Ордйысьӧм сьылӧм

by Ярасов Борис Степанович

Ордйысьӧм сьылӧм  (1929)  by Ярасов Борис Степанович

Гижан кад: 1929, Йӧзӧдан во: 1929. Ӧшмӧс: Ордым. 1929. №8-9.

Октябр
Кыдз озыркӧд
Кось-бисӧ ӧзтіс —
Гӧрд вирӧн ӧзйысис
Озыркӧд кось.
Озыр йӧз
Сӧветӧс
Пӧдтыны кӧсйис,
Пиньясыс
Налӧн сэк
Вӧлі зэв ёсь.
Пикӧ кор озыр
Сӧветсӧ воштіс,
Сӧвет дор
Медводзсӧ
Сувтіс гӧль пи.
Винтовка том киӧ
Яра зэв босьтіс,
Озырӧс лыйлыны
Эз дрӧгнит ки,

Ӧзтісны сьӧлӧм
Пӧсь вира ярӧн.
Том йӧзлӧн сьӧкыдысь
Эбӧс эз быр.
Врагысь эз повны,
Эз мунны бӧрӧ —
Вӧлі кӧть туй вылын
Зэв джуджыд кыр.

Колисны;
Порок тшын,
Лыйсьӧмлӧн шыяс...
Уджалам быдлунъя
Посни сьӧд удж.
Тіянлы висьтала,
Том зонъяс,
нывъяс:
Кутчысьны сьӧд уджӧ
Важ ярӧн куж.

Пыдысянь видзӧдлан:
Нимкодь сэк тэныд,
Олӧм кор кыпалӧ
Лунысь-лун век.
Юала тэнсьыд,
Кыв видза дженьыд:
Пуктін-ӧ овмӧслы
Подувса джек?

Кад вынӧн
Гӧль йӧзӧс
Нильзьӧдӧ вина.
Някалӧ
Овмӧслысь
Кыпалан вын.
Татшӧм лёкторйыслы
Мый вӧчин кинад,
Эн-ӧ тэ кодав,
Тшӧтш
Сы дорӧ сын?
Вайӧ ті сьӧлӧмтӧ
Пӧсь вирӧн ӧзтӧй,
Важ ярӧн ӧддзӧдӧ
Ордйысьны вын.
Садьмӧдӧй ордйысиг
Удждорса йӧртӧ —
Уджаліг эбӧсыд
Эз вӧв мед кын.
Выль уджкӧд
Пемыдлун
Косясьӧ ёна.
Водзмӧстчам —
Пемыдлун медым
оз лям!
Вайӧ ми ставным:
Том нывъяс, зонъяс —
Петкӧдлам дзормӧмлы
Том вын, сюсь сям.
Пармаӧд регыдджык
Рӧдтӧдас трактор,
Регыдджык
Мусинлӧн
Вежсяс сэк бан.
Удж вылын перыда
Ордйӧдчам
Став кор, —
Сетам кор
Мудзлытӧг
Сӧвет дор вын.

Ӧзтамӧй сьӧлӧм
Пӧсь вира ярӧн,
Том йӧзлӧн сьӧкыдысь
Эбӧс оз быр.
Ён врагысь ог полӧй, —
Ог мунӧ бӧрӧ,
Медым кӧть туй вылын
Зэв «джуджыд кыр».