Ош кок

by Лыткин Георгий Степанович

Ош кок  (1889)  by Лыткин Георгий Степанович

Гижан кад: 1889, Йӧзӧдан во: 1889. Ӧшмӧс: Зырянский край при епископах пермских и зырянский язык : пособие при изучении зырянами русского языка / сост. Г. С. Лыткин. - Санктпетербург, 1889.

Верӧсъяс кытшовтӧдісны ошкӧс; ошкӧс вины эз вины, сӧмын сылысь коксӧ черӧн кералісны. Ош куим кокаӧн пышйис. Коньӧр пӧрысь энь корис ошлысь коксӧ, сы вывсянь си-гӧнсӧ шырис, кучиксӧ кулис. Яйсӧ пуктіс пусьыны, кучиксӧ вольсаліс ас улас, пуксис печкыны ошлысь си-гӧнсӧ. Печкис, печкис, печкысис вой шӧрӧдз, кыдз кылӧ, мый ӧшинь сайын кодкӧ равзӧ, дзуркъялӧ. Пӧрысь энь видзӧдліс ӧшинь пыр, сэсся кельдмис: ош локтӧ пу кок вылын, личкӧдчӧ кыдз бедь вылӧ, локтӧ равзӧ:

Дзурк, дзурк, дзурк!

Нинпу кок вылын,

Кыдз пу бедь вылын,

Муыс ӧні узьӧ,

Ва ӧні узьӧ;

Оланінын быдӧн узьӧ,

Сиктын быдӧн узьӧ;

Сӧмын ӧти энь оз узь.

Менам ку вылын пукалӧ,

Менсьым си-гӧн печкӧ,

Менсьым яй пуӧ.

Пӧрысь энь повзис; сикт помас сійӧ ӧтнас оліс. Мый сылы керны? Ошсянь кыдз пышйыны? Керка пос вылӧ ош кайласьӧ нин, посводзын джекнас восьлалӧ нин. Пӧрысь энь джодж ув восьтіс, би кусӧдіс, пач вылӧ кайис. Ош кималаліс ӧдзӧс, дзирсянь бертыштіс, керка пытшкӧ жугӧдчис, дзурс пемыдын пондіс кималавны, кыдз джодж улӧ инмӧдчис. Пӧрысь энь пач вывсянь тэрыба чеччыштіс, джодж ув ӧдзӧс игналіс, матын олысьяссӧ чукӧстны пышйис. Найӧ воисны, ошкӧс виисны.