Ош пеледӹш – цӓш

From Wikisource
Jump to navigation Jump to search

Савельева Евгения Константиновна

Ош пеледӹш – цӓш (Миниатюра)

Мӹндӹрнӹ, кышты юр юрмы паштек шӹре шӹргӹ лошты шукы веремӓ рок лывыргым вӹлнӹжӹ урден, дӓ кышты изи пўшӓнгӹвлӓ кўкшӹ пӹлгомыш вуйышты доно кырменӹт, иктӓт нигынамат уждымы вӓр улы ылын. Мӹньӹм тӹшкӹ икгӓнӓ шӹргӹхоза канден шагалта.

Мардеж тӹштӹ когон вӹцкӹжӹн ӹфӹлӓлеш,тӹньӹмӓт вуйта,кӓпетӹм куштылтен, пӹлгомыш сӓртен кузен кердеш. Кўшнӹ, вуйта тӓнгвлӓ, тӹлӓт пурым шанен, ош мамык гань пӹлвлӓ чонгештӓт. Попен ак моштеп гӹнят, машанет, тӹлӓт шӓлӓштӹм колтат. Нӹнӹ ганьок тырын дӓ воляшты ӹлӓш ўжӹт. «Мӹнят тӓ сагада чонгештӹнем дӓ ямнем пӹлгомышты», - манам нӹнӹлӓн.

Мўлӓндӹжӹ вуйта йори цилӓ пеледӹшӓн кымдемвлӓжӹм вӹдвӓрӓлӓ ӓйӓлтен пиштен, пӹсӹнрӓк анзыкыла кеӓш покта. Каремвлӓм шотаен, шӹргӹвлӓм эртен, мӹндӹркӹ шоаш лиэш, поктен тенге тӹнь гӹцет со шӹлӓш цацышы цӓшӹм. Дӓ ик гӓнӓ поктен шоаш дӓ келесӓш: тевеш кышты ылынат, малын тинӓр веремӓ сӹнзӓэшем кайделат? Цӓшӹжӹ изи ош пеледӹш ылеш, вероника пеледӹш ганьы, но эче тыгыдырак. Тӹдӹм трўк ужын колташ ак ли. Ял лӹвалнӹ кынамжы пӓлӹдеок ташкалтеш. Тӹшленрӓк анжалат: лачокат, тидӹ цӓш ылеш, кыдым трўк цаклаш ак ли. Вет тӹдӹ цилӓлӓнок ак кайзы. Ужмыкыжы – цӓш.