Одӥг ныл, кык пиосмурт вылэм

Одӥг ныл, кык пиосмурт вылэм… Калык выжыкыл

Источник: Гаврилов Б. Г. Произведения народной словесности, обряды и поверья вотяков Казанской и Вятской губерний. — Казань, 1880. — С. 62—63• Текстэз туала орфографие берыктэмын но абзацъёслы люкемын

Одӥг ныл, кык пиосмурт вылэм; соос уробоен базаре мыно вылэм; собере соос тэле вуиллям. Кык беглой лушкам со нылэз. Со беглойёс сое тэлетӥ нуиллям но липетэ пыртӥллям, ойдо али липет сьӧры, пе шуо, та сӥльмес учкы али, пе шуо, адями сӥлез-а сиёд, вумурт сӥлез-а сиёд? пе шуиллям. Уг си, пе шуэ, адями сӥлез но, вумурт сӥлез но. Ойдо ини липетэ, пе шуо, вина удом, пе шуо. Уг ю мон, пе шуэ, винадэс. Собере адями чиньыен перепеч сюдыны, пе, туртто; собере, со нылэз вина сектаны турттыса, изьыны выдӥллям, инизэ, со нылэз шоразы выдытӥллям; со ныл собере уг изиськы, пе шуэ, кышкасько, пе шуэ.

Собере со ныл лушкемен султэм но пегӟем; но силёе пырем. Собере беглойёс со нылэз шибодыен донгаса утчало, пе; собере ёрмыса со силёлы тыл понӥллям; тыл понэм бере со беглойёс липетазы мынӥллям.

Со ныл уйин пегӟем но черкогуртэ вуэм, гырлы шуккыны кутскем, калык люкаськем, отчы мумиз-айыз мынэм. Айыз но кулэм, мумиз но кулэм, дэймыса кулэм со нылзылэсь, мумиз-айызлэсь со ныл но дэймыса кулэм.