1917 арын 25 числое октябре
Потӥз Совет закон ачимелы;
Соин ачимес со нуналэ
Шумпотыса праздник каромы.
Совет закон потэм нуналэз
Октябрь революция шуо;
Ужась крестьянэн сьӧд калыкез
Эрике, югытэ потӥз шуо.
Выль законэз потэм бераз
Тышкаськисез уно вал,
Быдтомы Октябрь революциез
Эксэен улом шуо вал.
Крестьянэн пролетар ас законзэ
Пульсам киыныз юн кутӥз,
Тӥни озьы кутэм бере
Октябрь революцилэн кык арез тырмиз.
Азьло выль закон потыку,
Буржуйёс, попъёс, помещикъёс,
Кык арня сяна уз улы
Шуо вал ялан соос.
Кык арня верамзы интые
Кык ар тырмиз ни туэ,
Горд закон пыр юнма
Улонэз выль сяин тупатъя.
Кык ар куспын туж уно
Ӟеч уж лэсьтӥз выль закон,
Коммунистъёс туж амало
Быгато ожмаськын эксэйёсын.
Совет закон вань улытозяз,
Крестьянлы музъем огкадь сётӥз,
Нылпизэс нош ас училищеяз
Чик уксётэк дышетӥз.
Кык ар куспы горд солдатъёс
Лыдтэм уно луизы:
Соин соос законзэс
Уз сётэлэ дауразы.
Кык ар улэмлы шумпотыса
Праздник каромы ачимес
Нош витёмы оскыса
Куиньметӥ праздникез.
Кык ар ӵож вормымтэ бере
Буржуйёс табре уз ворме
Совет закон юнмамъя
Буржуйёс ялан куашкало.
Улыса-вылыса война быроз
Улон крестьянлы кылёз;
Соку Октябрь революция гудыртоз
Быдэс музъеммы вылэ.
Таза луэ горд солдатъёс,
Кужмо луэ коммунистъёс;
Тӥляд горд флагды
Югыт дуннеез шобыртоз.
Собре быдэс дуннее
Горд гырлыед шуккиськоз,
Кулэм горд солдатэз
Тодаз аслыз вайыса.
Мусо Октябрь революцие,
Сайкаты быдэс дуннеез,
Тон пала берытскыса
Праздник мед карозы тонэ.
