Поладкстомо (2016)/Аниська
| ←Тесэ весе монь... | Аниська (2016) by , edited by Ломшина Л. А., Маризь Кемаль, Малахова Е. П. |
Ну, кода мунямом?..→ |
| Нуянь Видяз. Поладкстомо. Без продолжения. — Саранск, 2016. — с. 263—266 |
[263]
| АНИСЬКА |
Те валось войнань шкасто ды мейлеяк эзь тукшно кельпрястонок. Аниська ды аниська.
Мезе парось те тикшинесэнть? Мезе мазысь? Варштат лангозонзо — а сэрьс, а келес. Лиятнень коряс мейсэяк пек а явови. Панжи ашосто. Прязо моли зонтик ёнов. Лопанзо теке пурькань. Паряк, пароськак арась, ансяк тейтерень чевтьстэ ёвтавиця те лемесь эрясь ламонь превсэ. Мартонзо эрьваксть вастовомсто Потмовам юты кепе-штапо эйкакшпингедем ледстнемань лембе коштке. Ваксканзо ютамсто сюконян.
...Кизэнь маней валске. Мизолдозь мизолды Теряй Васолпокштянь кудонзо велькссэ чипаесь. Ваны минек пелев. Те ёнксонь кудотне, пирявкстнэ, латотне, чувттнэ — весе экшелить лембе, вечкевикс валдосонзо. Паро! Ойметь солы сыргоземадо мейле чипаенть каршо аштемстэ. Парсте а сыргозяткак — седе курок ушов.
Озынь кузтемпес. Кецнян од чинтень.
Лембе удома таркадонть мейле маряви экше. Саимим сурневтема. Ялатеке аштян. Ванан лопинень пес содавикс кальтнень лангс; ванан, кода поксарить-пулькить киньчелькесэнть саразтнэ. Оно шабранокак, Эрьмай ялгам, прянзо невтизе. Неимим ды сась минек кузтемпес. Лемезэ Дошуз. Ансяк мертяно тензэ, куринкань цёратне, Эрьмай. Кудо лемсэ.
— Калмонь чей лангов молят? А? Молят, арась? Аниськатнеде тосо... вана! — педясь эйзэнь Эрьмай, теке [264] педякай тикше, адя ды адя. — Кемат? Куш, келя, улав ускт. Ёга Вашур тень мерсь. Сон сырькаензэ марто якась. Монсь неия. Молят? Адя, адя, а маняват...
Эрьмай истямо цёрынесь: куроксто эйстэнзэ а менят.
— Ды мон, ды... — кавтолдозевинь, сеске тень превс эзь са, мезе меремс, — мон молевлинь, ансяк Веруш... Ков сонзэ марто?
— Ков, ков... — тесэяк эзь талакадо, мусь, нонай левксэсь, мезе меремс, — мартонок сайсынек! Вейсэ седеяк вадря.
— Паро, сайсынек Верушоньгак! — прынь ялганть марто ве мельс.
...Кись аволь нурькине. Эскелямс тенек сави колмошка вайгельпеть.
Ютынек Карда лейненть трокс сэденть ды куроксто лисинек веленть томбалев. Кинек таргавсь пижелдыця лисевкстнэнь-сюротнень юткова. Терди сон эйсэнек икелев. Менелень сэньксэсь гайгезь гайги норовжорчонь вайгельтнеде.
Ды вана сонсь Калмонь чей лугинеськак.
Мекс истя, а чарькодеви, тандавтнить эйсэнек, пакшатнесэ, те лемсэнть? Кодат тесэ чопачат? Кодат калмот? Лемесь ансяк... Мезде пелемс? Кодат теть те чеядавксов луга панкскесэнть Ведьават?
Тандавтнесть эйсэнек оно мезень кувалма.
Зярдо-бути неть таркатнева кассть тусто вирть. Пачкаст а ютават. Тесэ ульнесь Орданьбуень умонь эрицятнень ознома таркаст — репештяст. Аволь васололь Сёвонь латкось. Пек сэрей. Потмаксканзо чии-чольдерди, теке уцясканзо вешни, Керь лейнесь. Умонь-умонь шкань Ознома кужонть маласо, сэрей пиче ютксо, ульнесь калмазырь. Калмсесть тозонь эрзятнень православияс совавтомадо икеле. Инешкипазнэнь ознома шкань калмазыресь, содави, эзь ванстово. Начко тарканть седе мейле уш лемдизь Калмонь чеекс.
Триця-андыця тикшиненек вастневсь чуросто. Аволь Эрьмаень валонзо коряс. Мельганзо, чарькодеви, ульнесь кинень пансемс. Минек кондят прянь истя трицятнеде ламольть. Эскелят-эскелят — муят. [265] Рунговат зыйть юты кеняркстонть. Сезьсак ды седе курок кургозот. Верушонь пеензэ, ванан, пижелдыть, теке ваднинзе пиже артовкссо.
