Од пингень вий/Ки покшось велесэнть?
КИ ПОКШОСЬ ВЕЛЕСЭНТЬ?..
Антипов вельсоветэнь председатель. Прянь нолдазь ашти озадо столь экшсэ. Турванзо прок ваз нолдынзе, секень вант сельгензэ ождякс таргавить мештеванзо. Щёка боканзо прок калонь пузырть буйкасть. «Сурьёзной» ломанесь Антипов.
Антипов ломанесь аволь дутой. Кавто иеть алясь, чукась Якстере армиясо, кавто иеть серой шинельсэ оршазь ульнесь лангозо. Кавто иес ламо пиземе лангозот кольги, ламо ведь лейганть чуди.
— Демобилизованной значит, — кортнить Антиповдо Жабинасо.
Антипов кодак сась армиясто, радовасть колхозниктне. «Сови алясь колхозс, карми вадрясто [ 99 ]ветямо тевтнень, мельганзо совить колхозс остаткатнеяк. Вант, вельсоветсэнть члентнэ вейкень пес аволь колхозсот». Истямо куля якась колхозганть кавтошка ковт. Учость Антиповонь колхозсонть, учость пельдензэ вадря руководства.
— Антипов, колхозс сёрмадстат? — весть вельсоветэнь пленумсо пшкадсь Мирон. Председателесь трокс варштась Мирононь цитниця плешензь лангс ды пшкадсь:
— Ужо, кенерят...
— Палкат што ли Антипов эзь некшне? — кежейстэ пшкадсь омбоце членэсь.
Те кортамось ракавтынзе весе ломантнень, конат ульнесть председателенть перька. Мирононь лангсо пеедсть, ки кода маштсь.
— Агитаторокс яволявтык прят? — ёртнесть валтнэнь эрьва ёндо Мирононь чамас. Мирон аштесь прок столба пезнавтозь ямас, ансяк пря колгансонть плешезэ цитнесь толонть каршо. Сон тигракс каинзе сельмензэ весеме ланга ды кежень пачк пшкадсь:
— Тынь калавтадо колхозонь тевенть. Тынь глохтятадо кулак марто, симдядо кедьсэст. Тынь тенст максыде истят прават, конатнесэ сынь калавтызь колхозонок.
Мирон вачкодизе мокшасонзо столенть. Чернилась прок тусто верь пургавсь чернильцастонть, столенть лангс тусь чудерькс.
— Стоп! Стамбаро! Мусак бозат. Причат пансесынек. Шайтян гаськазот сови, кадсак, пиштяка, колхозот.
[ 100 ]Эрьва ёндо марявсть покордамо валт. Вельсоветэнь члэнтнэ, Мирондо башка, весе аволь колхозсо. Сынь «ютавтыть» тевс партиянь ды советэнь властенть мероприятиянзо.
Кудонтень совась ломань, портфелезэ нюрксь кавалонзо ало. Општ мольсь конторась, ломантне сельмест пезнавтыть совицянть ёнов.
— Что за шум, а драки нет? — смелстэ ломанесь ютась икелев. Весе кашт молевсть. Совицясь сеск таргизе конёвонзо, вельсоветэнь прявтось ловнызе, венстизе мекев.
— Володькин, — пшкадсь председателесь. — Тейть нейке жо сводка видема лангонь роботатнеде.
Секретаресь озась тарказонзо, но превензэ прястнозо умок нокшстасть винадонть. Сельмензэ прок вишнят, черензэ кода понгсь нолдазь сельмезэнзэ.
— Шайтят мезть якавтыть!.. Мезть бу безпокоить? Ки сы, дай тензэ сёрмадт сводкат, отчёт, сведеният. Эряволь бу лия монь таркасо, содавлизе кодамо нужась...
Володькинэнь кедтне прок пружина вельде эвстазь лавтовтнэнень. А соды мезес кундамс, а соды мезе веши уполномоченноесь, а соды косто саемс. Сокаризе весе шкапонть, пуль кепедсь конторантень. Весе мелень тевтнень тарксинзе колмошкаксть.
— Тон зярдояк эрят аволь иредьстэ? — кевкстизе уполномоченноесь.
[ 101 ]Володькин васня пейдезевсь, мейле кепединзе сельме чирькензэ, кежень сазь пшкадсь:
— Симть тон монь жаловнястон!
Володькин зярдояк а эрсе аволь иредьстэ. Семиязо вачо пеке кирди, штапо ланго канды. Бути пшкади козяйкась, ицесынзе боканзо, козяйкась недля-кавто ашти тарка лангсо.
Володькинэнь састь кежензэ, киневтить кедензэ, но ниркинеть, а сатыть уполномоченноеть чавомс.
— У... йопонский бог! — сювордась авалем Володькинэсь ды лоштизе менкенерть вальманть. Суликатне жойнезь ёртовсть масторов.
Вармась покш мельсэ лыйневтинзе столенть лангсто конёвтнэнь масторов. Сонсь сяворькшнезь ношкстась кудостонть. Уполномоченноесь сёрмадсь лангозонзо акт.
Вельсоветэнь члентнэ срамавтсть. Лиссь уполномоченноеськак. Кавто азорт, кавонест кадовсть конторантень.
