Поладкстомо (2016)/Меельце концерт
| ←Колмонень морот | Меельце концерт (2016) by , edited by Ломшина Л. А., Маризь Кемаль, Малахова Е. П. |
Тесэ весе монь...→ |
| Нуянь Видяз. Поладкстомо. Без продолжения. — Саранск, 2016. — с. 251—256 |
[251]
| МЕЕЛЬЦЕ КОНЦЕРТ |
Минь, а мезень теемадо, уш чинзэ мадема шкава Маркин оям марто саинек мель ютамс Пичева. Тесэ истя мерить пиче вирденть, кона нежеди велепентень. Сон прок бажи саемс веленть элезэнзэ, ванстомс варматнеде-цярахмантнэде ды кельмеде.
Яксинек аволь кувать. Сура чирева мазычитнеде ды лиядо-мезде кортнезь, эзинек маряяк, кода совинек велентень ды пачкодинек Тарнаень видьс. Апак учо понгинек «концертс». Кудонть икельга-ёжова каязь ундов чочко. Лангсонзо озадо аштезь верьга вайгель морась кудазоравась - Тарнаень Маня.
Ой, мороз, мороз, не морозь меня, |
[252] Аванть вайгелезэ кайсететсь куринкань келес. Маня сонсь сеери, сонсь иредемань пачк терявтни кутмордамс вакссонзо озадо сыре цёраломаненть. Кие соды, костонь-тенек эзь содаво. Атясь кирдсь кумажанзо лангсо гармония ды седямосонзо лездась морыцянтень.
Редимизь. Маня стясь ды тар-тур ютась каршонок. Черензэ — лавтовонзо ланга. Позаня сельмсэнзэ кивчкаить копордамо вечкицянь сяткинеть. Кургось а пекстневи — пейди, лаборды. Аванть чамазо якстере-румозь, пуворязь. Истят цёратне «мазыйть», аватне — седеяк... Нулгодят варштамскак лангозост.
— Э-ей-ей, ну и инжеть, ну и ломанть састь тенек! У-умок араселиде. Те, теня, течи монь покш-покш чим! Чарькодят? По-окш чим! Мон, Марюш, ми-ирденень лисинь. Ми-ирде-нень. Чарькодят? А-я-я-я, ай-я-я... — моразевсь Маня ды, кедьсэнзэ цяпазь, тусь киштеме. — Ох! И симинь мон течи, ох и Мамштынь. Адядо совадо! Кадовсь, кандан...
— Ды тон куш васня ёвтык, кие мирдепелеть? — кевкстизе Марюш.
— Каня, а неят? Вана сон, валаня конясь. Нейсак, кода гармониясонзо азаргали?! — кецнезь серьгедсь Маня. — Содат, зяро тензэ? Сизьгемень. Кеветее иеде мондень сыре. Кадык сыре! Кадык сыре! Ялатеке вечкса. Невтьса, кода вечкса?
— Сонгак тонь кондямо?.. Бутылкас ваныця? — апак визде, видьстэ сельмс кевкстизе Марюш эйкакшчинь ялганзо. Тонань чамава эзь юта покордамонь зэхельнеяк. Сонськак соды, кие сон. Тонадсь истят покорксонь валтнэс.
— Вай, кемть-иля, турванзояк а начтни. Те кодамо ломань? — Маня стясь Марюшонь малас ды, тошказь, прок арсесь ёвтамо кодамояк салавань тевде, мерсь: — Яла эри-ялга. Нейсак, зяро пенгть ла-лазнось? Ветькак а стувтне-самам... Марят?
— Истямось мартот эрямо а карми...
«Одирьвась» марикскак эзь тее.
— Ха-ха-ха! А карми эрямо... Карми! Ков моли? А кудот-чить сонзэ, а лият-мезть, — цяхазевсь Маня ды ютась ваксстонок «поланзо» ваксс.
[253] Киде, мезде мольсь кортамось, атясь марикскак эзь тейне. Седясь гармониясонзо, кунсолось, видестэ-аволь ветясь гайттнень, прянзо седе ёнсто аравтнесь гармониянть вельксэс. «Чарькоди, неяви, неть тевтнесэ...» — прынь мельс ве ёндо лангозонзо ванозь. Седясь, видеяк, а беряньстэ, седеймарязь. Кие соды, паряк, Пазось те ломаненть казекшнызе эсензэ «сяткинесэ». Ансяк эзь максо эрямонть марто вейсэ те видьместэнть кастомс мазый чувто.
Маня лоцьк озась седицянть ёжос ды серьгедсь од моро.
Вот кто-то с горочки спустился, |
Минь ванынек неть чансттеме, кода монень марявсь, ломантнень лангс. Истяяк мереват: кодат сынь чанстень асодыцят? Морыть, пеедькшнить-раксить, кутморить, прок одт, валскень чиденть мелявксост арасть... Арсетяно: наксавтыть эсь эрямост. Кода илязо уле, неть ломантнень эйсэ ули мезе-бути истямо, мезесь а сатны миненек. Мезесь — а чарькодеви. Паряк, пирявкст путни тенек седе ламо ярмак марто эрямос бажамось? Ярмактне ды сюпавчис правтомась кармавтыть эрямо тертязь?
