Поладкстомо (2016)/Ёртык,... ёртовиндеряй!
| ←Стякшнось эсь раськензе кисэ | Ёртык,... ёртовиндеряй! Ледстнема (К. Г. Абрамовдо) (2016) by , edited by Ломшина Л. А., Маризь Кемаль, Малахова Е. П. |
Ули мастор, конась монь седейсэ...→ |
| Нуянь Видяз. Поладкстомо. Без продолжения. — Саранск, 2016. — с. 353—361 |
[353]
| ЁРТЫК, ...ЁРТОВИНДЕРЯЙ! |
| Ледстнема |
Кузьма Григорьевич Абрамов сёрмадеенть марто 1970-це иетнестэ саезь вастневинь аволь весть. Седе сеедьстэ — уш аволь од ломанекс, 80-90-це иетнестэ. Васенцеде мон сонзэ неия... Вай, теде эно седе тов, седе мейле...
Зярдояк а стувтови, кадовсь седейзэнь, ламо ломань марто сонзэ вастовомазо, конань пурнакшныя-яксевтекшния мон.
Важодинь сестэ Мордовиянь университетэнь велень хозяйствань факультетсэ доцентэкс. Сельхозникелинь... Савкшнось марсемс лия валткак: «колорадонь унжа». Мезе ульнесь — ульнесь.
Тонавтнема кудонок-корпусонок Саран ошонь чикуншка-чивалгома ёноль. Шабранок, комсь-колоньгемень эскельксэнь ютко, — медицинань ды биологиянь факультеттнэ. Учовикс вастовомадонть васняяк кортынь-теинь Кузьма Григорьевич марто. Ёвтыя арсемам: вастовомс колмо факультетгнэнь студентэст ды тонавтыцяст марто неть факультеттнэнь вейсэнь покш залсонть. Тешкстынек ютавтома чинть, шканть, мейсэ пачкодемс тензэ Валдо-техникасо эрямо таркастонзо.
Сёрмадынь ды понгавтнинь корпустнэва ине сёрмадеенть марто вастовомадо яволявтомат. Кодаткак кортамот прявттнэнь-профессортнэнь марто — лездамс-пурнамс ломанть — арасельть.
Сась кортазь чись-шкась. Сивединь такси ды кучия Абрамов мельга. Седеезэнь кундась пелемань ёжо: мезе [354] карман тееме, а Пурнавиндеряйть кунсолыцят? Визькстэнть ков тейсынь сельмем?
Стяко ризнынь-мелявтынь.
...Телень чокшне. Кемготово чассто аволь вишкинетнеде залось пешксель тыц. Студентт, шержей черь профессорт, тонавтыцят, лият... Учость сень, кинь лемезэ покш буквасо тешкстазель эрьва кува понгавтнезь яволявтоматнесэ, кинь ламот содылизь книганзо коряс.
Пачкодсь Кузьма Григорьевич зярыя минутадо ёвтазь шкадонть икеле. Вастыя кузтемпесэ. Лездынь тензэ кайсемс, ды апак капша совинек залонтень. Ютынек икелев, кузинек сцена лангс, озынек анокстазь стуворнэнть экшс. Ёвтынь ниле-вете валт седе, мезень кувалма пурнавинек, ды сеске максынь вал «чумочинь» теицянтень.
Кузьма Григорьевич эскельдясь ды стясь вакссонок трибунанть экшс. Аволь кувакасто ёвтнесь китнеде-янтнэде, конатнева тензэ савсь эскелямс ламо иень перть, кодатольтъ сынь; седе ламо ёвтнесь шкинемань лабораториядонзо: косто саевить тематне, кода чачить-вельмить образтнэ-чамачачотне, конатнень эрьванть эсензэ, лия ёнов а молиця корозо, кортамо лувозо, вайгелезэ, турванзо, сельмензэ... Ледстизе, кода «чаповить» сюжеттнэ, эйсэст кувтатне...
Залось каштмольсь — а козкс, а кашторкс. Ёвтницянть сэтьме, а капшиця, эль марявикс корсяня вайгелезэ општ мерсь. Мезе ёвтыксэль — ёвтызе. «Кинь кармить улеме кевкстеманзо?» — ульнесть меельце валонзо.