Хрып-хрып, хрып-хрып-хрып... — теке нумолнэть, порнетяно ламбамне нетькскетнеде. Тантейть!
Шкась мольсь.
Чивалгома ёнксось, эзинек фатяяк, чополгадсь. Менеленть пелензэ вельтизе раужо-сэнь пель. Сон аламонь-аламонь копачизе аволь умок пеедькшниця чипаенть. Прок сундерьгадсь.
Пелесь сравтовсь менеленть келес.
«Курок, седе курок, Веруш», — яла эрязкавтнян сазорнэм. Чийтяно видьстэ-видьстэ. Пек а чиеват. Чейть, алашань сэрьсэ пупиця кирмалавт... Икеленек кивчкаи Эрьмаень олазь сэнь панарозо. Мезе сонензэ? Ськамонзо. Покшкак монь коряс. Вейксэ тензэ топодсть. Варчик, кенерть мельганзо.
Чийтяно сильдейтнень юткова прянь-полдань синдезь. Веруш эль кенери. Кирдян эйсэнзэ кедте. Паро куш а аварди. Вить кедьсэнзэ, теке пусмине, — аниськат. «Седе курок, Веруш, курок!» — сельведень пачк, кургом эль автневи, капшавтан эйсэнзэ. Сизесь тейтернесь. Лекси — оймезэ а кельги. Цяк а аварди.
Ёндолось лазнызе менеленть пельксэнь-пелькс. Мельганзо прок кие-бути ацирьгалезь сыргавтынзе таркастост кудодо покш кевтнень. Трах-та-ра-рах! — каятотсь верде тандавтниця гайть.
Цяпадимим човоньс васень петнявксось. Мельганзо омбоце...
Калмонь чей наронть чиресэ — чувтонь чарыне лангсо трактористэнь кудыне. Кадовстькак эйзэнзэ зяро-бути эскелькст.
Эзинек кенере.
Пиземесь тусь лосьсэ. Таго рангстась-урнозевсь пурьгине. Кепе кочкарязонок авторясь пиземеденть тикшень кашторксось. Ж-ж-ж... — теке сисем прясо ёзнэ вешксь мельганок.
Начкинек сурень пес.
[266] Ойсинек эземненть лангс. Кукорьгадынек, теке ципакинеть. Верушонь почаня-тусто черьстэнзэ кольгсь лавтовонзо лангс ведне. Якшамодонть сорнынек пой лопакс.
Эрьмаень тарказо шанжавонь коцтсо вельтязь вальминенть вакссо. Кавоненек шкань-шкань кепсетяно вановтонок ушов. Кода, мезе тосо? Ютасть ловозь минутат, маряви — певтеме.
Энгами течи? Арась?
Овсе маласо кивчкадсь, мик кашторкс марто, ёндол. Мерят, кияк букань пряшка сардо кирвазтсь. Сеске мельганзо цярадсть прок ламо-ламо цяк кепсевиця мушкорсо.
Бом-бом-бом!..
Пиземесь теке азаргадсь. Эскелькс а неят.
Арси оймамо — арась?
Пиземень прявтось, улема, маринзе эсь пачканок энялдоматнень. Аламонь-аламонь кармась сэтьмелгадомо. Кода ве мельсэ устававсь, истя прядовськак. Меельцеде зяро-бути чукадсь, нать, коензэ кис, лазонь латонть ланга ды, сюкпря Пазонтень, оймась.
Минь вейке-вейке мельга лисинек «кошинестэнек» ды чиезь сыргинек эсенек киява кудов.
Кинть кавто ёнга, алкине таркинетнева, сэнеждсь-цитнесь ведь. Ёрвалдозь менельсэнть седеяк кецнезь мизолдсь чипаесь.
Эрямось одс совась эсензэ лувс. Теке эзь тандавтнеяк эйсэнек Пурьгине атясь. Оймсесть-тейсть ды седеяк виевстэ гайгстасть Норовжорчтнэ, пингеде пингень менелень баягинетне. Оймеёжоткак валдоми келес панжадо те сэняжа паксянть лангс ванозь.
Седеем китнэсь сазоркам кис. Пелинь, илязо пра сэредеме. Кие соды, кода велявты те «экшелямось»? Парт учнемс а кона ёндо. Оно кода кельмекшнинек.
Авань сёвномадонзо эзинь арсеяк. Содынь: понги тень.
Зыян, уцясказонок, кодамояк эзь лисе. Кияк эйстэнек эзь ормалгадо. Паряк, асатыксчисэ тонадовозь эрямось идимизь? Паряк... Васенце идицякс тенек ульнесь Аниськась.