Пици-палакст/Лавшось пачк калады

From Wikisource
Jump to navigation Jump to search
[ 100 ]
ЛАВШОСЬ ПАЧК КАЛАДЫ


Ч
АЛГАК МОДАНТЬ ланкс кеместэ, кундак тевентень кеместэ — и теик кеместэ, — илязо чирькаяк. Кармат лавшосто эрямо — пачк кармат слега ды мукорька ало майсеме.

Истя мурнесь вейке плотник омбоце плотник ялганзо, ревень кардонь сроямсто. Вейкесь ульнесь вере. Пурнызе кардо прянть, слегатнень вачкинзе картань кудыне лацо, слега петнень мукорькатне ланкс эзинзэ сюлмсе и сонсь куйсь самай тёкшкентень.

— Сюлмсимальть теть слега петнень, — сеери ялгась. — Калады кардо прясь, чавуват...

— Мон — сезьган! Таратке прясояк удан!

Ансяк кенерсь истя мереме, кардо прясь калаць, плотникесь — чаразь-велязь мартонзо.

Умонь те тевесь, ютась ташто пингесь, сась одось, но ташто примертнэ колияк, нать, а кулыть.

Июлень меельсь читнестэ Николаевка велесэ (Томск. округ) лиссь пека мазы тев. Кавто ломать: Бучкин Гава ды „Сисемь оймень“ Аля глохтясть винадо и мольсть веле сёлц экшелеме. Гава кармась прянь шнамо:

— Мон, Аляк, сазан! Вант кода понкснэк-панарнэк карман чопавтнеме...

— Иля, Гава! — энялды Аля, — ирецтат, мусак бозат...

Но Гаванень — сёлтось кумажава. Косо вал — сесэ тев. Одижанек-мезьнек совась сёлтонтень. Чопавць весть, омбоцеде, колмоцеде. Нилецеде чопавць и секе неевтезэ Гавань. Тусь Гава, кода мерить велень аватне, „бисёртнэнень“.

Ансяк кавто чиде мейле муизь Гавань сёлтстонть. Ёмась ломанесь амезень кис — аволь берянь ульнеськак: велень роботник, превей ды толковой.

[ 101 ]

* * *

— Мон, келя, политической око. Полудневской волостесь эри ансяк монь вийсэ!

Валось, мерить яла, аволь озяс: лиси куркстонть — мекей а кундасак, и бути эщо сонзэ кияк сёрмацы конёв ланкс, сестэ уш седеяк паро тевесь. Полудневской волостень эрзятне вечксызь самагононть. Вечкима тевенть теимазояк вадря: ну — и панить эрзятне самагононть.

Таго берянь тев — спокойс а кацызь: пек свисти эйсэст милициясь, косто-косто „боруцякшны“ ВИК-еськак. Самай вана те тевсэнть и невтизе эсь виензэ „политической окось“.

Вейке ломань ансяк кенерсь апаратонзо насадямо — милициясь прок сесэ ульнесь: допрос, протокол. Беда! Ломанесь ношкстась „политической оконтень“. Тона кувать апак дума сёрмады милиционерэнтень записка:

„Виталий Захарович! Скрой ты это дело — и концы в воду, так чтобы никто ни гу-гу! Все-то ведь мы не без греха и поражены темнотой.“

К. И. Егоров.

Вана кие, нать, „политической окось“ К. И. Егоров! Ды минь сонзэ умок уш содысынек. Сондензэ В.-Толкансо мерить „пулыне“. Ульнесь председателекс ВИК-сэ, волкомсо бюронь членкс. Кедезэ пек уш шождыне — ансяк вадишти сюпавтнэнь ёнов.

К. Егоровонь тевдензэ соды волкомось, соды укомоськак. Зярдо ансяк кундасызь сонзэ сявдикстэ?.. Эряволь седе курок.

* * *

Народось свецэнть — певтеме. Сонзэ думонзо-валонзо а содавить, а марявить. Сеецтэ эрьси истя: ломатне эрить — вейкесь масторонь ве крайсэ, омбоцесь — омбоце крайсэ. Сынь колияк вейкест-вейкест эсть нее, вейкедест-вейкедест а содытькак, но тевест-валост яхудить ве ёнов.

[ 102 ] Бучкинтнэде ды Егоровтнэде свецэнть пек ламо. Те тундонь видима лангось ульнесь покш политической кампания. Анокстасть эйзэнзэ загодь ковдо-кавтодо икеле. Покш тевесь, чис-кавтос а прядови.

Веенстнэ анокстасть ломанькс, омбонстнэ — кежть пантлесть. Павловка велень (Кузн. округ) председателесь Вдовин „компаниянзо“ марто (Русаев ды Зверков) истямо план „выработали“, „раз велень народось пачк жалуви лангозонок — минь сынст тонавцынек“. И тонавтызь: видимантень анокстасть ансяк конёв ланксо. Кода сась видима лангось — Павловкась мезеяк эзь получа: а видьметь, а машинат, а ссуда. Сельсоветэсь ковгак меньгак заявкат эзь максне.

Павловкань эрицятне улост уцордызь ды секе ланкс кадовсть, видевтест мелень коряс аламолгаць 30 проценттэ. Истя Вдовинэнь „компаниясь“ пантлизе кежензэ.

Кинь тесэ сех икеле чумондомс? Кинь кундамс прякетьте. Сех икеле эряви парынестэ рестедемс Ленинской райисполкомонть. Эщо апрельстэ Павловкань эрицятне, вансызь сельсоветэсь кодаяк а йаноксты видема лангонтень, макссть лангозонзо заявления округов. Округось те жалобанть кучизе райисполкомов.

Месть тейсь РИК-есь? Сон те жалобанть получизе ды путызе столь поц. Ней Вдовинэнь компаниянзо марто панизь вельсоветстэ. Азё ней пезнавтызь пееть сынст бокас, 30% модась яла теке ашти апак виде. Вдовин тусь тосто Ленрудникев и ялганстэнь пря шны: „мон, келя, пулост алга ведь валынь! мон, келя партиецан, кияк тень мезеяк а теи.“

* * *

Ламо раужо таракатнеде. Прок овтонь панк. Мезе теят, келя, секень неят. Куть кикс ульть: партиец, меньгак покш начальства, эли простой велень ломань, теить преступления — отвечак кисэнзэ тонсь. Велень партиецнэ ды советской роботникне жалувить косто-косто самокритиканть ланкс: „эрямонокак, келя, эль машты, узавтызь лангозонок народонть.“

Робутадо парсте — народоськак карми парсте кортамо эйстэнк. Карматадо эсь прянть ды тевенть ветямо [ 103 ]лавшосто, кеместэ апак чалга, — пачк кармить слегат ды мукорькат лангозонк прамо. Слеганть толкозо содазь кодамо: сон прамсто а кочкси пря-пильк, эшктянзат кува понги и секень вант мода марто човорятанзат.

Новосибирск-ош, 1928 ие.