Монень марявсь, пе а ули кевкстематненень. Чудезь нудееть. Макснесть конёвнес сёрмадозь, макснесть таркасто пшкадезь. Кевкстнесть эрьва мезде: ламо книгань сёрмадыцянть эрямодонзо, шкинемань икелечинь тевдензэ, политикадо, уцяскадо, чанстте чарькодемадонзо... Шкань-шкань залонть сорновтнесть цяпамотне.
Ламо мезе удемстэнь нардавсь, кадовсь се: седеень кецневтиця те вастовомась-кортамось мольсь, эзь марявояк, малав колмо част.
...Тешкстазь шкантень сась ды учось кузтемпесэ машина-такси. Апак эрязкале, састыне, мезде-бути кортнезь-[355]пеедькшнезь, валгинек кузтемаванть. Венстия кедьсэнь кирдевикс балягань пусмонть вечкевикс сёрмадеем туртов. Сювордынек кеденек, панжия машинань кенкшенть, ды Кузьма Григорьевич чопавтсь «Волганть» потс.
«Вастомазонок, сёрмадей! Содан, «Волганть» тон умок велявтык Пегасокс. Сюконян теть, истямо Лишмень онкстиця!» — ювк ютась прявам, ансяк сыргась таркастонзо «кшнинь айгорось».
Тештеде пешксе се телень чокшнеденть мейле тундось морсесь моронзо малав колоньгеменьксть. Истямо кувака-келей спектакля киненьгак а путови. Зняро иетнень трокс эскельдязь, ойминем вити мелесь: кенярксто ды мазычиде пешксе се вастовомадонть, мондень ды се чокшнэстэнть лия пурнавозтнеде башка, кармить содамо ламодояк ламот.
Истямо мельпулынеяк совси арсема тарказом: каня а сы, а чачи Кузьма лелянь мельга молиця? Каня а чачи монь кондямо цёра (нолдынк чумом аламнеде прянь шнамонть кис), конанень кильдеви истямо вастовома? Чарькодемизь, те аволь шнамо — те седейорма, аёвтавикс ризкс.
...Валдо чикс-ледстнемакс кадовсь Пушкин лемсэ библиотекасо валкирдемам. Те ульнесь, ней тень маряви, 1994-це иень кизна. Паряк, се вастовомась кодаяк сюлмавозель Кузьма Григорьевичень 80-це чачома чинзэ марто, куш сакшнось сон моданть лангс сундерьковсто. Мезеяк а теят, стувтовсь ней тувталось — эряволь шкастонзо кадномс тешкскеть.
Библиотекань 50-60 ломаньс залнэсь пешксе. Сёрмадейть, поэтт, студентт, журналистт, библиотекань важодицят. .. Микрофононть икелев лиси вейке, омбоце, колмоце... Сась кирдам моньгак. «Сюкпря, Инешкипаз!» — меринь эськам ды талнозь лисинь икелев... Ванстовсь, эзизе максо прянзо иетненень мелесь, конань ёвтакшныя кизэнь се чистэнть трибуна экшстэ: «Кода ине Пушкин эсь талантсонзо, эсь стихсэнзэ-поэмасонзо, эсь «Дубровскийсэнзэ» казекшнизе рузонь раськентень рузонь [356] келенть, истя Кузьма Григорьевич одкстомтызе, седеяк мазылгавтызе эрзянь келенть ды казизе сонзэ эрзятненень».
...Теке исяк ульнесь: Ишутонь Миколь, «Чилисема» журналонь прявтредакторось, Кузьма Григорьевич, Бочкин Петряй, сон важодсь сестэ «Чилисемасо», ды мон пачкодинек Вирь Тавла велев чувтосто керсицянь школасо тонавтниця эйкакштнэнень инжекс.
Ёвтнинек эрзянь эйкакшонь журналдонть, эйзэнзэ сёрмалицятнеде. Ламо превей, мазый валт ды седеяк превей мельть ёвтась сэтьме, кунсоломо кармавтыця вайгельсэ Кузьма Григорьевич. Ёвтнесь сёрмадозь книгадонзо, мезе лангсо важоди-нежеди ней ды кодат мельть кирди превсэнзэ икелепелев. Пакшатне кургонь автезь кунсолость, кода кортыть эрзятне. Эсест пельде керсиця цёрынетне невтнизь, кие мезе лакси-керси. Ильтямсто казсть тенек вастовомадонть ледстнемакс эсь кедьсэст-превсэст теезь някинеть-мезть.
