Пожӧм
Вой тӧлыс шутьлялӧ.
Пармаыс шувгӧ;
Эжва берд кыр йылын
Лёкмӧма — увгӧ.
Нюжӧдлас, горӧдлас
Быдсяма ногсӧ, —
Тыдалӧ, пальӧдӧ
Кодлыськӧ шогсӧ.
Муртса на тӧдчыштӧ
Асылын кыа.
Ывлаыс олӧ нин.
Эжваыс гыа.
* * *
Кыркӧтш дор нӧрысын
Сулаліс пожӧм,
Тӧлыскӧд вензис пыр —
Тулыс и гожӧм.
Косясис-вермасис,
Лапъяснас шувгис,
Эз сетчыв некодлы
Тышкасиг-увгиг.
Вӧр вомӧн чуксасис,
Югыдлань корис.
Вой тӧлыс кывъяссӧ
Быд ногӧн сорис...
Ӧтарас сьӧд парма:
Помтӧм сэн вӧрыс.
Мӧдарас югыд нин
Эжва дор нӧрыс.
Эз сетчыв вой тӧвлы,
Чардбилы, гымлы,
Тӧв нырлы, пургалы,
Кӧдзыдлы, лымлы.
Кутіс пыр ӧтмоза
Юрсӧ зэв вылын.
Матысса вӧр пуыс
Шензис сы вылӧ.
* * *
Эжвалӧн визулыс
Яг бердті швучкӧ,
Пожӧм весьт кыркӧтшӧ
Зэв яра кучкӧ.
Пожӧмлысь подувсӧ
Буждӧдіс быдӧн,
Гыяскӧд ӧтвылысь
Йирисны пыдӧдз.
Эжваыс пожъяліс
Ыджыд ва дырйи
Тыдовтчӧм вужъяссӧ
Песлалігтырйи.
Видзӧдны кок улас
Пожӧм эз кӧсйы:
Нюръяслы, пармалы
Югыд век вӧзйис.
Визулыс гыыскӧд
Швачкӧ кыр бердӧ,
Ызгигтыр усьласьӧ,
Ён вынсӧ бертӧ.
Довкнитчис пожӧмыд...
Вужйыс тшӧтш вӧрис...
Кыркӧтшсянь... Эжваӧ...
Шувгигтыр пӧри...
* * *
Пармаыс ланьтӧма
Коми му кузя,
Нинӧмсӧ оз тӧд дзик:
Чорыда узьӧ.
Сӧмын тай вӧр пуыс
Крут кыркӧтш дорын
Казьтылӧ пожӧмлысь
Югыдлань корӧм.
Кыаыс петӧ нин...
Пармаыс ловзяс.
Пожӧмлӧн шувгӧмыс
Сылы тшӧтш ковзяс.
Вой тӧлыс шутьлялӧ,
Пармаыс шувгӧ;
Эжва дор кыркӧтшыс
Лёкмӧма — увгӧ.
Нюжӧдлас, горӧдлас
Быдсяма ногсӧ,
Тыдалӧ, пальӧдӧ
Кодлыськӧ шогсӧ.
Енэжын паськыда
Петӧма кыа,
Ывлаыс олӧ нин.
Эжваыс гыа.
 
|
This work is in the public domain in the United States because it was first published outside the United States prior to January 1, 1929. Other jurisdictions have other rules. Also note that this work may not be in the public domain in the 9th Circuit if it was published after July 1, 1909, unless the author is known to have died in 1953 or earlier (more than 70 years ago).[1]
This work might not be in the public domain outside the United States and should not be transferred to a Wikisource language subdomain (or as a file it should not be migrated to the Wikimedia Commons) that excludes pre-1929 works copyrighted at home. Данная работа, впервые изданная до 1929 года, находится в общественном достоянии по законодательству США, и может быть опубликована здесь, в мультиязычной Викитеке. Но эта работа не может быть опубликована в национальной Викитеке, которая должна подчиняться законодательству России, т. к. работы этого автора (за исключением изданных до 7 ноября 1917 года) пока не вышли в общественное достояние в России. Этот автор умер в 1981 году, соответственно эта работа выйдет в России в общественное достояние в 2052 году.
The author died in 1981, so this work is also in the public domain in countries and areas (outside Russia) where the copyright term is the author's life plus 30 years or less. |