Пици-палакст/Вете иетне кадовсть удалов

From Wikisource
Jump to navigation Jump to search
Пици-палакст  (1930)  by Дуняшин, Алексей Васильевич
Вете иетне кадовсть удалов
Пици-палакст. Ёвтнимат ды фельетонт. СССР-энь Наротнэнь Центрань Издательствась. Москов, 1930.
[ 11 ]
ВЕТЕ ИЕТНЕ КАДОВСТЬ УДАЛОВ.

„Пици-палакснэ” — васень кинигам, кона лиссь светс ниле иень робутадо мейле. Те кинигантень пурнынь ютась чинь сёрмадовксон. Не сёрмадовкснэнь ламо асатыксэст. Конань-конань эйсэ овси аламо художественой элементнэде. Мейсь эно максынь сынст печатамс?

Эрьва сёрмадыцянть (писателенть) эсинзэ кизэ. Кода эйкакшось дубушкинь тейнемеде мейле карми тонавтнеме кортамо, истя сёрмадыцяськак тонавты эсь келензэ ды эсь услоензэ художественой вещань тееме.

Мон эсь прям писателькс ловоманзо пек а капшан. Прянек-пильгенек литературной робутантень эщо эзинь туе. Мон — васняяк журналистан. Монь сёрмадовксон — очеркт, фельетонт ды публицистэнь заметкат. Монь сёрмадовксон молить се кияванть, конадо мерить „психологической реализма”.

Кодамо те кись? Те кись вана кодамо. Революциянь васень иетнестэ минек литературанок ульнесь — „агитка”. Те литературасонть почти арасель жив ломань. Те литературасонть ламоль шалтось, ламоль пижнемась, ламоль пакштортось. Ансяк виде-паронь ломань а неявиль те литературасонть. Лиякс меремс, те литературасонть пек аламоль художества, секс сон а педильгак — а пряс, а седейс.

Кода прядовсь гражданской войнась, кода ютынек вачо иетнень ведест-толост пачк, кода карминек стявтомо пильге ланкс розорязь хозяйстванок, сестэ уш кармась ломань понас панжомо минек художественой литератураськак. Сестэ ансяк кармась шачомо пролетариатонть виде-паронь художественой литературазо. Вейке-вейке мельга кармасть лисеме „Чапаев” (Фурмановонь), „Неделя” (Либединскоень), „Цемент” (Гладковонь), „Разгром” (Фадеевень), „Барсуки” (Леоновонь) ды ламо лият. Весе сынь сёрмадозь психологической [ 12 ]реализмань методсо. Литературантень появас вире-паронь жив ломань, кона кармась эрямо аволь „приказонь коряс”. Пролетариатонь од писательне кармасть саеме ташто классикнэнь сёрмадовкссто весе сынст художественой методост и путомо эйзэнзэ од, революциянь содержания. Эрьва писателесь тонавтнесь и тонавтни сонензэ вечкевикс классикенть сёрмадовкс ланксо (Леонов — Достоевскоень; Гладков — Горькоень; Фадеев — Толстоень).

Мон касынь-тонавтнинь рузонь литература ланксо. Колмо классикт — Горькой, Достоевской ды Салтыков-Щедрин аравтымизь монь сёрмадыцянь кинть ланкс. Не класикнэнь сёрмадовксост мон ловнынь вейкень-пес.

Вете иень робутадо мейле шачсть „Пици-палакснэ”. Вете иетне кадовсть удалов. Ютась вете иетне макссть тень опыт тонавнимасо, партиянь робутасо — тонавтымизь литературань тевентеньгак. Ней, зярдо СССР-сэ уставась социализмань сроямось, зярдо партиясь аравты эрьва партиецэнть икелей истят покш задачат, ней самай идеологиянь фронтось — пек эрявикс, пек покш фронт. Тень а эряви стувтомс весенень, конат арьсить робутамо литературань фронтсонть.

Вете иетне кадовсть удалов. Месть карман тейнеме икеле пелев? Карман кастамо эрзянь литературанть фронтонзо. Сёрмадынь, сёрмадан и карман сёрмадомо „Кирво тол” романонть, конань эйсэ ёвтнеса эрзянь эрямонть колоньгемень иес. Сёрмадынь, сёрмадан и карман сёрмадомо фельетонт, журналистэнь заметкат ды очеркт, конатнесэ карман чавомо кендялтнэнь, рудазонть, чекеренть — весе сень, кона меши социализмань сроямонтень.

Алек Дуняшин.


P. S. Покш сюк пря кучан сеть ялгатненень, конат эсь мелест-валост те киниганть кувалт кучсызь монень истямо адрестка: Москва, Никольская 10. Мордовская секция ЦИЗ-а. Пек карман учомо ялгань сёвнумкат-мурнимкат, конатнень коряс карман витнемс весе асатыксэнь.

А. Д.