Пирдан (Усков)

Пирдан Автор: Пётр Михайлович Усков

Ньыль вал мынам пиосы, ньыль ик луо кенъёсы. Курам гуртысь одӥгез, Люкамысь мукетыз, куинетӥез Октэмысь, ньылетӥез Калтэмысь. Ньылезлэн ик вал пирданъёссы, сьӧразы ваем кунянъёссы.

Узыръёс пирдан сёто чуньызэс, начаръёсыз — парсьпизэс. Котькыӵе пудо выжыез кузьмало, йылэм-пушъемзэс возьмало. Пирданъёссэс ке учконо, гидэ пыртыны ик юрдоно: искал тэй кадь парсьпизы, кӧшкемано кадь чуньызы, сиктанэн кесяно кадь быжъёссы курмемын, коӵолы кесяно кадь гонъёссы пурӟемын. Коньы тыр пирданзы, манет тыр роскодзы. Пирдан вайизы шуыса юмшало, 2-3 нунал ӵоже кунояло.

Вожмасько кенъёсы пирданъёссэс сюдыны, бушало кеносъёсы гажанъёссэс вордыны. Огзылэсь огзы лушкемен сюдо пирданъёссэс ческытгем. Кеносъёсын вань дыръя чидаськод, пудоез ческытгес сюдӥськод. Нош бушаны ке кутско, ачим кутӥсько мушко. Тунгонасько кеносме, алӥсько кенъёсме. Собере кенъёсы но пиосы керето куспазы, возьдаськытэк, урод кылъёсыз вунэтытэк.

— Тынад пирданэд мынэсьтымзэ лека, кунянэд парсьпиме лёга… Чатран люкет!.. Шай корос!.. Кенер пыкет!.. Шайтан пыртос!..

Куное ке мыноно, нош луэ куаретоно. Пичи кенлы бадӟымез уз сёты тӧри кобламес. Мынам, шуэ со, пирданэ, ачим мыно сюанэ. Озь ик люко йӧлзэс, кӧйзэс но вӧйзэс. Сӥзьыл ке вуэ, коть тэтчы вуэ. Пересь йырыным чакласько, пудоме, сиёнме лыдъясько. Уг тырмы сюдонэ, кулэстоно пудоме. Одӥгзэ малпасько вандыны, мукетсэ — вузаны.

Пурӟизы кенъёсы, курам-люкамъёсы. Ньыль кузя артэ султыса, сыло монэным даллашыса.

— Мынэсьтым гинэ адӟиськод, пичи кендэ жаляськод… Сисьмем губи!.. Уг сёты пирдан выжыме быдтыны, ас вадьсам кулэ сое вордыны… Зынмем куды!..

— Уд валаське валэктэмез, пудо сиёнлы но ёрмемез. Маин пудодэс вордоды, кулӥзы ке, ма кароды? Мон уг луы янгыш табере, тулыспал пирданъёсты вуизы ке гид беры. Озьы, ӧжыт лекъяськыса, котырысьтызы палэнски сяласькыса.

Пумен улэмъя, тулыс матэ вуэмъя, пудоосмы куасьмизы, искалъёсмы пыдтэммизы. Гозыен ӝутъяськом, «кизили усиз» шуиськом. Собере — одӥгез вуиз гид беры. Мукетъёсыз но даськемын. Мар карыны — кенъёсы ёрмемын. Нош кутскизы котырам:

— Тон пирданъёсме каргам. Йыркурдэ вормымтэ, юриськыны вунэтымтэ. Сӥль потэ вал сиемед, ӧз сёты сиыны кенэд. Табере ӵокса ньылондэ, си кулэм пирданме.

Секыт аръёс ортчизы, кулэм пирданъёс вунӥзы. Гуртамы лыктӥз агроном, вераськиз со валамон:

— Пудоды урод, соосын бырод. Таза ош басьтоно, уродъёссэ быдтоно. Искалъёсыз сюдоно валаса, сиёнзэс сётоно мертаса…

Туж кема валэктӥз, пудо вордыны дышетӥз. Мон пукисько огнам, кенъёсме вайисько тодам.

— Мынам бадӟым ини йырам плеше, — шуисько, — агроном эше! Быдтысал мон урод ошъёсме, уд тодӥськы мынэсьтым кенъёсме… Уз сётэ пирданзэс быдтыны, пурт улэ выдтыны. Урод ке но, шуозы, асьмелэн, сётэм выжыез атайлэн. Пудо тазатонлэсь пайдазэ валаськом, семья пушкын керетонлэсь нош кышкаськом. Ма карод таӵе ужен, урод ошъёсмес кытын возёд гужем?

— Ошъёстэс сузяно, собере пудо пӧлы ик лэзёно. Тазаоссэ гинэ кельтыса, соосыз умойгес утялтыса, пайдазэ асьтэос адӟоды, пудодэс тазамытоды.

Котьмар мед шуоз агроном, пирдан ваён уж каргамон. Мон озьы чакласько, тӥледлы но верасько: ӧй адӟы пайдазэ пирданлэсь, изъянэз тросгес йырызлэсь. Толбыт сое сюдӥськод, собере гид беры но поттӥськод.