Поладкстомо (2016)/Коввалдонь вальс

From Wikisource
Jump to navigation Jump to search
Коввалдонь вальс  (2016) 
by Нуянь Видяз, edited by Ломшина Л. А., Маризь Кемаль, Малахова Е. П.
Нуянь Видяз. Поладкстомо. Без продолжения. — Саранск, 2016. — с. 154—162

[154]

КОВВАЛДОНЬ ВАЛЬС

1

Телень вирь. Чикуншка. Неят кизэнь коряс седе васов.

Иняй апак капша, арсезь эскели кияванть. Шкань-шкань кепси прянзо, ютавтни вановтонзо нувсиця чувттнэнь ланга. Потсонзо эвтить кавто ёжот: нусманя, васов кадовозь ёвксонь кондямо мазый шкадонть, ды кенярксов — те виренть, чиденть цивтёрдыця кинть марто одс вастовомадонть. «Сестэяк истяль, прок иетькак эзть юта...» — лийсть, цяк эзть каштордо, ледстнематне се телень пелеведенть.

Ошось маласо. Якицятнеде ламо. Ловось шешкезь. Молемс шождыне. Укштортнэ, ве пеле касыця пичетне вармань аразде аштить таймазкадозь. «Мезе учома? Сэтьме? Мельде-валдо молиця лов? Кувсиця варма? Цят якшамот?» — кевкстнить олажа-сэнь ванькс менеленть. Телень куншка, якшамось вана судос а автори. Цёрась мик шкань-шкань сайни прястонзо капюшононть.

Кистэнть кершев явовсь тей-тов менчевиця яннэ. Иняй, тарадтнэде комсезь-комсезь, ютась эзганзо ды лиссь кужинес.

«Те тесэ?» — прась кургстонзо марямга кевкстемась.

«Тесэ, атя, тесэ! — токнозевсь седеезэ. — Теке исяк ульнесь. Мезеяк эзь полавтово... Эх, эрямо, эрямо!..»

Ве таркасо аштезь, сельмень апак кончтне талай вансь кужиненть куншкасо ашосо ёролдозь кузнэнть лангс. «Мельсэть? Эзик стувто? — пшкадсь эсь пачканзо пиже-каентень. — Мельсэть эрьгедемадонть сеть элякалицятне? Сакшность китькак сындест мейле?» Те меленть полавтызе лия: «Мекс ононть истямо нурькине эрямозо? Лип — ды арась!»

...Учовсь Од иесь. Иняй ды Штерине анокстасть вастомонзо. Содасть: кияк тенст сыця а ули. А вечксызь инжекс якамонть сынськак. Ялатеке котьмамс аламошка эрявсь, кой-мезе путома стуворонтень. Кода эно — Од [155] ие! Весть сон иезэнзэ эрси. Штерине рестась модамарть, седе икеле нолдазь сывельденть тейнесь котлетат. Ваканнэс путсь ниле-вете якстере умарть. Иняйгак содась эсь тевензэ: шампанскоесь ды шоколад ось учость кельмень-кайсэ эсь шкаст. Ней вана путнесь стуворонть ланга кедьгеть, керсесь кши, лездась нинстэнь. Те чокшнестэнть тензэ седеяк вечкевсь улемс поланзо вакссо.

— Монь весе! — мадстизе газонть ды мельспаросо яволявтсь авась, велявтсь, мизолдозь варштась мирдензэ сельмс. Плитанть вакссо котьмамодонть, псиденть чамазо якстерьгадсь, кода анокстазь умартне.

— Монь — умок! — пеедькшнезь мерсь каршонзо аштицянтень Иняй, эскельдясь ваксозонзо ды ёжомарязь, дёлязь-васькавтнезь кутмордызе «монь весе» мерицянть.

— Пейделькинем тон монь...

Пелевентень кадовсь часошкадо ламо.

