть прявттнэнень), 2010-це иестэ — кирнявтсь те тешксэсь... 39,9 % (таго теке, зяро эрявсь прявттнэнень). Косто саевсь те истямо покш касовксось? Эрзянь аватне мель путсть? Раштасть, чачтнесть ламонь-ламонь? Эрьвась соды, те — менельстэ саевкс, пестэ пес, визьксэнь апак сода кенгелема. Чачтызь те процентэнть аволь эрзянь аватне, а Меркушкинэнь менчевиця уця чиновникензэ. Умок рузыязь эрзятнень, мокшотнень, кинь ульнесть тетяст, покштянь покштяст эрзят, мокшот, кинь низэ эли полазо эрзяль, кинь понгсь лемдясть мордвакс. Те мельспрамось кемекстави шождасто. Мордовиясо рузонь келенть весе мордватнестэ чачома келекс ёвтызь 18%, эйстэст 30 % оштнесэ ды 7,8% [498] велетнесэ. Истя ламолгадсть Республикасонть мордватне ды текень туро аламлгадсть рузтнэ. Чирьстэ ёвтазь, рузтнестэ «ичесть» мордват. Аволь уле те рицягась, секень вант авольть пурнаво Россиянть келес 744236 мордватнедеяк.
Кода мольсь мордвинизациясь-рузыявтомась Мордовиянь эрзянь буетнесэ, ёвтни таблицась.
| Мордовиясо мордвинэкс велявтозь эрзятнеде ды «Эрзянь Масторс» сёрмадстомадонть 2013 иень омбоце пельксс | ||||||
| Районы | Всё населе- ние |
в т.ч. мордвы | Из них в % мордвы | м-/эрзи | Число подпис- чиков |
Глава района |
| Ардатовский | 29446 | 17035 | 38,8 | 60,2 | 52 | Федоров А.С. |
| Атяшевский | 20161 | 17080 | 0,7 | 99,3 | 54 | Сурков М.А. |
| Б. Березников-ский | 14072 | 7999 | 98,2 | 0,8 | 4 | Сурин А.Н. |
| Саран ош | 324973 | 89288 | 94,0 | 6 | 250 | Тултаев П.Н. |
| Ичалковский | 20582 | 10006 | 99,3 | 0,7 | 15 | Дмитриева В.Г. |
| Кочкуровский | 10794 | 9946 | 99,5 | 0,5 | 31 | Герасимова С.Н. |
| Лямбирский | 34142 | 6057 | 95,5 | 4,5 | 4 | Симонов А.Ю. |
| Ромодановский | 20702 | 3431 | 99,7 | 0,3 | 1 | Чалов В.С. |
| Теньгушевский | 12340 | 4804 | 100 | 10 | Дементьев А.И. | |
| Б-Игнатовский | 8313 | 6939 | 43,3 | 56,7 | 36 | Полозова Т.Н. |
| Чамзинский | 31639 | 15188 | 99,3 | 0,7 | 16 | Цыбаков В.Г. |
Кармавтозь, кидеяек апак пеле ютавтовсь ды ютавтови «мордванть» вельде рузыявтомась. Вана мезе тейсть Московонь уретне-прявтнэ эрзятнень марто.
[499] Таблицасонть невтезь ломантне лемдязь «Эрзянь Мастор» газетасонть раськень ятокс. Самай сынь, сынст кондятне ды сынст прявтост ловт тапизь Эрьзянь раськенть. Мик Кочкуронь буесэ, косо эрить 80 % эрзят. 99,5 % теевсть мордвакс. Те корты текеде: кодамояк ловома-сёрмалема буесэнть-районсонть эзь ютавтово! Пештизь конёвтнень, кода мерсть прявттне, ды истя прядызь лувонть.
Мезе ульнесь — ульнесь. Седе ламо арсема тенек течинь чиденть, эрязо мартонок мелесь вандынседентькак.
СССР-сэ «верев нуемань» шкадонть мейле ютасть 75 иеть. Ломанень эрямопинге. Ламо-мезе полавтовсь. Сталинэнь шкань верень валыцятнень поладыцяст каизь френчест-кителест, кирьгазост понгавтсть куцькан тешкс марто галстук. Оршасть лия оршамот.
А вана потсомелест, оймест, кадовсть текекс — седе курок рузыявтомс-нардамс моданть лангсто аволь рузонь юрраськетнень. Ёнамось-целесь кадовсь икелёнцесь. Эзь ола. Куловтомань-леднемань методтнэнь ламонь кувалма полавтызь. Ней седеень раздиця тевест теить аволь леднезь-повсезь. Те-умонь, куштазь шкат, 15-17-це пингеть. Неень «чекистнэ» максть лия кармавтомань лув — мезе теемс, кода улемс «инородецтнэнь» марто — образованиянь, культурань, национальной политикань министерстватненень ды лия структуратненень. Погононь салава кандтницятне, прокурортнэ, судьятне ды лия «силовиктне» «национальной кухнянтень» а эцнить. Тееви ассимиляциянь раужо тевесь апак шално, леднемань зэрттеме, сельведень апак вало. Кодаткак «тройкат» арасть, моли весе «законна». Колсеви Конституциясь? Ну...те уш...Тесэ мезеяк берянь арась.
