Обыда кышно

From Wikisource
Jump to navigation Jump to search
Обыда кышно
Калык выжыкыл
Поттэмын: 1880. Источник: Удмурт выжы кылъёс: Вотские сказки / собрал И. Яковлев. — Казань: Изд. Казан. вотск. изд. подотдела, 1920. — С. 7—9.

Валлян одӥг пересьлэн нылпиез вылымтэ. Со пересь ог нунал, тӥр басьтыса, писпулэсь лусйыны кутскем.

Одӥг бускелез лыктыса юам: «Map лэсьтӥськод тон?» — шуыса.

— Пи лэсьтӥсько, — шуэ, пе, пересь. — Солэн нимыз Ванька луоз, со гыроз, монэ сюдоз.

Лэсьтыса быдтэм но бусые гырыны лэзем. Обыда кышно со пизэ адӟыса ас корказ нуэм но, выжулаз поныса, борӟаса, одӥг арня сюдэм. Одӥг арня сюдэм бере ачиз эмезьлы кошкем, нылызлы гур эстыны косэм, Ванькаез пыжыны косэм.

Гур ӝуам бере, со выжулысен Ванькаез поттэм но куй вылэ пуксьыны косэм. Ванька пуксем но гуре уг тэры, пе.

Ныл Ванькалы куй вылысен васькыны косэм:

— Учкы, кызьы мон пуксё, — шуэм но ныл куй вылэ пуксем.

Ванька сое гуре куштэм, со ныл отын пыжем. Ванька ачиз выжулэ васькем.

Обыда кышно эмезен бертэм но гурзэ утем, утем бераз верам: «Ой, Ванька, туж ӟеч пыжемед ук тон», — шуэм. Собере нылзэ гурысь поттэм но пуксьыса сием. Лыоссэ сэндрае куштэм. Сием бераз верам: «Сэндрае тубыса, Ванькалэн лыэз вылын погылляськоно али», — шуэм.

Ванька выжулысен вазем: «Погылляськы аслад нылыдлэн лыэз вылын», — шуыса.

Обыда кышно верам: «Ой, тон, Ванька, горд пуны, али ке но улэп вылэмед… Ӵуказе ачим тодо тонэ мар карыны», — шуэм.

Ӵуказеяз ӵукна ик султэм но гур эстыны кутскем, одӥг ардана пу быдтэм. Гур ӝуам бере вазем: «Ванька, пот татчы, пуксьы куй вылэ», — шуэм. Ванька потыса куй вылэ пуксем, нокызьы но гуре уг, пе, тэры.

Обыда кышно вазем: «Учкы, кызьы мон пуксё», — шуэм но куй вылэ пуксьыса возьматэ вылэм. Ванька соку ик сое гуре донгыса борӟам. Обыда кышно тэльмырыны кутскем: «Буркарик, Ванька, монэ эн быдты, гурысь потыны лэзь. Тани тыныд гур азьын ватэмын одӥг горшок зарни уксё, одӥг горшок азвесь уксё», — шуэм.

Обыда кышноез быдтэм бере Ванька гур азьысь уксё басьтэм но дӥняз бертэм. Собере кышно басьтэм. Глаз каре купечлы гожтӥськем. Туж узыр, пе, улэ.

Мынам песяе солы Кузонысь тамак нуэм, со сое туж сектам, куарнянь пыжыса, кеч пӧзьтыса, сур но аракы но трос луэм. Песяе юэмысьтыз Глаз карысь кызьы потэмзэ но уг тоды.