Маня ды Марюш умоктояк умок тонавтнесть ве классо. Сисемеценть прядомадо мейле кист явовсть: Марюшонь эрямонь янось ветизе ошов, Маня кадовсь теске, чачома велезэнзэ. Важодсь од шкастонзо саезь пенсияв туемазонзо фермасо — потявтсь скалт. Тевсэ авась — тол. Кода ломаньгак а берянь. Аволь тонадояк чапамонтень, питнепе тензэ аволь уле. Косто прась прязонзо те зыянось, косто саевсь? Паряк, мирденень алисевемась? Эли сокор авазо, кона од шкастонзо эзь ютне вина цярка вакска? Содык азё. Аволь ансяк ошонть, велентькак улить весеменень анеявикс ёнксонзо.
— Варштака удалов! — каятотсь Марюшонь вайгелезэ, ды мон варштынь ков мерсь.
Асфальтсэ вельтязь кинть тона чиресэ, минек удало, аштесь якстерть-ашо пона скал. Самонзо эзинек редяяк.
[254] Сон сельмень апак кончтне вансь гармониясо седицянть ды, лавтовозонзо нежедезь, жойсэ морыцянть лангс, кунсолось сынст лекстямонь апак полавтне. «Те мезень дюния? — прок кевкстнесть сонзэ чопода-сэнь сельмензэ. — Уш сисемеце ваз кандтнян, истят вайгельть, истят тюнихань тевть эзинь марсенекшне». Пилензэ келемтинзе, аравтни эйсэст истяяк, истяяк, мель путы седе парсте марямс жойттнень-гайттнень.
На нём погоны золотые |
Марюш кепедсь кодамо-бути тикшень нетькске, ахолдась кунсолыцянть лангс ды панизе зярыянь тарка. Тень эйстэ мезеяк эзь лисе. Ансяк авась мизолксонь кирдезь ютась тарказонзо, сась мекев сюракшовоськак. Сельмензэ, меряват, кевкстнесть: «Тынь мезе истя? Тынсь кунсолотадо? Мекс монень а мертядо?» Панемензэ эзинек карма. Кадык витьсы седеензэ. Ды ракшась аштесь, прок кургонь автезь кунсолыця эйкакш. Сырк эзь тее, зярс ванынек мельганзо.
А вчера, расставаясь вечером, |
Мон эзинь сода ки лангс ваномс: морыцятнень эли «билеттэме» кунсолыцянть?
Скалось шаштсь седеяк малав. Кинть куншкас. Секскак седе покш мель явинек сонензэ, ванынек сонзэ прянь ветямонзо мельга.
Кодат ёжот, алкукскак, бизмолдыть сонзэ эйсэ? Мезесь весемеде пек тукшны мелезэнзэ? Паряк, якстере тюс гармониясь ды потстонзо лисиця викниця-вакныця [255] гайттне? Мекс, меремс, мельс а туемс Манянь «с горочки спустился» моронтень? Мезе марясь ракшась, мезе нейсь, соды ансяк сонсь. Мон содынь эсень: истямо кунсоломась а стувтови зярдояк. Мазый вайгельсэ морыця артисттнэньгак аволь весе истя вастнить, кода латошка скалось Манянь ды сонзэ «нежензэ». Одарозо, ванан, секень вант, сезеви, капшамс тензэ эряволь кудов, сон кодаяк а туеви.
Чизэ валгсь. Новольсть сундерькст.
Сыргинек кудов.
Молемстэ васня вайкснинек-кортнинек сюракштонть. Кие соды, паряк, кой-кодат мельть-арсематкак чачнесть прясонзо? Мейле Марюш таго ледстнесь ялгадонзо, яла мелявтсь кисэнзэ. «Эзь венчаво шкастонзо, секс туевськак те нолажа кияванть...» — ёвтынзе сонсь меельце валонзо кудос совамсто.
...Се «концерттэнть» мейле ковонь-кавтонь ютазь таго сынек велезэнек.
Тарнаень кудост вакссо зярыя, седе ламо сыре ломанть.
— Вай, те мезе? — абунгадозь мерсь Марюш кудонть видьс апак пачкоде ды келейгавтынзе эскельксэнзэ.
— Мезе, мезеяк апаро?
— Манякань ансяк кандызь цёратне.
— Кода? Косто?
— Пичетнень вакссто, Карьерэнтень апак пачкоде лушминестэнть. Муизе пензэ...
Те кулядонть саимим ризкс.
Мекс истя лисни эрямосонть? Веенст, седе ламотне, сорныть эрьва трёшникест кис, таштыть, ускить мезе понгсь кудов, арсить: тоначисэяк кармить ярсамо-эрямо, лиятне — мекевланг, мезеяк тенст а эряви. Косо се куншкась, конань лемезэ эрямонь вейкетьксчи, гармония? Мекс а машттано эрямо неть койтнень коряс?
Варштынь вальматнень алга каязь чочконть лангс, ды сельмем икелев сась чивалгома ланга аволь умок неезь картинась: верьга граж вайгель майсевти-мерьки [256] моронть Маня, лезды тензэ «гармоньсэнзэ» кокша пря атясь. Каршост — якстере-ашо скал. Кунсолы морост — оймензэяк, неяви, а таргси.
Мольсь «концерт». Манянь меельце «Концертэзэ».