— Нейке, нейке оршнек! — апак учо серьгедсь Штерине кудонть келес, теке кияк пси ведьсэ невельдизе, ды васенцекс чийсь шкапонтень.

— Ков? Мезе пупинзеть? — абунгадсь Иняй.

— Иля, иля кевкстне. Мейле пекенек пештьсынек. Ковгак а туить котлетанок. Вирев адя... — ёвтызе мелензэ авась.

Абунгалемс цёрантень а мезть. «Омбоце пельксэзэ» аволь васенцеде истя кирвазни. Иняй содасы гувкаиця обуцянзо. Сови лиясто, кода ней, превезэнзэ истямо, мезде а арсевияк. «Панжиковонь варма!» — яла мериль тензэ. Вана кепедьсызь рюмкатнень, ёвтыть Од иень мельть-арсемат ды, аламос аштезь, — велькс алов. Телевизоронть икеле веньперть тарномань шкатне ютасть. Иетне ней лият, лият моросткак.

Вирев, кадык вирев! Мезть, алкукскак, лужалемс кудосо, мадемадо икеле куш ушов лисема, маряма телень коштонть танстензэ.

Нидензэ Иняй эзь кадово: оршась Свитра, пальто, карсесь лембе котат.

Ве. Ковось сиянь тюссо валны ловонть. Цивтёрдыть-кончтнить. Сиземань апак сода, прок пакшат, тешттне.

[156] Иняй ды Штерине, кедте-кедьс кундазь, прок од ломанть, эскелить ламоксть ютнезь-шешкезь кияванть ды, эстест марямга, ледстнить Од иень вастоматнеде.

— Эрьва кодат «кузнэть» нейнинь, — валтнэнь кочксезь, апак эрязкале ёвтызе мелензэ Иняй. — Чарыцят-аштицят, покшт, вишкинеть... Весемеде пек сотавсь пряудемезэнь, кадовсь мейсэяк а саевиця ледстнемакс содат конась?

— А? Арась! — нурькинестэ, пупордязь ёвтызе валонть Штерине.

— Васенцесь. Ульнесь се Од иесь эсенек велень школасо. Косо-бути зэрнесь война, валовсь верь. Мон тонавтнинь колмоце классо... — ледстнесь Иняй. — Партатнень айгинек ве таркас. Классось келейгадсь. Куншкасонзо — вирень инжесь, пичине. Сон неявсь сэреекс ды келеекс. Суликань налкшкетнеде эзинек марсеяк. Сынст таркас тарад петнева понгавтнекшнынек конёвсто теезь-педявтнезь рисьминеть, кирькскеть, оскинеть... Эрявсь васня газетатнень артомс. Мейсэ?

— Марсинь.

— Виде, якстерькаень ведьсэ. Якшаматянь таркас Од иень казнеть явшекшнэсь Анна Яковлевна тонавтыцянок: эрьванень суронь эчксэ розень кши печтьке! Истямо питней, истямо тантей казне седе мейле монень кияк эзь казне.

— Моньгак васень «кузнэсь» ашти мельсэм, — ушодсь Штеринеяк, ансяк прядынзе валонзо полазо. — Мон, содат, войнань васень иестэ чачинь. Тетянь эзия нее. Войнадо мейлень шкась уш лияль, казнекс тенек макснесть аволь ансяк кши печтькеть. Кадык аволь свал, кши кудосонок эрсиль. Якшаматяяк кескавонзо марто тенек сакшнось, ды мик киштсь мартонок. Умок те ульнесь...

Келей кистэнть кершев, чувтотнень юткова, тусь теине яннэ. Авась саизе мирдензэ кедте ды, тарадтнэде пряст комавтнезь, совасть вирьс.

«Таго кодамо-бути тюниха содавтызе...» — юв-яв ютась цёранть прява.