Васняяк, пиризь кинть эрзянь келентень школатнес. Таргозонзо максовить 2 част омбоце классто саезь котоце класс. Те вачопекень паёк. Омбо масторонь келентень, невтемань кис, явовить таргозонзо 2 част омбоце классто саезь нилеце класс. 5 классто 11 класс таргозонзо максовить 3 част. Чачома келентень максови, лиси, аламо омбо масторонть коряс. Тень лемезэ вачопекень палнэ.
[500] Ней весе теевсть «пазнэнь кемицякс». Тонавтыть эйкакштнень ваномо школань вальмава церьковань чурькатнень лангс. Школатнесэ, Конституциянь колсезь, 7-це классо тонавтови «Основы православной культуры». Теде башка 4 ды 5 класстнэсэ (таргозонзо 1 час) «превиявтыть» эйкакштнень «Основы религиозной культуры и светской этики» курссонть.
Стазь школань программась аволь мельде-валдо. «Россиянь Конституция» уроктнень таркас совавтызь ды ветить «Основы православной культуры». Тень теизь арсезь. Московонь прявттне, эйстэст а кадовить Саранонсетнеяк, пелить ломантне, раськетне кармить эрямо коень-закононь мелень ванозь. Пелить, эрямось карми седе ванькс, оймень кецневтиця. А кемевияк: Сталин Иосифень пингестэ теде эзть пеле. 1947-1948-це иетнестэ 7-це классо тонавтневсь «закон божиень таркас» «СССР-нь Конституциясь».
Велетне каладсть, эйсэст школатнень пекстнизь. Усксить зярыя велестэ ве школас, аволь чуросто райцентрань. Эйкакштне тесэ, седе сеедьстэ, эрьва кодамо келень-раськень, секс эрзянь келесь а ветяви, эли ветяви мельде-валдо. Теде класстнесэ, школатнесэ содави: ютко шкатнестэяк гайги эрзянь келенть таркас рузонь кель. Мезес те пачти, содави пакшантеньгак.
Эрьва кода пекстнить кенкштнень — а нолдамс чачома келенек эйдень кужотнес. Самай тесэ, «садиктнесэ», ушодови эрзянь кортамонть тапамозо. Невтемань кис ветить кужосонть, косо 250-300 эйкакшт, 10-15 седе покшкетнень марто кружоккеть. Занятиятне эйсэст ветявить таргозонзо кавксть 20-25 минутань перть. Истя «тонавтозь» учомс лезэ а савкшны. Те эрзянь келенть лангсо нарьгамо. Пакшатне сыть васень класс допрок рузт. Ды ушодыть сынст теде мейле...эрзякс кортамо. Анекдот! Лия вал сеске а муят. Истя «чарыть-мелявтыть» эрзянь кельденть тесэ, Мордовиясо. Сонзэ томбальга, косо эрить эрзятне 85% Весемедест, раксезь-сюдозь факультативсэяк а максови.
[501] Кода ансяк а яжить эрзянь келенть! Кирдийтне-властне Россиянь келес панжсть, тагояк невтемань кис, а мезть кавтолдомс, колоньгеменде ламо НКА-т (национально-культурной автономият). Сынь раськенть идемга мезеяк а теить. Тунь! Топавтыть масторпрявттнэнь кармавтомаст. Сынст а «токши» а келенек ёжозо, а прессань-информациянь аразьчись, а минек мазый койтне-кирдатне... Истятнэнь мелявты вейке: савтомс ветицятненень, шкастонзо самс кодамояк церемонияс, парадс, кодамояк «летияс». Неть НКА-шниктне кармить васенцекс, кить серьгедить, зярдо мерить тенст верде, Республикась а мезекс! Вейсэ Самара, Ульяновск марто седе парсте карматано эрямо! Сыненст ялатеке кие марто. Каршо а кармить идемевсенть мартояк. Ансяк мерест ды андост-пандост седе парсте ...
НКА-де башка вачкасть минень-сюнонь центрат. Эйстэст весемеде покшось, Всероссийскоесь, «важоди — ливезть валы» Сыктывкарсо, комитнень оймест ливти. Омбоцесь, Поволжскоесь, — текень теи Саран ошсо. Теяк-тонаяк пря невтитьь — тев теить, топавтыть спецоргантнэнь кармавтомаст. Карть кодыть, кечинеть сёрмадовкске марто валыть, нардаминеть викшнить, оймамо а содыть — киштить-морыть... Кода ёжонзо мари эрзянь келесь эйдень кужотнесэ, школатнесэ, лия таркатнесэ — мельсэсткак а кирдеви. Теде сынст пряст а сэреди. Келень культуранть сынь, культурниктне, культуракс а ловить. НКА-не конёвонь коряс — вейсэндявкст (общественной организацият). Сыненст неезь-содазь свалшкань важопитне (зарплата), кода тенек маряви, а пандыть. А вана «центристнэнень», финэнь ды угрань кельтнень тов туевтемаст кис, пандыть аволь ансяк важопитне, явить тенст ярмакт нолдамс «проправительственной» кулялопа, кирдемс машина, 6-10 ломаньстэ штат ды седе тов. Эсь прянь микшницятнень свал пандсть нильтякадомазост.
