Ош вис-висым тые кӱрлын

Степанов Ипатий Степанович

Ош вис-висым тые кӱрлын…
Изи годсек, чевер ӱдыр,
Тые тыште кушкынат.
Пуйто тые, чолга шӱдыр,
Тӱсет дене йолгенат.
Йоктаралын шинчавӱдым
Тые тыште кушкынат…
… Ош вис-висым тые кӱрлын,
Шкетын кодын, мужедат.
Вуйыштетше пöрдӹн тӱрлö,
Шӱлыкаҥын шогылтат.
Йöрата гын, я уке гын? –
Шкетын кодын, мужедат.
Йӱкет тыйын шергылт кайыш,
Ӱдыр-влак ден муренат:
”Кече лекте шöртньö гае,
Той гай лие, волышат.
Мемнан илыш порсын гае”…
Ӱдыр-влак ден муренат.
Тыйын ӱмыр, тыйын илыш
Шулен огыл орлыкеш.
Лачак ойго шоҥ гай шулыш
Волген лекше эр кечеш.
Чыла кызыт тыйын уло –
Шулен огыл орлыкеш.
Тыйын сылне у муретше
Каче шӱмым тарватен.
Тӱрлеман сай тувыретым
Чиэн лектеч шып кастен.
Маке гане чуриетшы
Каче шӱмым тарватен.
Тошто илыш – кодшо ломыж
Мардеж дене шаланен.
Капет тыйын йöршын омыж
Мо шот кызыт сöралген.
Муро, ӱдыр! Ойго йомын,
Мардеж дене шаланен!