— Курок, седе курок! — капшавтсь Штерине. — Аволь ламо кадовсь, Кремлянь баягатне, секень вант, бом-бом гайнезевить. Кенерема. [157] Лиссть чувтосо ды пешкскуросо эрьва ёндо пирязь кужинес. Куншкасонзо, ловсо почодозь, сиякс цивтёрдсь кавтошка ломанень сэрьсэ кузнэ.

— Вай! — эзь кирдеве, ве шкасто лиссь дюм веть лытыцятнень кургсто валось, — мерят, истя мазыйстэ оршнезь кузнэ марто вастовсть васенцеде.

— Неят? — кецязь мерсь авась.

— Неян. Те — Пазонть пельде, — эль марямга, пельсь илязо тандавтово икелест мазычись, — мерсь Иняй.

— Те казнесь — миненек, — мельспародонть гулдордыця вайгельсэ ёвтызе мелензэ вакссонзо аштиця низэ.

— Истямо сиясо оршнезь одирьва неян васенцеде! — яла эзь оймаво Иняй.

— Тонь весе «васенцеде», — пейдезевсь авась, ледстизе поланзо пельде а весть марсевезь валонть.

— Теньсэ, дугинем, эрямонть танстезэ. Весемесь эрямосонть максови васенцеде ды весть: чачомс, панжовомс-цветязевемс умарь чувтокс, куломс. Ве таркасо шешкезь эрямось — а эрямо, — апак эрязкале, арсезь прядынзе валонзо Иняй.

— Вана мезе, атя! Кузнэнть перька ловонть шешкема... — мерсь Штерине ды апак сэзнэ кундась тевс.

Верендясь тевентень полазояк. Кадык сеске эзизе чарькоде, мезекс те эряви, ялатеке каршо молеме эзь карма. Ловось аламоль. Пильгсэст айгшесть-брикстяесть сонзэ тей-тов. Истя эрязкадсть, натой псилгадсть.

— Атя, зяро шказо, варштака, — пшкадсь Штерине поксориця ялганстэнь.

Атясь час марто кедензэ аравтызе ковонть каршо.

— Кеветеевтеме! — каятотсь вайгелезэ.

— Вадря, кенертяно! Шешк, шешк, валаня улезэ. Седе а пупордятано.

— Иля пеле, «Кузнэсь чачокшнось вирнесэ» моронть морамсто уш а пупордятано, — оймавтызе нинзэ Иняй.

— Арсят? Мезеяк, Иняй, а чарькодят! Прок потяка эйдят... Зяро кадовсь, варштака.

— Ветевтеме кемгавтово.

[158] — Нейке вырновтык пальтот! — кармавтозь ды, теке марто, эрьведезь-кецнезь, прок эйкакш, серьгедсь авась ды сонськак вырновтызе лангстонзо стака кувака шубанть. Стясь поланзо каршо, путызе вить кедензэ лавтовозонзо, омбоценть — венстязь кедезэнзэ. Иняй чарькодизе Штеринень мелензэ, вить кедьсэнзэ карксамга кутмордызе нинзэ ды сынь чаразевсть вальссэ.

Пек паро, зярдо певерить «тештинеть»,

Ды перьканок цитни сэняжа лов!..

Штеринень човине, горниповнекс чольдердиця вайгелезэ мазыйстэ уйсь каштмолиця вень вирьсэнть. Сонзэ кунсолость ашо вельтямосо копачазь кужинесь, перьканзо пирявксокс аштиця чувттнэ.

— Содат, те — вечкевикс мором, — сеедьстэ лексезь тошкстась морыцясь поланзо пилес. — «Телень вальс».

Течи мон весемеде уцяскаван,

Кецни мартом сиянь валдо ков...

— Содан, тештинем, — мерсь Иняй, ды эрязасто, пилытнень седе келейстэ путнезь, кармась морыця нинзэ чаравтомо. Вальсэнь гайтьсэнть велясть перькаст каштмолиця укштортнэ, куракштнэ, кужиненть куншкасо каштан од тейтерекс мазыйгалиця кузнэсь, сиянь почтокс цивтёрдыця ловось.