Те аламо, улить мик финнэнь-угрань лабораторият, буень центрат... Весе сынь, ледстнемс а мезть, бутафорскойть, весе кирдийтненень цяпицят... Арсить вейкеде: копачамс-кекшемс раськенек-келенек Чопода Масторов [502] туеманзо. Весе улить (НКА-т, центрат, лабораторият, АФУНТ-МАФУНТ, мик сырень ды одонь), мезть арасть рузтнэнь. Арасть ансяк школатнесэ эрзянь келень алкуксонь урокт, ансяк а чоледить эйдень кужотне эрзякс.
Эзизь стувто 30-це иетнень поладыцяст ташто методтненьгак, эйстэст сравтнемань-вецакавтомань, човорямонь ёрокчись лия раськень ломантне марто. Те методонть совавтызь неень шкасто телевиденияс-радиос. Эрзянь «Сияжар» телередакциясь лисснесь таргозонзо весть, пецясто. Ушолевсь 18 чассо. Мольсь часс малава. Невтневсть натой эрзянь кельсэ спектаклят. Содасть ломантне. Вансть. Ней те часонть явнызь ды лисснить эфирс сутказонзо зярыяксть зярыя минутань перть, сетнеяк а ён шкасто.
Кардамот, пансемат, покордамот...Эрзянь келенть кис аштицятненень икелев стявтнить эрьва кодат стенат. Телевидениясь, радиось, кулянь-информациянь лия нежетне малавгак а нолдтнить истятнэнь микрофононтень, газетань лехатнес, промкстнес... Россиясо конёвонть коряс, мезекс теизь РФ Конституциянть, цензура арась. Ули! Ды кодамо. Цензурадояк цензура. Цартнень-помещиктнень пингстэ сон вансь илязо тееве кодамояк валонть вельде зыян масторонтень-государствантень. Ней цензорось — кирдийтне. Сынь ваннозь-мучказь ванстыть кодамояк апародо аволь масторост — эсь пряст, ламодояк ламо салазь ярмакост.
Каявкстнеде. Школасо ды косо-лиясо тонавтнемстэ тонавтыцятне ды книгатне кода маштсть совавтсть од прятнес: татаро-монгольской игадонть казямо, кежей, урень сайниця лия мезеяк арасель. Полонс, келя, сайнесть, велеть пултасть, ават нарьгасть, верь валсть... Ламонь кувалма, мерема, истя ульнеськак. Лия раськень мастор, мода лиякс а сайнить. «Ашо варьгасо» истят тевтне а тейневить. Стакаль, кажочисэль эрямось кавто пингеде ламо татаронь-монголонь иганть ало. Те виде.
А рузонь иганть ало?
Мекс теде вейкияк тонавтыця вал эзь правто? Косольть ды косот сынь? Кие мерсь, улить салыцят-колыцят, ят масторонь сайницят парт ды берянть?
[503] Кода кортыть-сёрмадыть историктне, татаронь ясаконть покшолмазоль 15% иень перть пурнавикс улипаротнень эйстэ. Зяро пандтано Россиянь «Федерациясо»?
Зяро весемень пельде пурнавить каявкстнэде-налогтнеде иень перть Мордовия Рспубликасонть, 70-75% ильтявить Московов. Те а весе.Эрзятне пандыть ламоксть седе ламо. Московов кучозь ярмактне рузтнэнень велявтыть ламот мекев — рузонь литература, рузонь церьковасо рузонь молитва, рузонь телевидения, рузонь радио, газетат-журналт... Натой районтнесэ, косо эрицятнеде 75-80% эрзят, райгасетась печатави... рузонь кельсэ! А кемеви? Лиякс ёвтазь: ярмактне эрзянь, газетась — рузонь. Каня те аволь рассовая дискриминация? Варштатано лия ёндо. Россиянь келес эриця весе эрзятнестэ 85% эрить Мордовиянь томбальга. 85% пандыть Россиянь казнас каявкст. Зяро, кодамо парцунсо (формасо) велявтыть сыненст? А мезть кевкстнемскак. Мендязь трёшниккак тенст а мурды. Мезесткак сынст арась: а школаст, а эйдень кужост, а телевиденияст радио марто, а газетаст... Весе рузонь, чирестэ чирес. Секскак эрзятнень кедьстэ пурназь каявкстнэ целковоень пес ютавтовить рузонь культурас. Те вана ясак! Весе ясактненень ясак.
Кирдема мельсэ теяк. Татартнэ эзть кармавто эрзятнень исламонь койсэ озномо, эзть пансе-покоря рузонь поптненгак. Мекевланг, андсть эйсэст. Тень кис рузонь церьковась, кода ансяк эзь урендя татаронь хантнэнень ды мурзатненень.
Вана аволь кувака ёвтнема эрзятнень ды Эрзянь Масторонть умонь ды неень шкань эрямодост-ёжодост.
2013-це ие. Умарьковонь 7-це чи.