Ош лымжы

From Wikisource
Jump to navigation Jump to search

Савельева Евгения Константиновна

ОШ ЛЫМЖЫ

Ош лымжы мадеш, ош лымжы ямеш,
кынам ниӓлтет - парняштет вӹд.
Ош лымжы вазеш дӓ корнет каеш
техень мӹндӹркӹ, анжал йӹвӹрт.

Косир кугивлӓ, косир ўэвлӓ,
калявач вуйта – пиш кужы укш,
тӓ йӹрдӓ кого лыман коэвлӓм,
орланен, мардеж арален пуш.

Машана тӹдӹ – тӓ амаледӓ,
техень мадмашым адаат уж.
Но каеш веле – тӓ шӹп шалгедӓ,
вӹршӓрдӓ шиэш, тӓрвӓнӓ укш.

Омынеш каеш яргата шошым,
мыралтат кеквлӓ, веселӓ йӓнг,
кынам куштылгын мондалтеш тошты,
кенвацшы ўлӹк ӹлӹштӓш гань.

Эчеӓт кечӹ элтӓлӓ шокшын,
ниӓлтӓ пурын пышкыды пӹл,
нӓнгеӓт ивлӓ молнамшы тошнам,
у ӹлӹмӓш доно ӹлянӓ кӹл.