Школадо мейле совинек инжекс Бочкин Петряень аванстэнь, Лиза бабанень. Цёрань стувор... Кодамо ды мезестэ ашти, содави. Мезть путнесь икеленек, мейсэ каванякшнымизь Лиза баба, вием кирдемс мельсэнь эзь сато. А вана панготне... Сынст танстенть а коцькерясак улемстэть ды кельпрястот зярдояк! Калгодот, сусксыть — сёрк-сёрк мерить, секень вант, келеть нильсак! Валдо-ожот, парцуност — теке салтомстост лепштязьгак арасельть. А чинест, чинест! Судоварят куцти. Кузьма Григорьевич никсти — кунсолы, никсти — кунсолы, мейле совавтсы палнэнть кургос. «Да-а...» — таргакшнось вейке талай никсемадонть мейле.
Умок те ульнесь, маряви — ансяк.
...Печатыть сёрмадовксом республикань газетатне, журналтнэ, альманахтне, монсь яла кавтолдан, яла тотнан: паряк, весе те шкань ёмавтнема, паряк, конёвтнень велькссэ превень яжамотне киненьгак а эрявитькак? Монь-аволь те тевесь? Кинень пшкадемс? Теке сукст карыть седейсэнь неть арсематне.
«Вай, мекс а пшкадемс Кузьма Григорьевичнэнь? — апак учо кивчкадсь арсемась. — Эри Светотехникасо, [357] эйстэнь аволь васоло. Мекс а совамс? Каня а яви тень пельчасошка? Уш кие-кие, сон лезды: эли тенсесынзе потстон майсевтиця мельтнень, эли мекевланг — совавты эйзэнь кемема. Ансяк вана кода-бути а ён, истямо содавикс ломань, мон самосон кандан тензэ мелявкст...»
Лисемадо икеле гайневтинь. Телефононь почкостонть каятотсь вейке: «Сак!».
Мезе эно, икелев?!
...Кудосонть учицям ськамонзоль.
— Совак, совак, — ансяк панжовсь кенкшесь, мария кудазоронть чевте вайгелензэ.
Каршон аштесь аволь сэрей, аламнеде мендявозь рунго, уш талай аволь од, сэнь сельме ломань.
— Шумбрат, Кузьма Григорьевич, — меринь совамсто.
— Адя кайсек, — невтизе ужосо тулонть ды лездась понгавтомс шапкам-мезем.
Юксинь котам, азорось тердимим важодема нупалезэнзэ.
— Вана тесэ монь мастором. Тесэ котьман. Неть стенатнень-книгатнень ютксо ютавтан чим-вем. Вана истя, инже!
Васняяк сельмезэнь каятотсь столесь-стуворось, лангсонзо сёрмадозь ды ванькс конёвонь сэрей кувтатне. Ванстась эйсэст, сонсь мезде-бути арсесь, печатамонь машинкась. Сындест мейле вановтом кепедия стенатнень ёжова аравтнезь энциклопедиядо ды лия книгадо пешксе лавсятнень лангс. Ютксост, вановтом вакска эзь юта, Брокгаузгак.
«Вана тесэ, те аволь покщ нупальсэнть, одс чачсь, кассь ды сыргась тюреме-аштеме Эрзянь Масторонть кис ине Пургаз, тесэ, неть стенатнень ютксо, одс вельмесь кезэрень пингень кортамо лувось, эрзянь койтне-кирдатне, моротне...» — арсезевинь, перькам книгатнень ваннозь,
Озамс тень Кузьма атя эзь мере. Тердимим омбоце нупальс, озязонь пизэшка кухняс.
— Тесэ ули седе ён калякамс. Истя? Озак, Вана, вана тезэнь, — яла якась мельгам; пондакш шержей муюконзо алдо шкань-шкань кирвазекшнесь мизолкс.
— Сюк-сюк, Кузьма Григорьевич.
— Мезеяк а эряви, иля мелявто, — ёвтыя мелем.
