Гази Кашшафка
Кадерле дус!
Кайнар йөрәгемдә
Дәрт кабызган җылы хатыңны
Укыдым да, тотып мылтыгымны,
Кабатладым изге антымны.
Мин кечкенә кеше, тар окопта
Кечерәям булыр тагын да.
Ә шулай да бөтен дөнья бүген
Урын алган минем аңымда.
Тар окобым –
чиге капма-каршы
Ике көчнең, ике дөньяның.
Хәл ителә анда кешелекнең
Киләчәге, якты идеалы.
Сизәм, дускай, бөтен халыкларның
Күзе хәзер безгә караган.
Йөрәккә көч, кулга сәләт өстәп,
Сәлам ява һәрбер каладан.
Сизәм, анда айлы төннәр буе
Йокламыйча ана җеп эрли,
Фронттагы батыр улларына
Җылы бияләйләр хәзерли.
Сизәм, кызлар – безнең иркә дуслар,
Станокка кушып йөрәген,
Гранаталар ясый безнең өчен,
Сындырырга дошман терәген.
Балалар да, «Тимур командасы»
Төзеп, безнең капка төбендә
Киңәшәләр ятим семьяларга
Ничек итеп булышу турында.
Тәүлек буе чыкмый заводтан
Эшли безгә Лондон эшчесе,
Менә кайда дуслык тойгысының
Иң тирәне һәм иң көчлесе!..
Юк, мылтыгым,
синең утың белән
Мин сакламыйм бары үземне,
Мин кабатлыйм Гитлер бандасына
Халкым кушкан җавап сүземне.
Күңел тоя,
илнең көчле тавышы
Яңгырый һәрбер мылтык атуда.
Күңел тоя,
миңа терәк булып
Бөек халкым тора артымда.
Ничек туңсын йөрәк,
тоеп тәндә
Шул халыкның йөрәк җылысын!!!
Ничек сүнсен өмет,
сизеп илнең
Җиңү утын, кайнар сулышын!!!
Канат җәеп үлем куркынычы
Торган саен окоп алдымда,
Мин көчлерәк тоям ирек тәмен,
Яшәү дәртен кайнар канымда.
Күзләрдә яшь,
беләм, алар горур
Яшәү хисе белән яшьләнгән.
Нәрсә артык җирдә,
илне саклап
Тар окопта батыр яшәүдән!!!
Рәхмәт, дустым,
салкын чишмә төсле
Татлы сүзең җанга көч бирде,
Илдәге дәрт, ирек, яшәү хисен
Хатың аша миңа күчерде.
Кил, дускаем, шушы хат аркылы
Саубуллашып кайнар үбешик.
Соңгы теләк:
Җиңеп фашизмны,
Якты илдә тагын күрешик.