— Саты, саты, ормаза! — сезизе моронзо, пейдезь серьгедсь чаравтыцянзо пилес Штерине.

Иняй марикскак эзь тее.

— Тра-та-та, ля-я-ля-ля... Валдо ков... — морась сон Вальсэнь ритманть мельга.

— Чаракадынь! Фу, допрок велязевинь. Кирдть, кирдть, пран...

Иняй энгамсь, лепштизе — илязо пра — пеняцицянть мештезэнзэ, ды сынь зярс-бути аштесть псистэ лексезь, ве таркасо. Ансяк чувттнэ, ловось, велькссэст ковось яла чарасть сельмест икеле.

[159] — А кельмат? — колызе чатьмонеманть Иняй.

— Пси, кодат кельмемат! Шканть, шканть тунь стувтынек. Зяро?

Иняй аламнеде илештизе ожа пенть, комавтызе прянзо ды рангстась виренть келес.

— Кемгавтово, тештинем! Од ие марто!..

— О-о-о! — каятотсь виренть потсто коштвайгель.

— Од ие марто! — пижакадсь Штеринеяк. — Арсян теть, седейпелькскем, паро тевть ды менелень сэрьсэ-келесэ вечкема!

— Текень арсян тонетькак! Ульть свал истямо мазыекс, кодамат ней, вечкемнем! Мизолксось илинзе стувтне турват!

Иняй чатьмонезь аравтызе нинть прянзо ковонть каршо ды варштась сэнь сельмезэнзэ, конат цитнезь цитнесть те ожо валдосонть. Вансь-вансь ды педявтынзе турванзо вастанзо аламнеде панжовозь, прок тень учостькак, турвас. Палсесть апак визде. Киде виздемс? Мезде? Перькаст — чопода вирь, велькссэст — тештть. Сынь ульнесть ансяк кавонест. Вейкест-вейкест туртов. Вальстэнть ды вечкемадонть сеедьстэ чавиця кавто седейть. Неицяст — ськамонзо ковось, кона сявадозь вансь лангозост.

— Оршнек...

— Арась, арась, Иняй. Истямо ве, истямо Од ие! Содат мезе? Кадык аволь сёксь. Варчасынек «Сёксень Вальсэнть»? А? Кирдть, — мерсь кедензэ венстемстэ ды лекшкадсь Иняень мештес Штерине. Ды таго чаразевсть вальссэ.

Иетне эскелить, вечкемань толось эри,

Косо явовинек, тосо вастовинек одс.

Иетне ливтить — вановтот цитни Ды тешттне велькссэнек налксить...

Сравтневсь кужонть келес, шаштызе виренть потс каштмолеманть авань сэрей, лийканя вайгелесь.

Моронть прядызь кавто вайгельсэ:

[160]

Иетне ливтить, вановтот цитни
Ды тешттне велькссэнек налксить...

Иняй вить кедьсэнзэ нардевстэ кирдсь, аламнеде удалов мендявозь, нинть човине рунгонзо. Истя седе ён, мель седе витеви ды седе паро чарамс. Штерине — алкине, стёжна. Мартонзо велямс шождыне. Усксемс а сави. Цёрась оймензэ путсь вальсэнтень. Седе виевстэ, седе эрязасто, прок превстэ лиссь, мездеяк апак арсе, мезеньгак апак маря кармавтсь чарамо «тештинензэ».

— Пран, вай, пран! — човине, пелиця вайгельсэ рангстась Штерине ды, прок пешксе кескав, прась кунст кавшаня ловонть потс, мельганзо ускизе ветицянзояк. — Ну, весе, а стяван, ёман, — раксесь авась.

Иняй, лангозонзо празь, седеяк лепштизе ловонть потс, келемтинзе кедензэ ды каиксэль чамазонзо ловпаморькске.

— Вы-ы-й! Нолдамак, нолдамак, сыре эвсь!