— Э-э-э, эрзят истя а тейнить, — кардымим ды эскельдясь кельменькаенть ваксс, панжизе ды таргась колмо-литрань банка салтозь капстат. Пенчсэ зяро-бути каясь ваканс, човоринзе чиньжарамонь ойне марто. Банканть путызе тарказонзо. Керсесь кши. Розень.
— Зяро мелявкст теть теинь, Кузьма леляй, — меринь чумонь марязь.
— Истят валт, цёра, иля правтне! — мерсь, марявсь тень, мик аламнеде казямо вайгельсэ, сонсь теке басом одс панжизе кельмень «паргонть». — Сонтемензэ, пелян, кортамо а лиси, — пеедькшнезь ёвтынзе валонзо ды тоцк путсь икеленек ашо сулика. Таргась цяркат. Озась каршом. Пурдызе ашонть прянзо ды буль-буль пештинзе цяркатнень.
Глянкадинек, пилинек кургопотмонок палыця ведьсэнть.
А уш капстатне, капстатне цяркадонть мейле!.. Цятор-цятор... Ярсат ярсавлить!
— Аволь тонсь салтыть? — пшкадинь, эзинь кирдеве. — Вельть тантейть! Истямодо зярдояк эзинь ярсне.
— Нись, нись тень коряс дока. Ансяк арась кудосо...
— Тантейть. Сюкпря тензэ пельдень ёвтак... Мон вана мезть якан-пакан, Кузьма Григорьевич...
Сон кепединзе сельмечирькензэ, учозь варштась сельмезэнь.
— Конёв ламо ютавтан. Вана мейсэ тевесь. Теке чеерь порнян эйсэнзэ. Сёрмадан, сёрмадан... Меельце шкастонть натой ёвтнеминес пачкодинь. Сёрмадан — монсь... кавтолдан. Паряк, те тевесь дух аволь моньгак? Паряк, весе тень ёртома превстэнь? Шукшпрятне сизесть учозь...
Ансяк прядынь кавтолдомам-пеняцямом, Абрамов «ёртома» валсонть лакшт тень — пря ланга.
— Ёртык! — эль а серьгедезь мерсь. Чатьмонезевсь. Секунда-омбоце, ды поладынзе валонзо седе сэтьместэ: — Ёртык... ёртовиндеряй.
— Варчик, — мельгам ёвтызе сыре сёрмадеесь. — Лия теть, цёра, мезеяк а ёвтан. Ме-зе-як.
— Эряви, кода кортыть, онкстамс, — прынь превень максыцям марто ве мельс.
— Мезе, инже, омбонькирда? — сурсо невтсь пешксе цяркатнень лангс стуворонь азорось.
— Арась, — наравтыя прям ды айгия кедьгенть.
— Я! Те кода истя?
— Арась-арась, Кузьма Григорьевич, саты. Тевть...
Зярс-бути кортнинек теде-тонадо. Ледстнинек университетэнь студенттнэнь ды тонавтыцятнень марто биологиянь факультетсэ вастовомадонтькак, ловныцянь се астувтовикс чокшнэдентъкак. Тень эйсэ прядовськак прев мельга якамом.
Сынь кудов. Кайсинь ды сеске, теке мерят оргоди превсэнь кирдевиксэсь, ютынь конёвдо пешксе стуворонть экшс. Весемень стувтозь, автордыя ручканть ды кундынь сёрмадомо кудов самсто неезь лекшсэ, теке ашо пацясо, копачазь килейденть ёвтнемине.
«Арась, Кузьма леляй, «ёртомс» эзь лисе! Эзь ёртово потстом се, мезенть тень максокшнызь чачомстом авам-тетям ды Инешкипазось». Мекевланг, лекшсэ копачазь телень се чиденть, се астувтовикс вастовомадонть мейле седе кемезь эскельдякшнынь, кадык уш аволь од ломанькс, сёрмадомань эрькентень.
...Ансяк васень вастовомам Кузьма Григорьевич марто ульнесь ёвтнезтнеде ламоксть-ламоксть седе икеле.
1946-це ие. Аволь умок энгамсь войнась. Сонзэ апаронзо поладынзе допрок пиземевтеме, коськедеяк коське кизэсь. Аламольть ниле вачо иетне, сась ветецесь.