— Тон думика, бессовестной, — ушодызе кортамонть Мирон. — Аволь ансяк тонстеть, те шкас эрявольть весе вельсоветэнь члентнэнь совавтомс колхозс ды кемекстамс сонзэ. Иля арсе, што истя кувать эряват...
Мирон нерькстни сурсонзо. Антипов букакс сормизе конянзо, трокс варшазевсь ды кода парксты:
— Тон монь велестэнть паньсамак?! Тандавтнят! Силой колхозс совавтат! Аздат, што те перегиб? Подлец! Мон эщо не осознал колхозонть лезэнзэ. Докажи, што вадря эрямось кохозсо. Докажи, Юда!
[ 102 ]Антиповонь сорныть пильге санонзо, судозо крюкокс мендевсь, турвастонзо виев пиземекс певерить сельгензэ, секень вант тюрьгады.
— Ки покшось велесэнть, идемевсь? Мон! Председатель покшось!
— А тон покшось! Мон покшось! — вачкодизе грудензэ колхозонь председателесь Мирон.
— Мекс тон? Косо истя сёрмадозь?
— Мекс тон? Тонеть косо сёрмадозь? — Теде мейле Антипов стядо мик стясь столь экшентень.
— Мон валске жо Соловкав проводятан! — пеень сускозь рангстась Антипов.
— Пидсеват! — дризни эйсэнзэ Мирон. Антиповонь седеяк састь кежензэ.
— Мон штобу раскулаченой кудотнень илинк токше. Прянк сезнесынь! Илядо яка малазост!
Колхозонь председателесь сускизе келензэ. А ламос општ конторась мольсь.
— Илеть пезнавтне пееть не кудотненень, ирод окаяной! Ве кудонть уш рамизе Тарас Иваныч, инвалид, прят порксасы тосто. Ней колхозсо правась. Мезе мелем, сень тейса, тынк к чорту!
Покорс пря а максы Мирон. Арсе эзельдемс Антиповонь мейсэяк, штобу энгамоволь.
Антипов арсе муемс законсто истят валт, конатнесэ опавтевлизе Мирононь, штобу «подчинялся».
— Мень причань те колхоз! Совиде тозонь сивезь сёлнот, малавгак тенк а сокави моданк. Сат лезэнь вешеме, терневтян тенть...
Мирон лиссь столь экшстэнзэ, бойкасто яки кияксканть. Антипов прок зараза почаксы конёвонзо.
[ 103 ]— Валске жо явшасынь раскулаченнойтнень пире модаст, мекей. Ки покшось велесэнть? Тон? Мон докажу!..
Антипов пекстызе панжомасо столь потмонзо ды кежейстэ зэрневтизе кенкшенть.
Мирон ськамонзо кадовсь конторантень. Кувакасто укстазевсь.
— Неужели сон покшось велесэнть? — Мирон лоткась. — Ней ведь колхозтнэнень максть покш привелегия, эрьва косо преимущества колхозниктнэнень. Сон вана мезть тапари. Мон покшось велесэнть! — Мирон кундызе мештензэ, паметтеме уски вецюманзо.
Антипов чийсь, пельгензэяк прок эзть токше масторов. Седеезэ бажась чапамонтень, прок мекш медьс.
— Мон онкстятан колхозот марто! Вельсоветэнь праватне, аволь колхозонь. Канжамонзо киртясынь. Стувтсы видема лангонзояк... — Антипов чии ды моткоди. Сельмтнень пильгалонзо пезнавтынзе, мезеяк икелев а неи.
Каршонзо иредьстэ юты Васильев учитель, попонь цёра. Ансяк пачкодсь видезэнзэ, Васильев ноцковтызе картуз козырькадонть.
— Эх, рот тебе помело, мень шайтян нурьгат? — Антипов верей прянзо кепедизе, нузялдозь ваны Васильев лангс.
— Ков чият? — пшкадсь Васильев, сонсь пейдезь ваны Антиповонь чамас. Сон прок пидси палакс виев вармане кавтов шаты, ансяк а токави рукавцявтомо.
[ 104 ]— Адя монень! — ноцковтызе Васильев Антиповонь.
— Ули што ли тонть?
— Ата арась.
Кутмордасть кавонест ды тусть веленть кувалт Васильевнень.
— Да, — друк рангстась Антипов. — Тонть козяйкат карми таго сёвномо.
— Придушу! — отвечась Васильев да ёматотсть латко потмаксонтень.
Вельсоветэсь тури колхозонть каршо, колхозось вельсоветэнть каршо.
Колхозсонть ансяк 12 кудот, велесэнть — 189-шка. Колхозсонть весе малав беднякт, кулакт ды сынст агентураст весе вельсоветэнь членкс. 12 ломаньстэ вельсоветсэ ансяк 2 ломанть колхозникть ды неньгак эрьва кода тулкадить тосто. Колхозось вишкине, а саты виезэ, варштыть, акт сёрмадыть ды весе.
Вельсоветэсь явшинзе мекев раскулаченной усадьбатнень, колхозонть марто арсе судямо кудонь кис ды эщо улить ламо а паро тевть.
Арась тосо ячейка, арасть партиецт, комсомолецт. Ансяк чинек-венек зэрьни цёрькова прясо покш баягась ды алтарьсэнть попонть сянгора вайгелесь.
Сёвныть, шкась моли, видемась яла учи...