— А нолдатан, теске кадовтано, таркась чевте, — мотордсь цёрась сонськак эзь сода мезть, ды сеедьстэ лексесь нинзэ чамас. Окойники, ливчанясто стясь, венстинзе кедензэ ды лездась стямс нинстэньгак, чукизе эйстэнзэ ловонть, — ну мезе, поладсынек?

— Вечкевсь?

— Эно!

— Саты, саты, атя! Кузнэнтеньгак, ванан, налкставинек.

— Тон арсят?

— Арсемскак а мезть. Азё куш палык, — пейдезевсь Штерине. — Монь пельдеяк.

Иняй автордызе ловонть лангсто шубанть, сорновтызе ды ламбавтызе нинзэ лавтов ланга, витизе шапканзо, лездась чочнемс шуба повонзо. Оршнесь сонськак.

— Вант, иля ормалгадо, шубась экшендсь, — мелявтсь Иняй.

Полгаря сельме пешксе ковось вансь неть, мерят, превстэ лисезь ломантнень лангс, вансь ды, марявсь, кортась: кодат тынь, цёра ды ава, мазыйтядо, кодат Уцяскавтадо! Улевельтькак весе тынк кондят...

[161] ...Кудов састь пелеведе мейле часонь ютазь.

Штерине эждинзе котлетатнень. Вейкень-вейкень путнесь вакашкева. Лакавтсь чай. Иняй каршо шкапкестэ сайсь кавто фужерт, пенчпаргинестэ — пеельть-сянгинеть, таргизе кельменькайстэ вечкевикс симемапелензэ — шампанскоенть.

Нить-полат стясть стуворонть ваксс ды токавтызь ожосто пургсиця летькеденть пешксе кедьгинест. Каятотсь суликань ванькс гайтьке.

— Од ие марто, Штерине!

— Зяроцеде? — пейдезевсь кудазоравась ды копордась фужерстэнзэ.

— Чанстьсэ эрицятне а ловить, — симсь аламошка ды поладынзе нинзэ валонзо: — Анокан колмоцедеяк тешкстамс. Лов тесэ арась, кияксось валаня... Пароль морамскак. А мезекс неть фонтнэ-граммофонтнэ. Вальс, содазь, нусманя нурсиця вальс...

— Кузнэнть стувтык? Лия истямо Од ие иля вешне. Уф, кода сельмень сявадозь сон вансь лангозонок! Редик? Саты. адя мадеме, вальсовиця, — путсь пе Штерине «од иентень». Прядызь фужерстэст винанть ды ютасть удома нупалезэст.

 

2

...Иняй атя талай аштесь кужонть чиресэ. Прясонзо чарасть-велясть се умонь телень веденть, келей чама ковдонть, вальссэ прамозост нарамодонть ледстнематне. Вансь кузнэнть лангс. Сон ней ёвксонь кондямо мазыекс эзь неяво, эзь мизолдо кода сестэ. Мезеяк эзь полавтово. Весемесь эсь таркасонзоль. Кода ульнесь се вестэнть. А маряви ансяк баягинекс гайгиця се вайгелесь, арасть ковонь валдодонть цитниця сэнь сельмтне. Косат ней тон, Штерине? Мекс эзь ванстово, эзь кувалгавтово тенек те кузнэнть вакссо ютавтозь Од иесь? Мекс вадрясь а эрси берянтеме? Та-косто васолдо-васолдо, косто-бути омбомасторсто совась прязонзо «Неаполень веть» Вальсэнть нусманя-нусманя, седеень калавтыця-кольстиця гайтесь.

[162]

Венчтне удыть эрькенть чиресэ,
Састо лымбакстнить ды шольнить.
Васоло вере цитнить тешттне
Ды ковонтень, ды ковонтень кеняркст казить.
Явовинек, дугай, тонь марто,
Вечкеметь карман пингем перть.
Гайгий вайгелеть а стувтови,
Вай, а стувтови, а стувтови зярдояк.