Монень кемгавтово. Кепе, раужо ведьс-артовксос навсезь коцтонь понкскесэ чийниця цёрабай. Авань таркас колхозонь конторасо ловован тенсицякс-урядыцякс ды теке марто тей-тов кучневицякс. Лездан пурнамс тензэ зярыя трудочить. Сынст эйсэ сеть шкатнестэ ярмаконь таркас пандсть «питне» важодемань кис. Важодинь...
[360] Кизэнь гай пси чи. Марявсь, озязтнэяк эйстэнзэ кекшнесть, а маряви чоледемаст. Чикуншка. Ветямкудосонть-правлениясонть ськамом. Апак учо панжовсь кенкшесь ды совасть кавто цёрат. Вейкесь эйстэст содавикс — Павол Ваня. Сон минек велень, Орданьбуень, Калинин лемсэ колхозонь прявт. Фронтто мейле ве пильгезэ, теке виде мандо, эзь менчеве. Моли, мерят, кикс бажи кадомс мельганзо. Сельмензэ дюм раужот, истят пшти пе муюконзояк.
Паро, раужо сельмесь Орданьбуень. Кие омбоцесь? Неян сонзэ васенцеде. Сэрей. Паряк, эсень коряс марявсь тень истямокс? Монсь озязлевксэшкалинь. Асодавиксэнть черензэ аламнеде менчевезь, чоподат ды тустот. Редия сеньгак: ломанесь аволь капшиця-эрязкалиця. Лангсонзо ашо, понкс потмова саевть панар. Иензэ колоньгеменьшка.
Прявтось тень, ансяк кенерсть совамо:
— Азё ветик Кузьма Григорьевичень Зёконь Олданень.
Зёконь эрить конторанть вакссо, сядошка метраткак ютксост арасть.
Прявтонть кармавтоманзо топавтыя, Зёконь кудост невтия, инженть тенст ветия.
Омбоце чинь валскестэнть карминь содамо: минек колхозс сась мезде-бути сёрмадомо та-кодамо газетасто корреспондент — Абрамов Кузьма Григорьевич.
Вана истя, нурькинестэ ёвтазь, васенцеде вастовкшнынь эрзянь те ине сёрмадеенть марто, сень марто, кинь гайги лемензэ содасызь ламо масторсо.
Кулось Кузьма Григорьевич Абрамов 2008-це иень умарьковонь 4-це чистэ. Калмазырев ливтемадонзо икеле Мордовия Республикань Культурань Дворецсэ ютавтовсь калмамонь эли, лиякс ёвтазь, ризнэма промкс. Вестибюленть куншкасо цеця-баляга потсо кандолазт. Эйсэст се, кинь пельде уш зярдояк а марят пшкадема вал, кинь турванзо зярдояк а панжовить апак учо вельмиця мизолкстонть. Ушодкс ды пе. Тень эйстэ ковгак а туят. Пурнавсть ламо ломанть. Кортыть, пачтить [361] ризкс валт малавиксэнзэ туртов. Вейкесь эскельди микрофононть икелев, омбоцесь...
Калмамодонзо мейле Мордовиянь университетэнь ярсамкудосо ютавтовсь лемень кундамо кой. Кундсесть Кузьма Григорьевичень лемензэ ламот: сёрмадей ялганзо, республикань прявттнэ, университетэнь тонавтыцятне, журналисттнэ... Кирдсть вал кулыцянть чачома велестэ, Наймансто, сазетнеяк. Весе састь ве мельс — ванстомс К.Г. Абрамовонь лемензэ пингеде-пингес. Кие-бути ёвтась мель путомс тензэ ледстнемань кеврунго.
Промксонь ветицятне макссть шка пшкадемс сыцятненень, ёвтамс зярыя валт моненьгак. Сынь истятольть: «Мелесь — путомс Сарансо кеврунго — паро, мик пек паро. Ансяк свал кирдема мельсэ — сехте питней, сехте сэрей кеврунгокс-ледстнемакс Кузьма Григорьевичнэнь карми улеме эрзянь келесь! Аволь бетонсо эли бронзасо поладовозо ине сёрмадеенть эрямозо, поладовозо кельсэнть, се кельсэнть, конасо кортась ды конань совавтызе книгазонзо».
Кодамо ёжозо те ледстнемапеленть течи, содасы эрьва эрзясь, кинь седейсэ ванстовсь куш пельпенчке эрзянь верь.
«Сятко», 2015, 9№